November 4, 2012 ah New Bern ah Chin Community Baptist Church, New Burn an ding ih ap sak ding in in sawm. Cu tawkah, Pu Phun Kar Thang, Pu Lal Nei Mang, Pu Khuang Lian Mang le Pu Biak Kim Lian thawn kan feh. Zarhte zaan khawm theh in thu in sut ciamco. In thusuhmi lak ah a tha zet ka timi pakhat cu, "Biaknak le Politics (Nainganzii) hi kom a tha maw?" tiah in sut. Hitin ka let sal.
Politics timi cu phun hnih in a um. A pakhatnak cu Party Politics a si. Cumi pawl ih tumtahmi cu ziangtin kan party pawl in midang ih party kha kan neh thei ding timi an zuam. Curuangah, midang ih saantlaih lonak kha an hawl ih an do. Thuneihnak cuh aw in an buai. Cuvek politics ah Biaknak cu tel ding a si hrimhrim lo. Kan tel pangah cun, kan kawhhran sungah party in kan um ciamco ding ih kawhhran, Jesuh Khrih ukmi vanram thar, hi a nuam nawn lo ding ih tthenthek awknak a um ding.
A pahnihnak politics cu ram damnak le thansonak thu tawlrel khi a si. "Ziangti in siizung a tha thei ding? Ziangti in tlawng a tha thei ding? Ziangti in mipi pawl ziaza thate in an nung thei ding? Ziangti in kan innsang, kan veng, kan kawhhran, kan khua, kan pengpi le kan ram a thangso thei ding?" tivek pawl ngaituah, tawlrel khi politics thiamthiam a si. Mirang in a tanglam ah hitin Politics timi tongfang a simfiang.
Politics (from Greek politikos "of, for, or relating to citizens") as a term is generally applied to the art or science of running governmental or state affairs, including behavior within civil governments, but also applies to institutions, fields, and special interest groups such as the corporate, academic, and religious segments of society. Itconsists of "social relations involving authority or power" and to the methods and tactics used to formulate and apply policy.
Politics timi cu Greek tong, Politikos timi a ra ih, a sullam cu ram mipi thawn pehpar awmi thu hmuahmuah khi a si. Cumi sungah, rampi uknak hrang ih tulmi fimthiamnak tlawng a phunphun, ziaza lam, biaknak lam, kaihhruaiawknak daan lam pawl hmuahhmuah a telmi a si. A tawi zawng cun, Politics timi cu ram mipi damnak ding hrang ih tawlrelmi, tuahmi hmuahhmuah khi a si. Curuangah, mipi damnak le thansonak cu Kawhhran in tuanvo tumpi a nei ve.
Ziangah kawhhran in tuanvo a nei ve? Jesuh leilung tlun ih a taksa pum thawn a um lai ah ziang a tuah? Midam lo pawl a hmuh tikah, damnak a pek. Mitcaw, ka zeng, miphar le mithi pawl tiang in damnak an ngah. Bawi Jesuh hman in a tuahmi kha kannih a dungthluntu pawl in pehzom in kan tuan lo ding maw? Khavek cu Pathian hnatuan a si lo tiah kan ti ding maw? Pathian fapa hman in a tuanmi cu Pathian hnatuan kan ti lo ahcun, zo ih hnatuan so, Pathian ih a tuanmi a si tiah kan ti hrih ding? Curuangah, Biaknak lam in harhdamnak lam hi kan tuan ding hrimhrim a si. Cucu ram damnak (Politics) a si.
Cun, Bawi Jesuh in kum 30 sung a pa, Joseph in an nauhak lai in a thihsan tikah, a nu le a nau le pawl a cawm. Lettama a tuan ih inn a sak. A hung upa ih kumthum sung rori mipi pawl kha Pathian uknak cu ziangvek a si timi a zirh. A sim, a phuang. Kaihhruaiawk daan khal a zirh. Hriamhrei hmang lo in duhdawtnak thawn uktu Bawi pawl le Rom cozah khal sim ding a si zia pawl in sim. Himi hi fimnak le thiamnak lam khal Bawi Jesuh in tha a pe timi a fiang a si. Pathian thu zirnak le simnak siseh, kutzung thiamnak le fimnak dangdang siseh, a dik lomi kaihhruaiawk daan pawl kha dikte ih hruai daan khal siseh in zirh. Jesuh ih a tuahmi le mi a hruai daan vek hi kannih a sersiammi pawl cun, kan hawl rero ih, kan zir rero hman ah theih cawk a si lo. Curuangah, fimnak thiamnak nei thei ding ih kan mipi pawl hruaihi ramdamnak (Politics) a si. Cucu kawhhran in tuanvo a nei ve. Curuangah, Bible tlawng an tuah. Cun, fimthiamnak tlawng dang khal tha te ih ding thei ding in thazaang a pek thiam a tul.
No comments:
Post a Comment