Thenhra Then Khat Pe Dingih Sawmnak Thu

San No Thuan

Kawhhran member sungah Thenhra Thenkhat a pe lotu an um tikah ziangtin pe ding in na forhfial ding? Ruah daan a phun thum in langter ka duh:

1. Tuanvo neitu a sinak thu in sawm daan: Kawhhran member pakhat in na tuanvo a si ti ih sim vukfi. Thenhra then khat na pek lo ahcun kan member in kan lo suah ding tivek ih sim daan. 
2. Tuamhlawmawknak thu in sawm daan: Kawhhran cu thih le hloh ah tuamhlawm aw ding kan si timi hi kan thutiam a si. Thenhra thenkhat na pek lo ahcun na nat khal ah, thihhloh caan khal ah kan lo zoh lo ding ti in tuam hlawm awknak thu simnak ih sim daan. 
3. Pathian thu ih sawm daan: Then hra then khat cu Pathian ih ta a si. Curuangah, thluasuah don kan duh ahcun, 1/10 petu kan si a tul. 1/10 cu Pathian na ta kan si, na thluasuah hi kan nunnak a si ti ih kan tinak a si. Pathian hnen ih lungawi thu kan simnak le Pathian kan lo zum ti ih kan tinak a si. Khui tawk ah na pe ding? Malakhi 3:10 sungah Bawipaih Biakinn ah nan 1/10 cu rak keng uh tiah in ti ruangah, Biakinn ah rak ken ding a si. Khui tawk biakinn ah? Pathian thu in a lo cawmtu, na dam lo nat khal ah a lo cawmtu ding Biakinn ah pe aw. 

A tlun lam ih number 1 le 2 cu lei tlun pawlkomawk daan (organizational law) ih sawmawk daan deuh a si ih number 3nak cu Pathian thu thawn pawlkomawknak daan, biaknak lam pawlkomawknak dingtu pawl ih simawk le sawmawk daan ding cu a si.