Jesuh ih Tlaangpar Thuzirhnak (Mathai 5:3)

1. Kanmah le mah kan hmuhawk daan ding le kan lungput

Matt. 5:3. Thlarau lamah ka farah ti a thei awtu pawl cu mi thluasuak an si. Ziangahtile vancung Uknak cu anmah ih ta a si.

Sullam simfiangnak:

1.1. Thluasuak (blessed) timi cu lai tong ih sullam: “Thlua le Tlaang suak ko kai thei hram seh" tinak a si.

1.2. Thluasuak timi ih sullam cu (Gk: makarios, Hb:’asre) van ro le lei ro cotu tinak a si. Pathian hnen ihsin a rami sunglam ih nun diriamnak, daihnak, hnangamnak le lungawinak pawl khi a sim duhmi a si. Minung lam ih lungawinak khi a simi a si lo. Habakkuk 3:17-18 sungah, mi thluasuak pawl si daan a sim. Mi lian lawng ti si lo in, mi fah si khal le thluasuakmi sinak lamzin a um tinak a si.

Theipi in rah an neih lo ih

                        Sabit hri ih Sabit a rah

                        lo hmanah,

                        Olif kung ih olif rah an siat

                        ṭheh ih,

                        Lo in rawl a suah lo hmanah,

                        Tuu pawl an thih fai ṭheh ih,

                        Caw inn tla an lawng ṭheh

                        hmanah,

                       

18Ka lungawi in ka thin a nuam

                        thotho ding;

                        Ziangahtile Bawipa Pathian cu

                        i runtu a si.

Hi pawl thu ih Jesuh in a sim tikah, a sim duh bikmi cu mi thluasuakmi pawl cu milian le mi neinung pawl an si tiah a ti lo. Zozo khal “Thlarau lam ih mifarah ka si” ti a thei aw tu pawl an si.

1.3. Farah. Thlarau lam ih ka farah ti kan theih thiam theinak dingah, “Farah” timi sullam kan ruah a tul. Mi farah nau pawl ih um daan khi zoh hnik uh:

a.     Unau sungkhat rinsan ding tthi tha khal an nei lo.

b.     Ei le inn ding khal an nei mumal lo.

c.     Anmah cawmtu a um le cumi mi pakhat te lawng an rinsan. Cuih an rinsanmi ih thu in an nung. An hngal lamlam lo. Tangdor te in an um.

1.4. Thlarau lam ih farah timi sullam cu: A tlun ih farah timi ih sullam kan theih hnu ah, thlarau lam ih farah pawl ih ziaza pawl cu:

1.4.1.     Rinsanmi: Anmah le mah rinsan aw lo in, Pathian parah an rinnak a retu pawl tinak a si. Pathian parih rinnak retu pawl cu an hngal lo. An porh aw lo. Mi nautat le zomtaih an hmang lo.

1.4.2.     Dunglam thu ah: Ka ziangkim hi Pathian ih laksawng lawngte an si ih, a duh ahcun a la sal theh thei ih, a duh ahcun, ka neih lomi ziangkim khal I pe theitu a si timi thei awk khi a si.

1.4.3.     Tuisun ni thu ah: Ka fehnak ding lamtluan khal Bawipaih thu lo cun, Bawipaih duhmi a si lo cun ka feh lo ding ti ih, Bawipaih duhnak lawng thlacamnak le Bible siarnak ih hawltu pawl khi Pathian rinsantu pawl an si.

1.4.4.     Hmailam thu ah: Pathian kut sungah ka hmailam a um. Keimah ih kut sungah a um lo. Keimah controlmi ka si lo. Pathian ih controlmi ka si ti ih theih awk ringring khi a si.

1.4.5.     A porhawknak: ziangkim a tuahmi hi Pathian ruangah a si ti in a sim ih, Pathian sunloih ding lawng a tumtah. Pathian ih hmin than ding lawng a ruat.

David ih lungput hi “Thlarau lam ih mifarah pawl ih lungput a si” (1 San. 29:11-14).

Nangmah le nangmah tla na rinsan aw pang maw? Pathian ih cawmmi le zokhenmi ka si ti thei lo in tla na vak tawi rero men pang maw? Tuisun ih na um daan teh Pathian ih duhmi hawl lo in, na feh pang maw? Na hmailam tla Pathian kut sungah a um. Ka zuamnak le ka thilti thei ruangah si lo in, Pathian thuthlun, Pathian ih duhmi tuah hi ka famkim theinak a si timi na thei zo maw? Zo ih sunlawinak si na hawl?

Vancung uknak cu anmah ih ta. Vancung uknak, Pathian ih ram cu Pathian ih ta a si. Asinan, Pathian hmai ah zianghman ka si lo ti a thei aw ih Pathian lawng a rinsantu pawl ih hnen ah Pathian in a uknak cu a thlen ter ding. An nunnak le an innsaangah, Pathian ih uknak ih thluasuah pawl a co ter ding.