--by San No Thuan
Chili ram ih sui le lung mankhung dangdang pawl laihnak pi a min ih khur sungah a laitu minung 33 pawl an runhim daan thu ka ruah rero tikah, Pathian ih in duhdawtnak le rundamnak thuthang tha thawn a pehpar aw zet ti ka hmu. An laihmi mi a olnak in "Sui Khur" tiah ka ko mei ding. Pathian in a lo duhdawt zia thei sin ding in ….
An sui Khur a cim
August 5, 2010 ah Chilli ram ih suikhur lai pawl minung 33 cu an sui khur a cim ih leilung sung ih pi 2300’ sungah an taang. A nungtu an um pei maw tiah an zingzoi tikah, minung 33 rori an nung ti an theih cun, an lungawi tuk. An nufa le an rampi cu an lungawi tuk ih, ziangzat a cem khal le ti in, runhimnak hnatuan an thok.
Minung pawl hi sualnak sungah kan lut kan lut ih, neta bikah pawt thei nawn lo in, sualnak hi huham in in khuh cihcih. Kan thih khal le taksa lawng thi si lo in, kan thlarau tiang hell ah a thleng ding. Cu ti ih ruahsannak nei nawn lomi dinhmun kan si lai ah, Pathian cu a sersiammi kan si ruangah, in duhdawt tuk ih, ziang tiin ka rundam ding ti a hram thok in a tim tuah cia a si. Adam le Eve an sual pek thok in cui timtuahnak lang ter duhah, saphaw in an taksa a hup sak a si. A langhter duhmi cu nan sual ngaithiamnak dingah, thisen a luan a tul a si ti a lang ter.
Rundamnak hnatuan an thok
Chili ram pi cun, lungkua leihnak dingih a tha bikbik cet an hawl ih, minung 33 ih umnak zawn ah minung tlem in sun le zaan ti lo in, kua an lai. Cumi sung hmuahhmuah cu kua dang fate pakhat a um ih cumi in telephone le hman bilu in, an zuk an zoh aw. An bia aw. Tirawl an vun pe. Ni 69 a rei hnu ah an umnak lungkua sung an vung thleng. An lungawi daan cu a mak tuk. An nufa pawl khal an tap. Chili suikhur laitu hnatuantu pawl khal an mitthli a tla. An lungawi tuk.
Manuel Gonzalez a vung tum
Cutheh hnu ah, minung pakhat lawng to theimi thir kuang an tuah. Cumi sungah, zosi a vung tum ding ih a vung run ding tiah an ti tikah, Manuel Gonzalez timi pa in, keimah ka feh ding tiah a ti ih, a vung tum. Gonzalez a vung tum hnu ah pakhat hnu pakhat kha cui thir kuang sungah a ret ih, a hun suah. Cuti in, suikhur lai minung 33 cu leilung par ah an hung thleng.
Cuvek in, Pathian in Thukham hlun sungah cun, “Aw” in maw, meisa in maw, cun, meiro in maw a hmel a lang ter. Pathian ih sinak ngaingai zohman in an rak hmu thei lo. Asinan, Thukham thar sungah, Jesuh Khrih cun keimah ka vung tum ding a ti ih, Van sunlawinak pawl hmuahhmuah taan in kan sualnak hrang ih nunnak liam dingah le sual ngaithiamnak thlen ter dingin, a rung tum. A thlam lawng ih an rak hmuhmi Pathian cu kan mit ih kan hmuh theinak dingah a tak in minung pianhmang keng in a rung tum. Jesuh Khrih cu a rung tum men lawng si lo in, kan sual ngaithiam kan si theinak ding hrangah, kan sual man a nunnak a liam lai hrih. Cu tluk in in duhdawtu Pathian a si.
Rundamnak cu na fel ruangah a si lo!
Mi hrek khat in, mai thatnak tel lo cun, ka felta lo cun, ka nunnak ka tthin ta lo cun, Pathian in ka sualnak I ngaithiam thei lo ding an ti. Sui khur lai minung sawmthum kha an that ruangah si lo. An fel ruangah si lo. Chili mipi ih duhdawtnak le zawnruahnak ruangah a si. Cuvek in, Bawi Jesuh in, kan fel ruangah si lo. Kan that ruangah khal ah si lo. In duhdawt hrimhrim ruangah a si. Zovek, ziangvek sualnak tuahtu na si khal le Pathian ih duhdawt hrimhrimmi ka si, a rundammi pakhat ka si ti hngilh hlah. Mi sual kan si lai hrimhim Jesuh cun, kan mah run ding in a rung tum ih a nunnak a pe si (Rom 5:8).
Pathian ih rundammi lak ih tel lomi pawl cu Satan le a rualpi pawl lawng an si. An nih in kan sualnak ai ah Jesuh a thi ih, kan sualnak cu ngaidam a si zo an ti thei lo. Asinan, nang cun, Pathian ih sual khuathim huham sung ih rundamnak le sual ngaithiamnak cu ka hrang a si tiah na rak ti thei. Ziangah tile, Pathian in a fapa cu leilungmi zate hrangah a run thlahmi a si (John 3:16). Kolose 1:13-14 sungah, an sualnak pawl khal Jesuh Khrih ruangah, in ngaidam theh zo a si tiah a ti. Cui rundamnak na zum a si ahcun, cui rundamnak hna a lo tuansaktu Jesuh Khrih kha na zum tinak a si ruangah, thimnak in tleunak ah, sualnak huham sung le kumkhua thihnak sung in, duhdawtnak huham sung le kumkhua nunnak sungah na lut zo a si. Kumkhua nunnak neitu na si zo tinak a si (1 John 5:13).
Pathian mithmuh ah mithar na si zo!
Jesuh Khrih sungah Pathian in kan nunnak cu a ret zo ih, kan ai ah kan sualman a kuan ter. Curuangah, Pathian hmai ah kan nun hlun le sualnak pawl cu Khrih thawn thinglamtah par ah a thi theh zo (Col 2:14). Khrih kha thihnak in thawh ter a si tikah, kan nih khal thawh ter sal kan si ve. Curuangah, Bible in, Khrih sung ih a ummi hmuah cu mithar an si zo tiah a ti (2 Kor 5:17). Pathian ih mithmuh ah mithar, Khrih ih thisen ih leimi Pathian ih fanu le fapa kan si (Efesa 1:3-8). Pathian ih in a tharmi nun thawn thawh sal theinak a lo pek. Buddhist pawl cun, kan sual a si ahcun, cui kan sualnak cu kan mah in kan kuan sal ding tiah a ti. Na duh ah duh lo ah na tuar ta rori a tul ti hi an pommi a si. A kut a balmi kha a kholnak hmun an nei nawn lo. Asinan, kan Pathian cun, a hlan ih kan sualnak vek in in lehrul siang lo in, kan sualnak hmuahhmuah cu thinglamtah a phiat fai theh. Jesuh thisen in kan sualnak pawl cu in kholhfai sak theh ih nun thar te in thawh sal theinak (a fresh start) in pek a si (2 Kor 5:17).
Rundamnak hrangah $ 20 millions a cem
A zate ih hih suikhur lai tu pawl an runnak hrang ih a cemmi hi $ 20 millions a si. Company le acozah pi cun, an cem zet nan, sui khur laitu pawl in zianghman an cemmi a um lo. Lei par ih an hung thlen tikah, lei par in a rak hmuaktu President pa, Sabastian Pinera le mipi pawl kha kan lungawi tuk tiah lungawi thu an sim. Cuvial. Culawng an tuahmi a si.
Cuvek thiamthiam in, vancungram na kainak ding hrangah, Jesuh Khrih cun, a mai nunnak rori liam in a cem. Nang le kei ih cem dingmi zianghman a um lo. Pathian in Jesuh Khrih ih a nunnak a peknak ruangah, ka sualnak I ngaithiammi a si. Sualnak huham sung in I rundamnak a si ti na theih cun, Jesuh a lo runtu kha, I runtu le ka Bawipa tiah pom aw. Cumi lawng hi kan nih ih kan tuah dingmi um sun a si. “Sual ngaithiam ka si zo ih, na fanu le fapa ah I pom zo ruangah ka lungawi” ti mei aw. Cui Jesuh ih sual ngaithiamnak na zum ni le caan cun, thinlung hnangamnak cerhti nung na sung ih a luanni a si.
Tleunak kha nuam tete in an hmuh ter
Lei lung par ih an thlen hnu khal ah ni 69 sung ni hmu lo ih an um ruangah, tleunak an hmuh a si le, an mit in a tuar thei lo pang ding tiah, $ 400.00 man mikherh dum an kharh ter ih, an thlen vete in siizung ah a dam le dam lo tla an check ciamco ta. Ni li sung siizung ih an um hnu ah, inn ah an tlun ter sal. Curuangah, an lung a awi zet ih, Chili ram pacang tha hung si an tum cio ding ti ruahsannak ka nei.
Cuvek in, nang le kei khal, nuam tete in, tleunak kha kan mit in kan hmu sin ding ih, lungawinak lungput thawn, in runtu kan Pathian hrangah le a ram hrangah rintlak nucang, pacang tha si ding zuam sin uh si.
Thunetnak
1. Nang cu sualnak huham sung ih tangzomi na si. Nangmah te runhim aw thei na si nawn lo. Vancungram kai thei khal na si nawn lo.
2. Asinan, Pathian ih na fel ruangah le that ruangah si lo in, Amah cu duhdawtnak Pathian a si ruangah, a lo duh dawt hrimhrim ih, a fapa a run thlah.
3. A fapa in, na sualnak pawl hrangah a nunnak na hrang a liam. Curuangah, Pathian ih mithmuh ah sual ngaithiammi na si zo. Sual leiba kuan ding nei nawn lomi na si zo. A thar in na nunnak na thok thei zo.
4. Vanram na kainak ah, nang ih cem dingmi pakhat hman a um lo nan, Pathian in a cemmi cu a fapa Jesuh Khrih a si. Jesuh in kei na hrangah ka nunnak ka liam, nang teh ka hrangah ziang na pe ding tiah a lo sut. Maih nuam timi nun ah na nunnak na hmang lai ding maw? Khrih le Vangcung uknak na umnak kipah kim tertu ah so na nunnak le tikcu na hmang ding?
Hminsin: CNN ih thanmi an thuhla, zuk le video ih zoh duh pawl hrangah:
Click
