CCOC Ka Hmuh Daan

By Rev. Dr. Stephen Hre Kio

Hitiin thubuai deuh a um ruangah kim deuh in CCOC ka hmuh dan ka ngan ding.

Ziangtin a thok?

Kum 1968 hrawng ihsin ZBC upa pawl thawn rel tahrat
in "Chins for Christ" tiah hmin kan pek ih Gospel team hmun tampi ah Pastor
le Upa pawl kan feh. Falam peng tla tamzet kan tlawng. Hualngo tlang
tiangin kan thleng. Group khat ah Pastor 8-9 hrawng kan rak si.



Kum 12 hnu ah ZBC GS a simi Rev. Hrang Tin Khum le ZBC upa tampi
hohatnak thawn CCOC (Chins for Christ in One Century) timi thok a si.
Tum deuh le kau deuh ih tuahmi a si. An thok ngaingai cu 1983 ah a si
ih kum 16 sung an tuan. Kum 1999 ah an cawl. Kan cawl ding, tiin ZBC
ih a relcat hmun cu Hakha ah a si; keimah khal ka tel. (Falam ah a si
lo.) Missionary pawl Laitlang an thlennak kum 100 puai caan ah a si.



CCOC program in Palai 1200 a thlah; Chinmi in thazaang an suah, sumsaw
an pek ih ramdang bomnak laak lo tein Kawl tangka in ting 700 (700
lakhs) an thawh.
Khristian si dah lomi Chinmi 22,000 Khristian an cang. Laitlang le
Kawlram lawng hman ah si loin Leilung pumpi ah Baptist Kawhhran leiram
ahcun CCOC hi mi tampi theih in a thang ngaingai. Pathian hnenah
lungawinak tampi kan nei. Chinmi kan zatein Pathian zumtu kan si ding
a si hi, tin kan rak zum.
CCOC cawlhter a si hnu kum 12 hnu ih thil umdan kan cuan tikah Chinmi
kan zatein Pathian kan awi lo; Chinmi thawngzakhat (100,000) hrawng
Pathian awi lo an um, ti kan thei fiang.

ZBC BM Meeting: Zokhua ah March 22, 2012. Hi meeting ah ZBC upa
sawmnak thawn ka tel ve. An meeting ah thucahnak nei ding in in fial
ih ka simmi tampi lakah CCOC thok sal sehla a tha ding; Chinmi kan
zatein Khristian kan si ding hi a thupi nasa; Pathian hrangah a tha ih
Chinmi hrang khal ah a tha, tin ka sim.

ZBC BM in CCOC thu ah
thurelnak a tuah lo; agenda ih ummi a si lo; asi nain an GS in na timi
cu ruah ding thil tha a si; ramdang ih um Chinmi in tawlrel uhla, i
ti. Cumi cu ka thin ah a taang ringring. Kan tawlrel thei ko lo ding
maw? tin ka ruat.



Thlakhat hnuah ZBC GS ca ka kuat ih CCOC second round thu cu ZBC
ruahnak in sim thei cila, officially in a tha ding, ka ti tikah thil
tha a si; ramleng ih um Chinmi in rak tawlrel uh, ti thotho a si.



USA ih um Chinmi Kawhhran hnenah ka sim: April thla cemlam ah 2012 ah USA
kan thleng ih CCOC (second round) tuah sisehla ti biakinn ah ka sim.
Atlanta ih um CCBC ihsin ka thok. Falam Kawhhran 4 ah ka sim zo. Hakha
Kawhhran 4 ah ka sim zo. CBA civuipi ah Indianapolis ah ka sim ih, CBC
civuipi Indianapolis ah ka sim.



CCOC (second round) kan thoksal pei tiah ca cahmai 5 ka ngan ih hi thu
hi rak ruat cia hnik uh, tin Falam Kawhhran le Tedim Kawhhran le Siyin
Kawhhran hnenah Falam ttong in ka ngan ih, Hakha ttong in Hakha
Kawhhran, Matu Kawhhran, Zotung Kawhhran le Mara Kawhhran hotu pawl
hnenah ka kuat. Nan Kawhhran le nan
fellowship ah rak rel ciar uhla nan relcia mi kha hmailam ah kan
zatein kan tong-aw ding ih kan thu kan fuun ding, ka ti hai.



Cuti ka timi - ca ka kuatmi Kawhhran pawl lakah - CBC USA in zamrang zetin
action an lak ih ca ka ngan hnu thlakhat ah CBC USA BM meeting (kuzale
400) in CCOC (second round) kan thok sal pei, tiah an relcat.
Committee an phuan ih Dallas meeting an tuah. Kei tla in sawm. In
sawmnak cu CCOC thuhla a aupitu le a simreltu bik ka si ruangah, le
Indiana Chin Baptist Church ih Pastor ka si ruangah a si bik. Chairman
in tuansak aw in ti. CBC hrang lawngah chairman si dingah cun a rem lo
ding; Chinmi zate hnatuannak ah cun ka tel duh, ka ti. Asinain a
hramthok
ahcun in hruai ko aw; a tul le kan thleng leh ding, an ti ruangah, le
a si lo zawng tla in an fehpi pang ding, ti phan ruang tla ah,
Chairman tuan ding in ka lung a kim.

Cuih tlun ah cuih CBC Committee in Chinmi unau dang kan sawm a tul,
tihi kan tanpi zetmi a si. A hrek cun an phur tukah kanmah lawng kan
tuan mai ding, titu tla
an um. Asinain mi tam sawn duhnak a si lo. Chinmi unau dang sawm
dingah thinlung an nei. Sawm siseh, tiah ka ruahmi a si. Sawmnak ca
CBCUSA EM in a kuat; Chinmi unau dang hotu pawl in nan ngah hrih
lo asile a rei hlan ah a thleng ding ka zum.



Mihrek in "Hakha lam politic a si" nan ti. Kei cun a si lo, ka ti. Dallas ah
CCOC tuah dingah meeting ni 3 sungah "politic" a si, ti theinak ka hmu
lo. Hotu pakhat a simi Dr. Cung Lian Hup cun, "CCOC ah politic a um
lo. Politic cu a zuam khal kan zuam lo" a ti. A timi hi a dik a si.
Kei khal politic cu kan zuam pawl a si lo! Pathian hrangah hnatuan cu
ka paih!



CBC USA in thu an rel ih an saduhthah an langter. An thurelcatnak nan
hmu. Kan duh lomi tampi a um ding. Himi hi "fix structure" a si hrimhrim lo;
flexible a si. CBC upa pawl thawn kan rel tikah flexible structure a
si, tihi an pommi a si ko. Saya San No Thuan tla in i sut ih flexible
a si ding a si ko, tiah ka sim. Simduhmi cu: CBC USA CCOC committee ih
relmi cekci in hmailam ah kan feh hrimhrim ding tinak a si lo. Thleng
a theih. An saduhthah a si. Chinmi unau dang in nan rel ih nan
saduhthah ih nan relmi kha rak keng ciar uhla Kansas City ah kan
ruattlang pei, ti lungput in kan fehpi mi a si.

Mihrek in Saya Hre Kio in Chinmi kan zate in sawm loih CBCUSA hnen
lawngih a feh ruangah thu a buai; a hramtokte in kan zatein in sawm
sehla meeting ah ziang hmuahhmuah reltlang sehla a buai lo ding, nan
ti. Ka thu lehnak cu: Kei in Kawhhran le fellowship bupi ih ummi ka
sawm thei lo; thuneitu ka si lo; thuneihnak zianghman ka nei lo. Nan
rel thei lo ding maw, nan ruat thei lo maw, tiih forh theitu lawng ka
si. Ka ti thei lo thu le thuneitu ka si lo zia ka lo sim hai ding:



(1) Kum 2005 ah USA ih um Chinmi Pastor pawl hmunkhatte ah meeting
tuah sehla, civui tla tuahtlang thei dingin rel sehla ti tumtahnak
thawn Chinmi Pastor 40 ka sawm hai. Washington DC ah Chin Baptist
Mission Church ih intek tuannak thawn kan tuah. Asinain meeting kaitu
cu - sawmmi Pastor 40 sungah - 7 lawng an si: Falam in pakhat, Tedim
in pakhat, Hakha in 5 an kai. Meeting kan tuah thei lo. Kan hlawhsam a
si. Ka ti theimi a malte a si, ti ka fiang.



(2) CBANA upa pawl hnenah, kan dungkum ah, Mizoram ah Attorney Matt
Wolf le U Zo Tum Hmung, le mirang 2 an feh ding; Mizoram ih um Chinmi
pawl harsatnak va zoh ding le USA cozah hnenih report ngan ding in feh
an tum. CBA EC pawl in hi thu hi rel sehla, thazaang peknak tla
langter sehla, tin CBA EC meeting agenda ih ret ding in ka sim hai nain an
ret lo. Hotu pawl in EC upa hrekkhat an lung a kim lo, ti vial in a cem.

Mizoram an feh ngaingai tikah Chinmi tampi an tong ih an thuhla an sut
ih report thazet an ngan. Cumi cu USA cozah in thupi zetin an lak.
Himi khalah Falam mi pawl Mizoram ah an tong lo, anmah Hakha lammi
lawng an tong, ti thu a suak lala. U Zo Tum Hmung email ka kuat ih
Mizoram ah zosi nan tonmi? Falam lam bu le upa
tong ding ti ka lo simmi pawl nan tong lo maw? ti ka suh tikah Falam
lam a bu a bu in a ummi bu 4-5 an tong thu in sim. Bulpak an tong lo;
bu ih ummi pawl an tong. Email in cuih in lehnak email cu CBANA upa
tampi hnenah ka kuat.



(3) CCOC second round thu ka sim hi Falam milesa Kawhhran hnen ah ka
sim hmaisa. Ca tla - CCOC thuhla thuhmaihruai si dingah hi thuhla nan
rak ruah cia theinak dingah - cahmai 5 ka ngan ih Falam hotu CBAEC
pawl hnenah ka kuat. Asinain CBANA civuipi ttum ah Indianapolis ah
CCOC thu kan rel lo. Agenda ah a um lo. Cuih hnu ah CBANA Ministers
Council kan nei, Frederick, MD ah. Hih meeting ahhin CCOC thuhla malte
tal rel sehla, tiah ka dil nain caan a um lo, tin a cem. Cuih hnu lala
ah CBANA EC meeting ah, Atlanta ah, CCOC thuhla hi rel sehla tiah upa
pawl kan dil lala. Agenda ka zoh tikah CCOC thu a um lo; Mission thu
lawng a um ih CCOC hi thupi ah a lang lo. Keimah in zaangfah ka dil
hai ruangah Atlanta meeting ah nazi pakhat le hrek sung kan rel. Cuih
sungah CCOC hi ziangtinso kan thok ding, ziangsi kan thurelcatmi a um
thei ding, kan saduhthah ahcun hitin sisehla, tiih rel hnakin Kansas
City ah CBCUSA tuah dingmi meeting ah kan tel pei maw tel lo, ti sawn
hi tampi kan rel. CCOC hi Hakha lam "politic" a si ti ih ruahnak a um
thotho. Politic mit ih zoh ahcun ziangkhal hi politic a tel thluh in
hmuh a si hi, tin ka ruat.



Kei in CBANA sung um Kawhhran meeting nei dingin kan sawm thei lo, ti
cu ka fiang. Agenda hman ah item pakhat te hman ka ret thei lo. Ka ti
theimi a um lo. Cule CCOC hnatuannak ahhin CBANA in za ah za luphum ih
hnatuan ding a tum lo, a si hi
tihi ka fiang sinsin.



ZBC GS ih cakuat: Saya Sa Tin Lal hnen ah ZBC GS in tawite ca a kuatmi
siar le zoh in U Phun Kar Thang in, CCOC thu ah ZBC ih lungkimnak a um
lo ruangah kannih CBA kuzale cu Kansas City ah kan feh lo ding, tin a
ngan.

Himi hi kei cun: CBANA delegate pathum kan lo hrilmi nan feh ah a tha,
tin ka ruat. Ziangahtile ZBC GS canganmi ah "CCOC hnatuannak hi kan lo
pompi thei lo, kan lo theihpi thei lo ih thluasuah kan lo pe lo" tinak
tongkam ka hmuh lo.



ZBC GS Rev. Dennis Ngun Thawng Mang cakuat - keimah le Rev. Duh Kam
hnen ih - sau deuh le kim deuh ih a nganmi ka siar tikah ZBC
lungkimlonak a um in ka hmu lo. Cahmai pahnih a nganmi sungah a
tawitete in point 3 - a thupi bik - ka ngan ding:



"To: Rev. Dr. S. Hre Kio,
Rev. Dr. C. Duh Kam (EM, CBC USA),


1. "CCOC second round timi min bunh i Chin ram chungah Mission
riantuan i tinhmi cu a tha tuk i kan i lawm tuk nain a min bunh ning
kong le a riantuan ning kongah (another one century maw, zeitin
tbk..?) ZBC he i ceih hmasa ding."


2. "Hi riantuannak kongah CBCUSA nih maw Committee a ser dih cang,
asilo ah ZBC he i ceih te ding dah a si lai, through ZBC in tuan ding
dah a si lai, ti fiang deuh ngai a hau... kan i pehtlaihnak hmun ZBC
in riantuan kho hna sehlaw a tha bik lai ti ruahnak zong a um.


3. "Rian tha tuk a si caah a thokning palhlo ding le policy he i kalh
lo te i tuan khawhnak ding caah siseh, midang zong zalong te i an i
tel khawhnak ding caah siseh, a biapi tukmi a si. Zeicah tiah Chinmi
kan i funtom biknak ZBC chungah lungthin i thennak um lo hramseh, ti
saduhthah a si.

"Hi kong ah October 24-25, 2012 ni i tuahmi a voi 92nak ZBC-EC nih cun
ZBC-OC le ramleng i tuanvo a ngeitu hna i ton i ceihmaimi tu kha a voi
21nd ZBC-Triennial (Mar 21-24, 2012) ah chuahpi in fehter siseh ti a
si.



Dennis Ngun Thawng Mang


General Secretary
ZBC, Falam."



ZBC GS canganmi ka siar tikah an lungkimlonak hnakin an lungkimnak a
si sawn, ti ka ruat. CCOC thok ding cu (ziangvek hmin a va leh
khalle) an pom, tin a lang. Ziangvek in kan tuan ding ti cu rel lai
ding, ti ruahnak an nei. (They accept the basic concept of starting
CCOC; there may bedifferences on how to operate the functions of CCOC
in the fields, ti ding a si.) Cutin sisehla, khatin sisehla, timi an
neih
asile neih ding a si ko. Cumi asisi, ZBC OC le USA lam ih tuanvo neitu
pawl kan reltlang ding le consultation tuah a tul kan tinak cu! A
nganmi hi ngan ding tlak lawnglawng a si, tin ka hmu.

Tamtuk ka ngan zo. Ka cawl hrih ding. Ngan ding a um asile ka ngan sal leh ding.
Hi CCOC second round thu ah zo ih hminthannak ih ruahmi a si lo. Kan
Chinmi zatein Pathian zumtu kan si nak dingah le Amai' hminthannak
ding ih kan ruahciarmi a si. Milai cu kan palh thei; asi nain a
sezawng ih ruat loin a thazawng ruat ding kan si, tin ka thu ka
netter. A thazawng ih kan ruat lo le zianghman kan tuan thei lo ding.



Saya Hre Kio


Indianapolis, IN