Ka No Tuk Ti Hlah: Jer 1:4-9

By San No Thuan

Jeremiah Kawhnak (Jer 1:4-9)

4 Bawipa in ka hnenah, 5“Na nu ih pum sungih ka lo seemter hlan ihsin ka lo thei zo ih na suah hlan ihsin miphun tampi hnenih profet si dingah ka lo hriil zo a si,” i ti.

6Cutikah kei in, “Maw Cungnungbik Bawipa, ṭong thiammi ka si lo; ka no tuk lai,” tiah ka ti.

7Asinain Bawipa in ka hnen ah, “Ka no tuk lai ti hlah; ka lo thlahnak miseenpi hnenah feh sawn awla sim dingih thu ka lo pek vekin an hnenah sim aw. 8Ṭih aw hlah, na hnen ah ka um ding ih ka lo hum ding. Keimah Bawipa in ka sim zo a si,” tiah i ti.

9Cule Bawipa cun a kut a hun sam ih ka hmur i tham hnuah, “Ngai aw, na ṭong dingmi ka thu pawl cu na kaa sungah ka ret zo. 10Tuih sunah miphun hmuahhmuah le siangpahrang ukmi ram tampi parah phawi theinak le bal theinak, siatsuah theinak le hlon theinak, sak theinak le din theinak thu ka lo pek a si,” tiah i ti.

Thuhmaihruai:

Minung hi kan mah le mah kan zohniam aw tuk theu. Caan tampi ah hiti in kan thinlung put a si theu: Kei in midang nun rem dingah ka ti theimi a um lo, ka tuah theimi a um lo. Ka fim deuh tikah, ka thiam deuh tikah, ka tuah lai ding tiah kan ti theu. Hi vek thinlung kan neih tikah, kan kiangkap ih kan rualpi le unau pawl hi Pathian in kanmai nunnak hmang in an nunnak a thleng/rem thei timi khi kan ruat lo theu. Kan sungah mi dang nun rem theinak huham cahnak neitu Thlarua Thianghlim a um ti kan hngilh theu (1 Cor 6:19). You can transform the lives of others.

Jeremiah khal kha Pathian in BC 650 hrawngah a rak ko. A kum note in a rak ko. Cutikah, Jeremiah in ka no tuk lai tiah a sawn (Jer 1:6). Asinan, Pathian in, ka no tuk lai ti hlah (Jer 1:7) ziangah tile:

1. 1. Na hrangah tumtahmi ka nei. Cumi tumtahnak thawn ka lo kawhmi na si tiah a ti. Cucu a thusimtu Profet si ding hi a si. A lo hriltu cu keimah ka si tiah a ti (Jer 1:5). Na suah hlan in ka lo thei. Ka lo hril zo tiah in ti.

2. 2. Ka lo um pi ringring ding ih ka lo hum ding (Jer 1:8). Na tong dingmi khal na kaa sungah ka ret zo a ti bet (Jer 1:9).

3. 3. Pathian ih cahnak huham in a cangvaitu na si ding a ti (Jer 1:10). Sak theinak le bal theinak thu ka lo pek a si. Jeremiah, na cahnak ring in na cangvai ding a ti lo. Bawipai cahnak le thilti theinak cu Jeremiah ih cahnak hram (background) a si.

Curuangah, Bawipa in Jeremiah tihhlah, na thanau hlah, ka no tuk ti khal in ti hlah tiah a tinak a si.

Kan nih khal tuisunah, Pathian in, “Ka No Tuk” tiah in ti ding hi a duhmi a si lo. Kan santlaih lonak kha phuahlam hawl in ttihhrut ding kan si lo. Ziangah tile,

1. 1. Bawipa in a tumtahnak thawn kan suah hlan in ko. Cui a tumtahnak cu Jesuh Khrih bang ih nunnak neitu dingah a si (Rom 8:29). In ko tu cu Amah Pathian a si. Midang khal cu bang tuk ih nung ding in, hruaitu dingah a lo ko (Matt 28:18-20). … John 15:16 … nan mah in in hril hmaisa lo. Ka lo hril hmaisa.

2. 2. Jesuh in san a cem lai hlan lo ka lo umpi ding tiah thu in tiam.

· Mtt 18:18 Jesuh cun a pan hai ih an hnenah, “Lei le vanih thuneihnak hmuahhmuah cu ka hnenah pek a si zo. 19Curuangah feh uhla miphun hmuahhmuah ka dungthluntu va siter uh; Pa le Fapa le Thiang Thlarau hmin in baptisma va pe uh.

· Mtt 5:4 Ninghang lungsia pawl cu mi thluasuak an si; Ziangahtile Pathian in a hneem hai ding. Hi tawk ah an ninghannak kha thluasuah an donnak a si lo. Pathian ih umpitnak le hnemnak kha thluasuah an donnak a si sawn.

3. 3. an maih cahnak si lo in, Pathian ih huham thilti theinak ih ttanpi ringringmi kan si. Jesuh in, “Cule ka thupekmi hmuahhmuah thlun dingin va zirh uh. Hngilh hlah uh, san a cem lai hlanlo nan hnenah ka um ringring ding,” tiah a ti. (Mtt 28:20). Pathian ih tumtahmi hrang ih na feh a si ahcun, Pathian ih huham in na thiltuahmi cu a tlamtlin ter ding a si.

Curuangah, ka no tuk ti in, midang kha Pathian ih duhmi lamzin ah hruai tum lo in, um pang hlah.

Ka nunnak i thlengtu le i remtu pawl ih thuhla malte lo ruah ka duh. Thlacam ka paih lo zet lai caan ah, thlacam i rak sawm ringringtu hi Saya Henry Pum Kai Thang le Sayama Nu Kil an rak si. An nih hi keimaih rualpi an sinan, thlacam in sawm tikah, ka rak el ringring. Asinan, thlacam sawm ding an rak bang dah lo. A neta bik cu a el ding ka hmai an song tuk thlang ih, anmah hmaisong ah ni khat cu thla ka va cam. Cutin keimahte thlacam a thawtnak ka theih tikah, an maih sawm tul nawn lo in thla ka cam ih, midang pawl khal sawmtu ah ka rung cang sal.

Cun, tlawng ca zir lamah, tha i rak petu hi kan sentet lai in ka rual tha bik Van Thawng Lian (Alian/Lily Pa) a si. Vei khat cu Mandalay a tlawngkainak in a hung tlungih, cauk pakhat i sum. I summi cauk hmin: "Yinyaw Hnget" timi mirang cauk kha, kawl cangantu ih a lehmi a si. Cui cauk sung ahcun, ngathur pakhat cu ngathur daan a phunphun a zir ciamco ih, a hmul khal a kolh theh. Mihrek khat in an zawmtai zet ih, hi hmulsia nei tiah an ti ih, an karlak khal in an dawi. Asinan, anih cun thasia lo te in, nga thur daan a phunphun a zir ciamco thotho ih, neta tikah, a thiam tuk thlang ih, ruah a sur khal ah, ni a sat caan khal ah le, ziangvek caan khal ah midang in ngasa ei ding an neih nawn lo lai khalah anih cun, a duhnak hmun ah, nga a thurih a ei ngah. Curuangah, a hnen ah ngathur daan zir dingah, ngathur tampi in an pan sal. Cumi thuanthu in, ka nun i ciah tuk ih, tuisun ni tiang ka thazaang laknak le fimnak a sang bik tiang zir thei ding ih thazaang i petu ah a cang.

Hih thu pawl ka ruah sal tikah, ka rualpi an si ko nan, ka nunnak an rak rem thei ih, lamzin hman ah in rak hruai thei zia ka hmu. Anmah in an thei aw lo men ding nan, thil tha lamah thanau lo te in, an tuah dingmi ral tha zet ih an rak tuah ruangah, tuisun ni ah kei cu lamzin hman ah ka feh ve ngah a si. Curuangah, cumi khami ka hung si tik le lawng midang nunnak ka rem thei ding tiah ti hlah. Tuisun ni ah, na kiangah, rem dingmi rualpi, unau Pathian in a lo ret. Ral tha zet in, Bawipa rinsan aw la, thil tha lam ah na hruai thei tawk hruai aw. Cu ti ih na tuahmi te kha, Pathian in thluasuah a pe dingih, na ruah ban lo pi in, cuih na tuahmi te in an nunnak a rem ter ding a si. Midang nunnak na remter thei so khaw ti hngilh hlah. You can transform/make a difference to the lives of others.

Thunetnak:

Curuangah, ka no tuk ti hrim hrim nawn hlah. Pathian in a lo hmang thei. Na nonak kha thil tumpi tuah theinak ding ih a lo dawntu si hrimhrim hlah seh. Ziang ruangah tile:

1. 1. Pathian in tumtahnak thawn a lo kawhmi na si. A lo ko tu zo a si ti hngilh hlah.

2. 2. Pathian in a lo umpi ringring.

3. 3. Pathian ih huham cahnak ih ttanpi ringringmi na si.