Tthang Vingvo Uh

-Rev. Run Cung Mang

“Amah theihnak sungah tthang vingvo uh.” – (2Peter 3:18a)

Thuhmaihruai:

Khristian Nun tthanlen pitlinnak cu: “Jesuh Khrih cu i Runtu le ka Bawipa a si” ti ih zumnak ihsin hram a thok. Bible in, “Ka mifel cu rinnak in a nung ding” a ti (Gal. 3:11). Khristian Nun cu cawl loin a tthanglian vingvomi nunnak a si. Zumtu (believer) sinak ihsin Dungthluntu (disciple), cuihsin Tirhthlah (apostle) ti’n a dotdot in a tthang vingvomi a si. A hmaisabik ah Pathian theitu (knowing God), cuihsin Pathian duhdawtu (loving God), cuihsin Pathian riantu (serving God) ti’n thlarau mi cun a nitin thlarau nun pitling vingvo a ttul.

1. Pathian hnenah nitin Thlacam aw (John 15:7)

Jesuh in, “Keimai’ sungah nan um ih ka ttongkam hi nan sungih a um ve ahcun nan duhmi pohpoh nan dil tikah nan ngah ding” a ti (John 15:7). Khristian Nun tthanlen pitlinnak dingah lo theih lo ih a ttulmi cu, nitin Pathian hnenah feh in thlacamnak thawn Bawipa pawlkom hi a si. Yunggi Cho in thlacam cu Khristian pakhat ih thawthawt a si, a ti. Jesuh leitlun a umlai ah thla a cam (Matt. 14:23). Paul in catbaang loin thlacam uh in ti (1Thes. 5:17). Mi pakhat in hiti’n a sim dah: “thlacam lo-huham lo; thlacam mal-huham mal; thlacam tam-huham tam” ti’n. Curuangah thlacam nun hin kan nitin life style siter zuam ve thlang uhsi!

2. Nitin Bible Siar ringring aw (Tirh. 17:11)

Dr. Luke in, “Berea khua ih zumtu pawl cu Thessalonica khua mi pawl hnakin an thinlung a tluangtlam deuh. An thusimmi pawl thinlung takte’n an ngai ih nitin te’n Paul ih simmi cu a si ngaingai maw si ngaingai lo tiah Ca Thianghlim an siar ih an zohtthim” a ti (Tirh. 17:11). Minung tisa nun tthanlennak dingah nikhat ah a malbik rawl veithum tal cu ei a ttul. Cuvek thotho in zumtu thlarau nun tthanlen pitlinnak dingah thlarau hnawitii Pathian Ttongkam kan haal a ttul (1Peter 2:2). Joshua in, “Bawipa ih Daan cu a sun a zaan in siar aw. Cuti ih na tuah asile na tthangso dingih na tuahmi kip ah na hlawhtling ding” a ti (Joshua 1:8). Khristian nun hlawhtling kan neih theinak dingah Bible thlah loin siar ringring uhsi!

3. Pathian Thuthlun nun nei ringring aw (John 14:21)

Khrih hrangih rinsan tlak si thei dingah zumtu cun Pathian Thu a theihmi kha a thin muril ah a laaklut ih a nunpicih a ttul. Jesuh in, “Ka ttongmi a thei ih a thluntu cu lungpi parih inn saktu mifim pa bangtuk a si. Ruah napi in a sur, ti a lian ih thlipi in a nuai ciamco nain lungpi parih sakmi inn a si ruangah a sawn lo, a ti (Matt. 7:24). Bawipa in Amai’ thuthlun cu saserh thawinak hnakin a duhsawn (1Sam 15:22). Moses in Israel mipi hnenah, “Bawipa nan Pathian ih Thukham, tuih sun ih ka lo pekmi hi nan thlun ahcun thluasuah nan dong ding,” a ti (Daan. 11:27). Pathian thuthlun cu hlawhtlinnak thuthup a si ruangah Pathian Thu hi a theih men lawng si loin a nunpi le thlun thei zuam cio uhsi!

4. Na Nunnak le na Awkam in Khrih tetti ttha si aw (John 15:8)

Nitin na nunnak ah Pathian faa na sinak langter thei zuam aw. Na ei na in, na ttong daan le na nuncan ziaza ah, tangdor le mi zawnruahnak neih thei zuam aw. Jesuh in, “Pakhat le pakhat tlunah duhdawtnak nan neih a si ahcun mi in keimai’ dungthluntu nan si kha an lo thei ding” a ti (John 13:35). Jesuh in a dungthluntu pawl thu a cah taami cu: Jerusalem ihsin Judea, Samaria le leitlun killi ah ka tetti va si uh, ti a si (Tirh. 1:8). Kan innhnen, kan hnattuanpi, kan tlawngtapi le kan khualtlawnpi pawl hnenah tettikhan thei kan zuam pei. Evangelism le Mission hnattuannak ah sumsaw peknak in tla taimak suah cio uhsi!

5. Na Nunnak ziangkim ah Pathian lawng Rinsan aw (1 Peter 5:7)

Paul in minung hi: zumlotu, zumtu tisami le zumtu thlaraumi, ti’n phunthum in a tthen. Zumtu tisami cun minunglam thiltitheinak lawng a rinsan ttheu. Zumtu thlaraumi cun ziangkim ah Pathian ih umpit lamhruainak lawng a rinsan. Moses in, “Bawipa, Nang tel locun” timi Pathian rinsannak thinlung a nei (Suah. 33:15). Solomon in, “Bawipa cu na thinlung zate’n rinsan aw” a ti (Thufim 3:5). David siangpahrang khal in, “Bawipa hnenah na nunnak pe aw, Amah rinsan awla a lo bawm ding” a ti (Saam 37:5). Thinlung takin Bawipa rinsan uhsi!

6. Thlarau Thianghlim na nunnak uktu siter aw (Tirh. 1:8)

Khristian nun ih danglamnak thupibik cu Thlarau Thianglim ih cencilhnak a si. Jesuh in, “Keimah tel loin zianghman nan tuah thei lo” (John 15:5) a ti. Thlarau Thianghlim ih huham cahnak tel loin minung in Pathian hrangah tuah theimi ngaingai a nei thei lo tinak a si. Paul in, “Thlarau in nan nunzia a uk a si ahcun minung tisa hiarnak cu a di nan riamter lo ding,” a ti (Gal. 5:16). Zumtu hmaisa pawl ih huham neihnak le leilungpi an ti linglet theinak hi Thlarau Thianghlim ih huham cahnak in a si. “Nan hnenih Thlarau Thianghlim a rung thlen tik ahcun cahnak huham thawn nan khat dingih ka tetti nan si ding a ti (Tirh. 1:8). Thlarau Thianghlim ih umpit lamhruainak parah hngatsan ringring uhsi!

Thunetnak:

Na thlarau nun a lo tuamhlawm ding le a lo cawmtu ding Kawhhran pakhatkhat ah sungtel pitling dinhmun in pehzomnak nei tengteng awla khawm taima aw. Pathian Thu in: “Hmun khat ih kan pumkhawm ttheumi kha baansan hlah uhsi. Mihrek cun an baansan nain Bawipai’ Ni a nai vingvo ruangah kannih cu pakhat le pakhat thazaang pe aw sinsin ding kan si” (Heb. 10:25). Cule Nitin Pathian hnen thlacam aw. Bible thiang le Nitin Thlarau Rawl siar ringring aw. Pathian thu thlun in nunpi ringring aw. Na umnak hmuntin ah tettikhannak nei aw. Na thinlung zate’n Pathian rinsan awla Thlarau Thianghlim ih luahkhah nun neih zuam aw. Cuti cun na thlarau nun cu a cak ding, a tthangso dingih a pitling ding.

Siartu nunram ah Bawipa in thluasuah malza sawm hram seh!

__._,_.___