San No Thuan
Jan. 7, 2012
Thuhmaihruai
Tuihsun hi Salai Za Lian Maw (Maw Maw) ne ta bik a ruak kan thlahni le caan a si. Hi tawk ah, Maw Maw ih thuhla nan theih lomi te lo sim ka duh. Amah Maw Maw khal in, zohman sim hlah maw tiah I tiammi asinan, amah khal in I ngaithiam sehla, tuih sun a ruak kan thlah ni le caan ah lo ruah ka duh. Vei khat cu, Maw Maw in phone I rak set ih, ka u San Oo, a hnatuan a rem caang lo ih a riahsia, curuangah inn ra leeng aw la, thlacamnak in ra neih sak aw. Asinan, keimah in ka lo sim ti na sim lo pei tiah I ti. Kei khal thei lo vek in, ka va feh ih, ka va leeng ih, San Oo cu thazaang peknak le thlacamnak ka neih sak. Ka sim duhmi cu, Maw Maw hi innsang ruat zettu, a u San Oo khal ruat zettu le thlacam khal hmarngaih zettu a si timi sim ka duh. A thupte ih Pastor pawl thlacam ding ih thu a theih tertu le a sawmtu a si. Cuvek thinlung put neitu tuih sun khal ah ka lo sawm. Nan pastor pawl kha thlacam tul, vehvai a tulmi pawl kha midang ih theih lo in, simtu si hram uh.
Cun, a pahnihnak cu Maw Maw hi tangdor zet, midang ih oosa pe thei zettu le, awka hrang hmang dah lo tu a si. Awkaa neemte ih mibiak hi midang ih thinlung a nuam ter ih, mifim si a hlawh a si. Kan cawng pei uh.
Tuih sun ih ka thusim duhmi cu “vancungram hi zo pawl hrangah a si? Zo vek nunnak neitu pawl ih umnak ding a si?” timi a si.
A dunglam thuanthu
Jesuh Khrih a rak tlanleennak leiram hi Palestine ram ah a si. Culai ah biaknak a rak hruaitu pawl cun, vancungram kaitu ding pawl cu daan thlun theitu, mitha le mifel, sualnak a nei lo tu pawl an si ding tiah an zirh. Curuangah, thatnak tuah hi an zuam bikmi a rak si.
Culai ah, Jesuh cu misual an rak timi siahkhong pawl, hlawhhlang pawl thawn khal an bia aw, a ke khal hlawhhlangnu in a mitthli in a kholh sak ih, a sam in a hnul sak. Biak khal an bia aw. Cu tikah, Judah biaknak upa pawl in, Pathian fapa taktak a si ahcun, hivek misual pawl thawn a um lamlam lo ding tiah an ti.
Cutikah, Jesuh in hi tiin a sim.
Luke 5:31
Jesuh in, “A harhdammi pawl in sibawi an ṭul lo, a nami pawl lawngin an ṭul. Miding pawl ko dingah ka ra lo; misual pawl an sual sir awter dingah ka ra a si,” tiah a ti.
Pathian Ram or Vancungram timi hi an bang aw maw?
Pathian ram (The Kingdom of God) le vancungram (Tha Kingdom of Heaven) tiah kan bible ca sungah nan hmu ding. The Kingdom of Heaven, Vancungram timi tongkam cu Matthai in a hmang bik. Ziangruangah tile, anih in ca a ngan tikah, a casiartu pawl hi Juhdahmi pawl an si. Juhdahmi pawl cun, Pathian tiah an sal ngam dah lo. Pathian cu a thianghlim tuk ruangah, kan salsual pang ding tiah, Pathian ram timi ai ah, Vancungram tiah Matthai in a hmang. Cangkhat hnih sungah lawng Pathian uknak tiah a ngan ding (e.g. Matt 6:33).
Asinan Pathian uknak timi cu a dang thuthangtha ngantu pawl in an hmang. Ziangah tile, an casiartu pawl hi Gentile mi pawl an si ruangah, Gentile mi pawl cun, Pathian timi tongfang sal hi poi an ti lo. Curuangah, Pathian uknak lole, Pathian ram tiah an hmang. Curuangah, ka sim duhmi cu Pathian ram le Vancungram timi hi an bang aw. An dang aw lo.
Pathian ram maw Pathian uknak timi kan hmang deuh ding?
Ram kan tive ten, ziangtluk a kau timi ah kan thinlung a feh cih. Cumi ih a that lo nak cu, a hlan Khrihfa santhuanthu sungah, Khrihfa ram pawl in Pathian ram kau sinseh tiah midang ram pawl kha hriam le naam thawn an do ih, an laksak. An mai ruahnak ahcun, Pathian ram hrangah tiah an ruat ih mi dang ram kha a va uk. Curuangah, tulai ah Bible thiam pawl cun, Pathian ram ti hnak in, Pathian uknak timi hi an duh deuh. Ziangah tile, Pathian ih uknak timi cun, khua le ram a sawh khih lo ih, Pathian ih mi a uk daan, le a feh daan, a lamzin khi a sawh deuh sawn ruangah a si.
Pathian ih mi a uk daan, a lamzin hi ziangvek a si?
1. Pathian ih mi nauta le misual pawl hnen ih a lungput: Luke 15:11-32 ….
Fapa tlaan hlo pa ih thu a sim tikah, Pathian in a hnen ihsin a tlaan hlo tu pawl hnen ih a lungput kha fiangte in a sim. Himi thuanthu sungah, a sim duh bikmi cu Pathian cun, a hnen ihsin kan tlaan hlo tik lai khal ah, a zor thei lomi a duhdawtnak thawn in duhdawt ringring timi hi a sim duhnak a si.
2. Pathian in Jesuh hmang ih A hnatuan (A mission): Luke 5:31 ….
Midam pawl in siibawi an tul lo. Mi dam lo pawl hrangah ka ra. Mi sual hawltu dingah ka ra tiah a ti.
3. Pathian uknak cu misual pawl hrangah a si: Matt 21:31
Jesuh ih Pathian uknak thu a sim tikah, phun hnih in a sim. Pakhatnak ah, mi farah pawl le mi ih misual tiah an nautatmi pawl hnen ahcun, Pathian uknak, vancungram cu nan mai ta a si tiah a ti (Matt 21:31).
Cutikah Jesuh in, “Fiangtein ka lo sim: siahkhongtu le hlawhhlang pawl hi nan hlanah Pathian Uknak sungah an lut ding.”
Ziangah misual pawl cu vancung ram ah an lut ding tile, Pathian uknak cu felnak le thatnak tampi neih ruang ih lut ngah a si lo. Pathian ih zaangfahnak ruangih lut ngah ding a si ruangah ka thatnak in ka lut ding a titu pawl cu an luh a har zet. Asinan, misual ka si ti thei aw in, ka sinak vek in ii cohlangtu Jesuh a um ti rinsan ih a hnen a pantu hmuah cu Pathian ih zangfahnak a congahtu an si. An thinlung hna a ngam ih an taksa khal a dam. Vanram, Pathian uknak ih thawt zia an nun in an tep ngah.
A pahnihnak ahcun, midang pawl kha an soisel, an nautat ih, duhdawtnak lamzin zawh lo in, mi soiselnak lamzin an zawh ringring. Cupawl cu Jesuh in nan sir awk lo ahcun, Pathian uknak vanram nun nan tep thei lo ding tiah a sim (Luke 13:1-5).
Zumtu pawl kan sual pang tikah, ziang kan tuah ding?
Depression, thinnaunak natnak hi khui in a ra? A ratnak phun tampi a um ding. Tampi lak ah, pakhatnak cu sualnak hi a si. Zumtu pawl in sualnak kan tuah tikah, kan lung sung ih a hung suak theumi cu, “Pathian thawn kan hlat aw zo, Pathian in nun I sim ding. Thil ka tuahmi khal ka hlawh tling nawn lo ding” tiah kan thin nuam lo in kan um theu. Cutikah, ralhrut in kan um. Ralhrut mi lungput cun, hmailam ih kan ruahsannak khal a thih ter. Ruahsannak ka nei nawn lo tiah kan ruah cun, nun khal kan paih nawn lo ih, thinnaunatnak (depression) a ra suak.
Cuvek ih thinnau natnak kan neih lo nak dingah, Pathian in ziang in ti? Ka fa ra kir sal aw. Na sinak vek in, ka lo hmuak ringring tiah Fapa tlaan hlo pa ih thu in in sim zo. Cuih tlun ah 1 John 1:9 sungah, sual ngaithiam kan dil ahcun, kan sualnak in thian ter theh ding tiah in sim.
Cuih tlunah, zumtu cu Pathian hnen ih kan kir sal tikah, Pathian in ka duhdawt bikmi na si tiah in ti ih, in cohlang ringring a si. Bawipaih hnen ih a kir tu pawl cu, 2 Cor 5:17 sungah, Pathian in sualnak a nei dah lomi bang in, nun thar thawn kan nunnak in thawh ter sal a si tiah in sim.
Thunetnak:
1. Pathian uknak lole, Vancungram cu misual nang le kei hrangah Pathian ih a retmi a si. Pathian in ka sinak vek in I duhdawt ih I cohlang tiah a theitu pawl hrangah Pathian in a retmi a si.
2. Kan sual pang tikah, Pathian hnen ah kir in, sual ngaithiam dil lohli uh si. Cu ti ih, kan kir ahcun, Pathian in kan sualnak in ngaithiam ding ih, ral thatnak thawn hmai ah nor ngamnak in pe ding a si.
Sermon at Maw Maw’s funeral service on Saturday, Jan 7, 2012.
No comments:
Post a Comment