Zumtu Kan Than Thei Lonak San Thu Panga

Stephen Tha Nei Fai

"Tucun zirhtu saya si hman nan cuu zo nan Pathian thu a hramthok ihsin zirh nan tul lai. Rawlngai (rawlhak) ei nan cuu zonan cawhnawi (rawlneem) nan ei lai"(Hebru 5:12)

Nu le pa in fa thang thei lo, kuhkheh emem  neih cu an thin a kham ringring. Thlarau lam kan Pa, Pathian khalin zumtu nun thangthei lo fa in neih hi a thin kham tertu kan si. Hebru cangantu ih sim bangin piangtharnak rei emem, Pathian thu theihnak khuahlanpi si zo si ih saya tuan hman cu zo ih  ABC ih thawhpi tul zumtu kan tam tuk. Zianghruangah kan nun a thang thei lo? Ziangruangah kan cak thei lo, ziangruangah kan pitling thei lo ti pawl theih ngah kan tum hnik pei.

(1) Ngah lam lawng kan beisei (Thuf.30:15)

     Zumtu tampi cu kawhhran hrang, Fellowship hrang le  Pathian hrangah theihtawk ten kan pe pei ti hnakin ziangzat sawn in bawm ding ti lawnglawng kan beisei. Dr.John Ford in,"Peksuah tum lo ih ngah lam lawnglawng beisei zumtu cu ziangtik hmanah a nun a pitling dah lo ding,"a ti. David cun,"Ka

parih a thatnak ruangah Bawipa cu ziangso ka peek ve ding,"ati (Saam 116:12).

Pathian in zumtu cu pekcop le bomcop mi silo in bawmtu le pe suaktu dingah in duh. Peknak ih kan cangvaih le kan nun a thang cak. Abraham ih zumnak thang tertu pakhat cu a fapa Isak Moriah tlangih a peknak a si. Zun le ek thawhsuak tha thei lo nauhak cu an piimkirh ringring. Peksuak nun nei lo zumtu khal a piimkirh (thangthei lo) in a um ringring ding. Caangvat cun thisen zuh lawnglawng a duhih midang tawm le peek ve a tum lo. Caangvat vek cu si hram hlah uh si.

(2) Kan rin-aw tawk lotuk (Exo.3:11)

      Pathian in Moses a kawh lai ah tum 4 tiang rori a el. Keivek men cu Israel hruaitu dingah ka tlak lo, a ti ringring. kan tlin le famkim ruangah Pathian in a hnatuan in fial lo. In fialtu a famkim ruangah in fial a si sawn. In fial nan in bawmtu, in cak tertu le in hlawhtling tertu cu a mah thotho a si.

Oswald Sander in,"Keimah lam ka zoh awk le Pathian hnatuan ka ngam thei lo, asinan Pathian lam ka zohle ka ral a tha ih ka tha a tho,"a ti. Peter kha Jesuh a zoh ringring sungah cun tidai parah a feh mai nan a mah le mah le a kiangkap a zoh vete'n ti sungah a pil vurvo.

Pathian cun kei cu ka farah tuk, ka tawntai tuk, ka aa tuk ti hnakin ka Pathian a cak, a lian, ziangkim a ti thei,a mah rinsan in ka tuan ding, ka feh ding, ka pe ding,,,,,ti ngamtu pawl a hmang ringring. David in Goliath a do zikah ka cak tawk paamih ka neh ko ding, a ti lo. Israel Pathian a cak tuk ih a mai hminin ka do ding, a ti ih nehnak sunglawi a co.

(3) Kan sim bangin kan tuah lo (Mtt.23:3)

      Zumtu tampi kan than thei lonak cu kan theihmi bangin kan tuah lo, kan sim bangin kan nung lo. Samuel Chadwick in,"Zumtu mai theihmi le tongsuakmi vekih tuah suak dah lo cu Pathian bum men a si," a ti. Jesuh in Farasi pawl a huat emem nak san cu an sim le an rel bangin zianghman an tuah suak dah lo. Midang lawnglawng pekter le tuahter an tum. Hnakphek cu kan ei le a thaknak kan thei. Pathian hna cu kan tuansuak le peksuak le a thlawsuah kan co taktakih a rinumnak kan theifiang ngah.

(4) Hruaitu kan ring tuk (Luka 22:46)

      Gethsmane hmuan ih Jesuh thla a cam rero lai ah a dungthluntu pawl cu daiziar an rak itthat men. Jesuh thlacam an ring men a bang. Puaihmun ih sa kan ei tikah rualpi ha le kaa kan ring dah lo. Mai kaa le ha cio in kan mai

hluaihlo ciamco. Kan ramah Crusade & Camping a tam zet nan duhvekin kan that phah thei lo ih kan sor ngaingai thei lo. Ziangruanghahtile zirhtu le hruaitu pawlih Bible theihnak, siarnak le thlacamnak kan ring men. Saam cangantu in Pathian thatnak cu nanmah ciarin tep cio uh, in ti (Saam 34:8).

Zo si rualpi nupi thit ringih nupi thi lo um?, zo si ka rualpa ca a thiam paam, kei ih tlawngkai ve a tul lo ti dah?,  zo si rualpi ti kholh ringih fai mai um kel? Zo si rualpi zu in ringih rak rii mai um? Ziangkim ah midang rin mai theih a si lo. Zumtu tampi cu nu le pai thlacam sak ring menih thlacam daithlang, unau ih khawm ringih khawm zee kan tam tuk. Biakin ih na khawm le  nangmai kaa rori'n Pathian thangthat aw, thlacam aw, nangmai kutke thawn laam aw, midang ring nawn hlah. Cule nangmah rori in Pathian thatnak le duhnunnak na hmu ngah, na tep ngah sinsin ding.

(5) Midang kan buaipi tuk (John 21:21-23)

      Mihrek cu thuthangtha simtu in paisa duhtuk le duhham tuk an sim le khawdang an tangih,"Kan kotka pa a khawm maw aw! a mah in thei ngah tengteng sehla a va tha em!" an ti. Mai hrangih thuthangtha ngai um lem lo. Cuhnakin sermon kan ngai le ziang si ka nun thiin awk ding ka neih? Ka nun can remawk tul um? Pek ding ka pe zo maw? sim ding teh ka sim maw? Bom tul pawl teh Bible ih in sim bangin ka bawm zo maw? Bible vekin ka nung maw? Pathian teh ka parah a lungawi pei maw? tiah mah le mah buaipi awk theh hnu in midang buaipi nugnla kan hlawk zet ding.

Mai fapa sual hnakih hmuanthlang tei fanu leer helhkam, mai nupi zunthlum hnakih kotka pai TB khuhkhuh buaipi kan tam zet. Bible cun, "Zumnak ah ka nung maw? tiah nan mah le nan mah cekaw ringring uh,"in ti (II Kor.13:5).

J. wilbur Chapman cu,"Zum lo tu pawl an it thah lai ah zumtu cu kan tho ding, an thawh le kan feh ding, an feh le kan tlaan ding, an tlaan le a zuan in kan zuang ding, Bawipa'i zarah" a ti.

Kan than theilonak san ruat tha in Pathian lamah hmainawr sinsin uh si. Ziangkim ah zum lotu pawlih tluk ban lo in teima uh si, tuan uh si, pe uh si. A nung Pathian neitu le betu kan si hi. Pathian in siartu zate'n thlarau, thinlung le taksa ah thlawsuah hmuifu lo vuur cio hram seh law.