Thlawsuah Conak Dawh Hna

Pastor James Van Biak Cung

Abram nun ihsin thlawsuah conak le thlawsuah co dan pawl in sim. Abraham nunnak ihsin kan zir theimi mal lai kan run zoh hnik pei. Semtirnak 12 : 1-9 sung ihsin kan hmuh thei mi a um.Pathian in Abram kha thlawsuah pe ding in thu a tiamkam. Semtirnak 12: 1-3 sungah Pathian in " thlawsuah" timi tawngfang vawi ruk rori a sal. Cu lawng silo in Pathian inka lo pe ding tin thu a tiam bet. Tui ni zumtu kan zate hrang khalah a si ve thotho. Abram ih Pathian cu kan Pathian a si. Pathian in thlawsuah pek ding in tiam cio a si. A va lungawi um em!

1. Pathian thupek ngai ih thlun hi thlawsuah conak a si. (Sem. 12:1- 5).

Abram in khuitawk ram le khui hmunah a feh ding a thei cia lo. Pathian thu pek vek in a ngai ih a feh tawp.A nun pi tawp. Abram in ziang hman a el lo, phualamnak khal a tuah lo riai.Abram in a ngai lawng ngai lo in Pathian thupek a thlun khal a thlun cih. Ngai lawng ngai ih tuahsuak lo nun hi thlawsuah dawn lonak a si. Abram in BAWIPA ih fial vekin a tuah. Abram cu kum 75 a ti tikah BAWIPA ih fial vek in, Haran khua ihsin a pawk suak (12: 4). Pawk-suak nun neih hi thlawsuah conak dawh hna a si. Pathian in kan mah lam ihsin tuahter le phutmi a nei. A lak ih thlawsuah co tum cu a ngah lo. Phulo thlawsuah kan co tam tuk lam! "Pathian naih uh la, anih khalin a lo naih ve ding" ti mi vek khan. ( James 4:8)

2. Thlawsuah co dingah tanta mi, sunral mi neih a tul.( Sem.12: 1- 2)

Pathian in Abram kha na ram na miphun le na pa ih inn tanta aw a ti vek in a thlun, a tuahsuak. Pathian ih thlawsuah conak dingih in dawnkham tu thil pawl, Pathian duhlo zawng thil pawl, kan ui zet mi tisa lam thil pawl, kan mizia tha lo, thinlung thianghlim lo pawl hi thlawsuah kan dawn ding mi dawn kham tu pawl an si. .....thilrit tinkim le awl tei in awktu sual cu hlitthla in, kan hmaiih um mi tlan zuam awknak ah cun tuarfeinak thawn tlan uhsi ( Heb.12:1). Tawng dang in kan ti a sile cu thlawsuah kan conak ding ih dawnkhamtu thil pawl kha hlon in, in tawn hremtu kan sualnak thilrit kha tlansan in Pathian duhnak zohih hmailampan hi thlawsuah dawnnak a si.

3. Tihzah nak thawn Pathian biak ringring hi thlawsuah hmuifu conak a si.(Sem.12:7-8)

Abram thlawsuah a dawnnak pakhat ih ka theih mi cu khui tawk hmun,ram a va thlen kip ah a nung Pathian tihzahnak thawn a be ringring thei ruangah a si. Kan nih hman in neltu, in duhdaw-laina tu, in tihzah le upat tu, in pehtlai tu le pawlkawm ringring tu,kan thu in ngaitu le thlun tu cu an parah thatnak kan tuah sak duh si lo maw? Abram cun a thlennak, umnak i kipah a Pathian a be, thla a camringring.

BAWPA hrangah biaktheng a dawn ih BAWIPA cu a biak ti a si, a va uar um em! Duhdawtmi unau kan nih khal kan umnak kip ah, kan thlennak ram i kipah Abram ih Pathian, kan Pathian cu rinum zet in kan biak a si le cu van thlawsuah le lei thlawsuah in pe ve tengteng ding. Pathian ih thlawsuah dawn dan thaimtu le thlawsuah dawngtu si ding ah Pathian in in ko. Amen.