Duhdawtnak Leiba

By Rev. Dr. Biak Hlei Mang

1. Romans 13:8 "Zohnen hmanah baakmi nei hlah uh. Nan baakmi cu pakhat le pakhat duhdawt awknak lawng kha siseh"
2. Ka Laimi Pipu pawl ih ttongtthim nak an neih mi cu "Saihlum le Leiba ngeh ti a neilo". Ziangvek leiba so a si pei. Kan laimi pipu pawl ih leiba cu leitlun thil pawl an cawih awk mi pawl an rulh thei hlan lo cu leiba nei an si. Te sin fa tiang in leiba cu cawhawk vivo a si. Sia bak a si ah cun sia ih rulh a si. Vokthau ih bak awk mi khal vokthau ih rulh awk a si. Rawl a han (bawm) ih cawih awk mi khal a han (bawm) ih rulh awk a si. A cawihtu pa/nu ih a ngaithiam hlanlo cu leiba nei ringring ti nak a si. Himi thil cawi awk milawng a silo. Laimi kan pipu pawl ih mikhual a ttha thei bik ih zoh pawl an si. Arti le sapherh an neih mi an ei siang lo. Mikhual hrang ah an ret. Mikhual an thlen tik ah rawlthaw le a tthabik an neih mi an suak sak. Zu tla an siak (pek). Cubang vek in mikhual pa khal in cumi pa te cu ra tlawn ding ah a sawm ih an tlawn le a ttha thei bik in a rak zoh ve. Rualpi ttha pawl cu vok le caw pawl tla an thah. Vok le caw thah pawl cu an thah sal ve. Cun, mithi an um tik khal ah mithiral timi tohpi awknak an nei. Zu belziat, ar le arti pumziat ti in an tohpi awk. Mithi te khal in zo te in cumi khami in in tohpip timi an cingkeng ringring ih a tohpi tute an thih tikah an tohpi ve sal ringring. Himi pawl hi kan pipu pawl Pathian an rak zum hlan ih an tuahmi le an hmanmi a si. Zoh a mawi ih cawntlak nun a si hrimhrim tiah ka ruat.
3. Kawlpawl (Buddhist) nundaan kan zohhnik pei. Kawlpawl khal hi mikhual zoh lam ah cun a ttha thei bik in zoh pawl an si ve. An neihmi puan an hman dah lo mi pawl an suah ih mikhual an sin ter. Rawl khal an mai nitinte ih an ei mi hnak in ttha zet in an suan sak. Mikhual pawl ih ttuanvo an nieh ve mi cu hi ti in an ti ttheu "Mi rawl barkhat na ei mi hman kha leiba na nei a si." Kawlpawl ih ti duhnak bik sawn cu mi in na par ih an tuahmi tthatnak hngil lo ding ah himi thufim anneih nak a si. "Mi in na par ah tthatnak an tuah mi hngilh lo in tthatnak in lehrul sal aw" tinak a si bik ko in ka thei. Hipawl hi cu Christian silo (zumtu si lo) pawl ih zirhmi a si ih kannih zumtu (Christian) pawl thawn a mil (saing) aw lo kan ti pei maw?
4. Romans 13 sung ah Paul in Christian pawl cu zumtu si hnu khal ah hlan ih tuah ttul mi le tuah ttheu mi acozah lam ah le mi thawn pawlkom awknak ah tuah bet ding in a forh. A hlei ce bik in tui kan siar mi ah zozo khal duhdawtnak leiba siar lo cu nei hlah uh ti a si. Ziang mi bik so duhdawtnak leiba cu a si.
5. 1. John 3:16 ah Pathian in leitlunmi a duhdawt tuk ruangah a fapa neih sun a pek." John 15: 13 khal ah hi ti in in sim bet, "Mi pakhat in a rualpi pawl hrangah duhdawtnak tum bik a neihmi cu an hrangih a nunnak pek hi a si." Hitluk ih duhdawtnak a neitu le a petu Pathian cu Duhdawtnak leiba nasa tak in ka nei. Himi leiba cu kan san sung ah sam theih ding a si lo.
6. 2. Pathian kan duhdawt timi hi minung hnen ah lang ter a ttul. Pathian cu mit in kan hmu thei lo na'n a mai hmuihmel kengtu minung pawl par ah Pathian kan duhdawtnak lang ter ding a si.
7. 3. Mi pakhat in duhdawtnak in kan par ah thil pakhatkhat a tuah mi cu duhdawtnak leiba kan nei ve a si ti theih a ttul. Mihrekkhat in "Pathian an duhdawt ruangah in tuamhlawm ih kannnih in lehrulh a ttul nawn lo" tiah an ti ttheu. Pathian in duhdawt ruangah an lo titthat le in lo tuanhlawm mi cu Pathian duhdaw tu kan si ah cun cu pawl hnen hrimrhim khalah Pathian kan duhdawtnak (Christian duhdawtnak) kan lang ter a ttul. Falam ka um lai ah Pakhat pa in a pa'ih thihzaan ah hi ti'n thu a sim, "Rualpi pawl, nan thih ah zaanvar hlasak in ka lo men. Pathian le nanmah ka duhdawt ruangah a si. Tuhi ka pa a thi ih in duhdawt ih Pathian khal nan duh ti ka thei. Curuangah a si hitawk nan rat nak cu. Zaanvar ka lo men pi vek in zaanvar in men pi ding ah ka lo sawm" a ti. Duhdawtnak leiba a cawhsal a si hi ka ti. Kan pipu pawl ih rak hman mi le rak tuah ringring mi lawng si lo in kan Bawi Jesuh ih zirhmi khal a si ve "Lungawi pawl hnen ah lungawi uhla riah a sia pawl hnen ah riahsia pi ve uh" a ti mi kha cing keng uhsi.
8. Kan za pi in Duhdawtnak leiba cu Pathian hnen ah le Minung hnen ah ka nei cio ti thei uhsi. Amen!!