Khrih Lungput Neitu Mino

by Rev. Run Cung Mang 

“Nan thinlung put daan cu

Khrih Jesuh ih thinlung put daan vekin si seh!” 

- Filipi 2:5

Thuhmaihruai:

Tuni hi Chin Baptist Association, North America sungtel kawhhran (26) ah “Khrih Lungput Neitu Mino” timi thupi hmangin “CBANA Mino Ni” kan hman tlang thei ni a si ih thuthangtha simnak caan tha ka neih ruangah ka lungawizet.

“Khrih Lungput” kan ti tikah tampi sim ding a um thei. “Nan thinlung put daan cu Khrih Jesuh ih thinlung put daan vekin siseh” timi hi Mirang Bible NIV ah, “Your attitude should be the same as that of Christ” ti’n “attitude” a hmang. Ca Thianghlim sirhsan in Lungput daan phun (5) kan zoh khawm pei.

1.    Tangdornak lungput (Humility) 

“Kei cu nunneem le tangdornak thinlung neimi ka si.” (Matt. 11:29) 

Khrih Jesuh ih nun thuanthu kan zirzoi tikah tangdor mi a si zia kan hmu. Amah le amah “Kei cu nunneem le tangdornak thinlung neimi ka si” a ti aw ih, Paul khal in Khrih cu “tangdornak thinlung a nei” a ti (Filipi 2:8). Jesuh cu tangdor mi a si vekin Amah a zumtu pawl tla tangdor mi si dingah in duh. Jesuh in, “Amah le amah a uang awtu cu mi nauta ah tuah a si dingih, lungneem tangdor ih a umtu cu hmaizahnak ngahtu upa ah a cang ding” a ti (Luka 14:11). Paul khal in, “Pakhat le pakhat tangdor awk tonnak thinlung nei uh” (Filipi 2:3) in ti. 

Curuangah tangdornak hi Khrih ih lungput a si ih, Jesuh Khrih cu i Runtu le ka Bawipa a si, a titu zumtu pawl ih kan lungput ding hrimhrim a si. Tangdornak cu colhhahdamnak, Pathian hmin sunlawinak le Pathian ih khaisan mi kan si theinak ding thuhrampi a si. Peter in, “Curuangah a cakmi Pathian hmai ah tangdor tein um uhla amah in caan a kim a ti tikah a lo khaisang leh ding,” a ti (1 Peter 5:6). 

2.   Thuthlun duhnak lungput (Obedience) 

“Pathian thuthlun in thinglamtah thihnak tiangin a tuar.” (Filipi 2:8) 

Khrih Jesuh ih nun thuanthu kan zirzoi tikah thuthlunnak (obedience) a neih zia hi fiang te’n kan hmu thei. A nauhakte lai ihsin thungainak thinlung neimi a si: “Jesuh cu a nu le a pa thawn Nazareth ah an kir ih an thu ngai in a um” (Luka 2:51). Culawng si loin, Gethsemane hmuandum ih thla a cam tikah, “Ka Pa, na lungkimmi a si ahcun hih tuarnak hai hi in laak sak hram aw. Sikhalsehla keimai’ duhnak si loin nangmai’ duhnak vekin si ko seh” tiah a ti (Luka 22:42). 

Curuangah kannih Christian pawl tla kan Bawipa bangin thuthlun duhnak lungput neitu kan si ding a thupizet. Paul in, “Pathian thuthlun in thinglamtah thihnak tiang a tuar,” a ti (Filipi 2:8). Bawipa in thuthlunnak cu raithawinak hnakin a ttha sawn a ti (1 Samuel 15:22).

3.   Mi Zawnruahnak lungput (Compassionate heart) 

“Miseenpi a hmuh tikah khaaltu nei lo tuu bangtuk in rethei le awloksong ih an um ruangah an parah zaangfahnak tumpi a nei.” (Matt. 9:36) 

Khrih Jesuh ih nun thuanthu kan zirzoi tikah midang zawnruahnak a neih zia kha fiang tein kan hmu thei. “Midang pawl (Others)” timi hi Jesuh ih thlir daan a si ih zumtu cu amah le amah zoh aw loin midang pawl ih ttulsamnak sawn kha hmuitin in a zoh sawn dingmi a si. Jesuh cu midang zawn a ruat, a rian, pum a pe ih Pathian a sunloih. Thukam Thar ah vei (20) lenglo midang zawnruat ih kan nun ding thu in sim. 

Curuangah kannih zumtu pawl tla kan pupa pawl thufim ih a um bangin, “Mai’ hrang cang-ai khorh” si loin “Unau theipum seu” timi thinlungput neitu kan si ding a thupituk. Paul in, “Mi nahsuahnak nei in, mai’ zawn lawng ruat le mai’ hminthannak lawng hawl in um hlah uh. Nanmai’ duhnak lawng si loin midang in an hrangah a thupibik ih an ruahmi kha a hmuh zia thiam ve uh,” a ti (Filipi 2:3, 4). 

4.   Pumpek duhnak lungput (Commitment) 

“Amai’ lungtho te’n a sinak hmuahhmuah a taansan ih hnen-um sinak la tahrat in minung ah a cang.” (Filipi 2:7) 

Khrih Jesuh cu pumpek duhnak thinlung neitu a si. Zawnruahnak hi atak ih pumpeknak le tuan suahnak a um lo ahcun zianghman a tthahnem lo. Jesuh cun miseenpi zawn a ruat ih an hrangah atak in a nunnak a pek a si. Dr. J.H Jowett in, “Pumpeknak tel lo Pathian hnatuannak cun zainghman tisuakmi a nei thei lo (Ministry that costs nothing accomplishes nothing)” a ti. Thluasuah (blessing) a um theinak dingah thiisen suaknak (bleeding) a um ve hrimhrim a ttul. Himi hi Paul ih lungput a si (Filipi 2:17) ih Timothy ih lungput khal a si ve (Filipi 2:20). 

Curuangah zumtu in lo theih lo ih kan neih ve dingmi cu pumpek duhnak lungput hi a si. Pumpeknak lungput a neimi zumtu cun Khrih hrangah tuar ding le ttuan ding a um tikah a hrial dah lo. Pathian sunlawinak le midang tthatnak hrangah a nunnak tiang a pek. Socrate in, “Nangmah le nangmah theithiam aw (know yourself)” a ti, ih Disraeli cun, “Nangmah le nangmah kilkhawi aw (control yourself) a ti, asinan Jesuh cun, “Nangmah le nangmah el awk aw (deny yourself) in ti (Matt. 10:37-39).  

5.   Ttuanvo pitlin duhnak lungput (Loyalty) 

Hnattuan in pekmi ka ttuan ttheh zo ih na sunlawinak cu leilung ah ka langter zo.” (John 17:4) 

Khrih Jesuh ih nun thuanthu a maksaknakbik hi Pa Pathian ih hnatuan a fialmi ttheh fel duhnak lungput a neihmi hi a si. A nunnak pumhlum ih a hmuitinmi cu Pa Pathian ih hmin sunloih ding lawng hi a si timi a fiangzet. A thlacamnak sungah, “Hnatuan i pekmi ka ttuan ttheh zo,” (John 17:4) a ti ih thinglamtah par ihsin, ‘A kim ttheh zo,” ti’n a au (John 19:30). 

Curuangah zumtu kannih tla Khrih lungput nei in kan liang parih tthummi Khrih le Kawhhran hrangih tuah ding ttuanvo kan neihmi pawl tthehsuak ko ih ttuan duhnak thinlung kan neih ding a thupi. Paul hi Khrih lungput neitu a sinak a langnakbik cu: “Ka duhbikmi le ka hngakhlapzetmi cu ttuanvo ka neihmi hi tuahsuak hram ningla, cule ziangtik caan khalah le ahleice in atufang hrimhrim ahhin ralthatnak thawn khat tahrat in ka nun ah siseh, ka thih ah siseh, ka thinlung ka taksa zate thawn Khrih hi upat hmaihngalnak pe thei ningla ti hi a si,” a timi hi a si (Fililpi 1:20). 

Thunetnak:

“Khrih lungput neih ding” timi hi kanmai’ duhhrilnak neih ding (optional) si loin Pathian thupek, zumtu in lo theih lo ih kan neih dingmi (compulsory) sawn a si. Jesuh Khrih zumtu Christian zo poh, ahleice in tuni hi CBANA YOUTH SUNDAY a si bangin Mino pawl in, tangdornak lungput, thuthlunnak lungput, zawnruahnak lungput, pumpeknak lungput, le ttuanvo tlin duhnak lungput kan neih ding a thupituk. Kan nunnak in Khrih Jesuh a thangthat ih a sunloih theinak dingah kan lungput (attitude) a thupizet. A parih tarlangmi Khrih ih lungput vek neitu kan si ahcun ziangkim kan tuah le kan ttuannak kipah hlawhtlinnak kan ngah dingih Pathian hmin a sunglawi ding.

Bawipa in thluasuah bawngmal in sawm sak hram seh!

April 27, 2014 CBANA Youth Sunday ih a simmi a si.