Suahlannak thu le Christian Nun

By.. Pastor Tom Fry

Suahlannak 12:1-13

Lantak puai thu:

Thukham hlun hi Jesuh ih in tuahsakmi a langh tertu a si. Lantak puai a suahnak thu khal ah, Israel mi pawl Pharoah ih sal sung in Pathian a suah ter duh tikah, tuu thisen kha an inn tunglam le phei lam ah a thuh ter. Cui thisen umnak inn hmuahhmuah cu thihnak in a kaan theh a si. Thihnak in zianghman a ti thei lo.

Jesuh in misual nang le kei luat theinak ding hrangah a thisen Calvary tlaang par ah a luang ih sualngaithiamnak le rundamnak hna a theh zo a si. Cumi Jesuh ih thisen kha, sual ngaithiamnak ding hrangah a rinsantu cu thihnak in in ti thei lo. Kan kiang ahcun a feh ding nan in ti thei lo ding.

Kan taksa a thih ih kan mit kan hun siin vete in, Pathian hmaika ahcun, mitmen hram kan thok zo a si. Curuangah, thihnak in zianghman kan par ah a ti thei lo.

Zumtu tampi in cui thuthangtha kan thei ih kan zum hnu ah kan tlu bah thei lai. Sualnak kan tuah thei lai. Cumi sualnak kan neh theinak dingah ziang kan tuah ding?

Suahlannak sungah, Pathian in tuu thisen lawng an innsangka kap ah hnuh a fial lo. A dang pakhat a fialmi cu “Thilnu” (yeast) tel lomi sang nan ei pei tiah a ti. Thilnu hi pawnghmuk suannak ah an hmang theu. Cumi cun, sanghlom vate kha tumpi ah a karh tertu a nungmi thil pakhat a si.

Sualnak le thilnu ih an hnatuan daan hi a bang aw zet. Sualnak khal hi daithlang in kan um ih, kan lungsung a sir te ih a rat tikah, kan dawi lo le, a uknak kha a karh ter sin dingih, na fimnak, mawinak, cahnak, le thazaang, na thinnomnak le hnangamnak pawl khal a zate in a lo laksak theh ding a si.

Vei khat ah pafa te hram lak lamzin ah an feh. Thingkung faate pakhat lamzin ah a kheu ih a pa in, ka fa khami kha phawi aw tiah a ti ih, a va cun, ol zet in a phawi ih a hlon. An feh bet ih, thingkung faate tum deuhmi kha lam zin ah a kheu lala ih a pa in a phawi ter sal. A fapa cun, a tha nasa zet in a suah ih, a phawi ih a hlon. A tha a suah ciamco a tul thlang. An feh sin ih, thingkung tum nawn pi kha lam zin ah a kheu ih a pa in phawi hlo sal a fial. A fapa cun, a tha a suah rero nan, a phawi thei nawn lo. Cuvek in, sualnak khal a faatet lai ihsin kan phawi hlo lo a si le, a tum deuhdeuh le ol ai te in hlon a ol nawn lo ding.

Curuangah, kan nunnak le thinlung sungah sualnak in hram a bun lonak ding hrangah ziang kan tuah ding?

1. Bawipaih hnen ah thlacam in, na duh lo zawng ka tuah pangmi a um maw. A um le I sim aw tiah, dil uh si (Psalm 139:23).

2. A um a si ahcun, Jesuh ih thinglamtah thihnak ah feh in, Bawipa I ngaithiam hram aw tiah tiah ti uh si. Cuti ih ngaithiam na dil a si ahcun, Pathian in, cui thilnu bang ih a karh theimi na sualnak cu karh thei nawn lo ding in, a lo ngaihtiam ding ih, a lo hlon sak ding (1 John 1:9).

3. Bible ca siarnak le Pathian ih aw ngainak a simi thlacamnak thawn thazaang la ringring aw.