Phi 4:11b-13
San No Thuan
Thuhmaihruai:
Filipi ca kuat hi Rom thawng in in ngan a si. Thawnginn ih a um lai ihsin, midang pawl kha nan lungawi uh tiah tha a pe. Ziangah tile, a sungah ruahsannak le lungawinak thawn a khat. Ziangah lungawinak le ruahsannak thawn a nun a khat ringring? Nun daan thuthup ka zir ngah zo tiah a ti. Ziang a si pei?
1. Ka nunnak ih tumtahmi (purpose) cu Khrih a si (Phi 1:21).
· Phi 1:21 “Nun timi hi ziangso a si? Kei ka hrangah cun nun cu Khrih a si. Curuangah thih khal le a hlawk sinsin.”
· Paul in nun maw thih so ka hril sawn ding ti ka thei lo tiah (v. 20) a ti. A hrangah thih le nun ding hi a tih hrimhrim lo. Ziangh si pei?
o Ka nun le midang in Khrih ih thu an thei ih an zum thei dingah ka nunnak le ka tongka in Jesuh Khrih ih a sunlawi zia, duh ding tlak le pom ding tlak a si zia ka sim ding. Khrih theih le zum ih a hlawknak kha ka theih ter ding ti hi a tumtah. Ka nun a si le, Khrih kha zianghman ih a siar hrih lo tu/Khrih ih thupitnak a thei hrih lo tu pawl kha, Khrih ih a thupitnak ka sim ka zirh ding.
o Ka thih a si ahcun, Khrih a mah rori ka tong ding ih, ka thinlung harnak le buainak pawl hmuahhmuah a hloh ter theh ding.
§ Curuangah, thih timi cu Paul in:
1. Lei tlun kan thlam in kut sak lo inn nuam ih feh a si a ti (2 Cor 5:1-8).
2. Leitlun ih, sualnak, tukforhnak le harsatnak tinkim ih temtawnnak sung in luat khi a si a ti (Rom 8:18-23).
3. Kan thilrit pawl hmuahhmuah kha a hnen ih kan pek theh thei can khal a si a ti (Mtt 11:28-30). Jesuh Khrih hrang ih kan tuarmi pawl khal tuar a tul nawn lo ding. Paul ih tuarnak (2 cor 11:22-12:10).
· Curuangah Paul in kei cu ziang ka hril sawn ding ti ka thei lo tiah a tinak a si.
· Kei ka hrangah nun cu _________ a si. Ka thih le _________ . Himi hi kan ret dingmi cu a si.
· Mihrek cun, kei ka hrangah nun cu sumpai hawl a si. Ka thih le ka taansanta theh ding tiah an ti.
· Mihrek in le, nun cu hminthannak hawl a si. Ka thih le, in hngilh theh ding tiah an ti.
· Paul vek in, kan thinlung put daan cu si ve seh. Kei ka hrangah ka nun a si ahcun, midang in Jesuh hi zo a si ti an theih ih an hmuh ih, an zum theinak ding hrangah ka nunnak le ka tongkaa in langh ter ding le sim ding hi a si tiah a ti.
2. Ka Nunnak ih Pianhmang (Pattern) cu Khrih a si (Phi.2:5)
· Khristian pitling nun timi cu ziang a si? Khrih thawn bang awk khi a si.
· Khrih thawn bang aw timi cu ziang a si?
· Phi. 2:5 “Nan thinlung put daan cu Khrih Jesuh ih thinlung put daan vekin siseh.”
· 6Khrih cu Pathian sinak a nei
ringring;
Asinain Pathian bang dingah
hranhram in a tum dah lo.
· 7Cu ai-ah, Amah ih lungtho tein,
a sinak hmuahhmuah a taansan ih,
hnen-um sinak la tahratin,
Minung ah a cang ih minung pianzia
in a piang.
· Jesuh ih lungput cu Bawi a si nan, sal vek in, midang hrangah a nung. Tangdor zet in a nung. Tangdornak timi cu midang kha oosa a pe ringring. Midang hrang ruat tam, maih hrang ruat tam timi khi a si.
3. Ka Nunnak ih Laksawng (Prize) cu Khrih a si (Phi.3:12-14)
· 12"Hiti ka ti tikah, ka thlen tumnak hmun ka thleng zo, tinak a si lo; ka famkim zo ti khal a si lo. Khrih Jesuh in amah ih hrangah i kaih ngahnak zo ruangah ka hrangih a retmi zuam man co dingah hmailamah ka nor rero a si. 13Ka u le ka nau pawl, cumicu ka co ngah zo, tiin ka ruat hrimhrim lo. Ka tuahmi cu pakhat lawng a si: ka dunglamih a luan ciami thil kha hngilhsan tahratin ka hmailamih a ummi kha ban dingah ka dawh aw rero a si. 14Curuangah hmuitinmi lamah zuam man ngah dingin dingtein ka tlan. Cuih zuam man cu Pathian in Khrih Jesuh sung ihsin kumkhua nung dingah in run kawhnak kha a si."
· Paul in Khrih le kawhhran hrang ih hna a tuan tikah, a maih sunlawinak ding le hlawknak dingah thu a sim lo. A tuan lo. Cuhnak in, Jesuh thawn hmaiton te ih an ton awk tikah, Khrih ih a pek dingmi laksawng lawng ruahsan in a tuan.
4. Ka Nunnak ih Nehnak Huham (Power) cu Khrih a si (Phi. 4:13)
· 13"Cahnak i petu Khrih sungin ziangkim ka ti thei."
· China ih missionary hmin thang Hudson Taylor in hitin a tong. Pathian in ka zuam zet ahcun, ka zuam man ka tulsammi pawl cu I pe theh ko ding tiah a rak ruat. Asinan, a hnatuan ah a thin a nuam thei cuang lo. Asinan, a rualpa in ca a kuatmi thawng in a mit a vang. A rualpa cun, “Kanmaih lam rintlak kan sinak lam le zuamnak lam kha rinsan aw lo in, rinsan tlak a simi Pathian kha zoh in hmai ih kan feh le, ziangkim kan ti thei a si” tiah a ti. Cuti in, amaih thilti theinak le zuamnak kha a duhmi kim ter nak ih hrampi ah a ruat nawn lo ih, Pathian ih cahnak le huham sawn hi tuihsun ih I humhimtu le lam I hruaitu ti ih a zum tikah, ziangkim hnangam le lungawi te in a hna a tuan suak thei a si. Bawipa cu I khaltu a si timi hi kan theih ringring ahcun, hnangam te in kan um thei ding. Tong dang in kan ti le, tuih sun ni tiang ka nunnak hi dinhmun tiang I thlentu cu ka felnak le zuamnak a si lo, Pathian ih duhdawt zaangfahnak a si tiah na zum ahcun, thin hnangam te in na um thei ding ih, hmailam nor ngamnak cahnak huham na nei ding.
Thunetnak:
Paul hi ziang ruangah, Phil 4:4 sungah nan lungawi ih tiah thawnginn a tlak lai hman ah mi a ti thei? Ziangah tile, nun daan thuthup a zir ngah ruangah a si. Ziangsi a zir ngahmi cu:
1. Purpose: Ka hrangah nun timi cu Khrih ih palai tha si in, Khrih cu zohthimtlak le cawn tlak a si zia, kan sual in ngaithiam zia pawl ka nun in ka langh ter ding, ka simphuang ding a ti. Ka thih ahcun, nun tharnak ii pe ringringtu Khrih ka tong ngah ding ih, a sunlawinak I co ter ding a si tiah a ti.
2. Pattern: Kei ih ka zohthim bikmi le ka cawn ding um sun cu Khrih lawng a si. Bawi Bik a si nan, sal bang in a nung. Midang hrang ruat zet in, a maih hrang hman ruat lomi tangdortu a si a ti. Midang hrang ziang ka tuah thei pei timi a ruat ringringtu a si.
3. Prize: Laksawng ih ka ruahsanmi cu leitlunmi pawl hnen in a si lo. Jesuh ih ii pek dingmi sunlawinak lawng ka ruah san a si a ti.
4. Power: Ka cahnak hrampi cu Bawipa a si. Ka felnak le ka thilti theinak cu ka hlawhtlinnak a si lo ih, a zaangfahnak le a cahnak sawn hi ka hlawhtlinnak hrampi bik a si tiah a sim.
No comments:
Post a Comment