KUMKHUA NUNNAK

Ca siartu,

            Na kumkhua umnak ding hmun na thei fiang zo maw? Ziang tin saw tu ah cun ka thei hrih ding tla na ti men thei, asinan cu mi cu thil dik a si lo. Khui tawk hmun ah kumkhua in ka um ding ti hi na theihfiang tengteng a ttul. Ziangah tile Bible in thih hnu nun ti mi hi fiang zet in in sim. Bible in hi tin a sim, “minung cu vei khat thi ding ih ruat a si. Cui hnuah thutthennak a um ding”. (Hebru 9:27). Curuangah minung cu kan thi leh ding culawng silo in kan thih hnu ah thu tthen nak kan tong ding. Tuih can hi can thu pi zet mi tik cu can a si. Kumkhua nunnak ti mi hi ziang a si ti na thei fiang zo maw? Cun ziang tin kumkhua nunnak ka nei thei ding ti teh na ruat dah maw?

            

        A hmaisabik ah, Bible ih sim mi hmuah hmuah na lungkim a ttul. Ziangah tile Bible cu Pathian ttong kam a si, cun kumkhua in a hmun ringring ding. Bible in hi tin a sim, “Hrampi pawl an caar, Pangpar pawl an vuai: sihman seh la ka ttong kam cu kumkhua in a hmun ding” (Isaiah 40:8). Cuih hlei ah Bible lawng hi na nunnak hrang ih thu pi zet mi thu suhnak a lo let thei tu a si: (1) “ziangtin thu tak ka thei thei ding” cun (2) “ziangtin thutak ka nei thei ding?”

            

          Bible in hi tin a sim, “ka suahthlak in mi tha lo ka si, ka nu ih pumsung ihsin misual ka si zo.” (Saam Hlabu 51:5). Curuangah na nu ih pum sung ah na um lai ih sin sual na nei a si. Sual ti mi cu Pathian ih mi zia thawih a kalh aw mi pohpoh a si. Bible in hi tin a sim, “mi hmuahhmuah sual an neih ruang ah, Pathian ih sunlawi nak an thleng ban lo”. (Rom 3:23). Curuang ah misual na si ti cu el theih lo a dik a si. Misual cun a thianghlim mi Pathian hnen ah a thleng thei lo a si.

           

       Bible in hi tin a sim, “Asinan minung sung ah thlarau a um: cule a cak mi Pathian in theihtheinak a pek”. Kan zaten thlarau kan nei ttheh ih cuih thlarau cu a thi thei dah lo mi a si. Curuangah, Jesuh in hi tin a sim, “ cule taksapum that thei naih, thlarau that theilo tu minungpawl kha ttih hlah uh. Cuhnak in taksapum le thlarau a pahnih ih Hell meisa sungih a siatsuah theitupa kha ttih sawn uh,” (Matthai 10:28) tiah a sim. Hell cu kumkhua hremhmun a si (Mathai 25:46), riahsiatnak, Pathian thinhengnak le beidonnak a si (Luke 16:23, Thuphuan 20:15).Asinan Vamram cu: Riahsiat nak, ttah nak, sual, natnak le thihnak hrimhrim a um lo nak hmun a si (Thuphuan 21:3,4).

           

          Vanzamleng, tlangleng le mawtaw ttha ttha to ta hrat in vanram thlen theih a si lo. Rundamtu na ttul a si. Jesuh lawng a lo run dam thei tu a um. Curuang ah Jesu in hi tin a sim, “keimah hi lamzin, thutak le nunnak cu ka si. Kei mah ih sin lo cun zohman paih hnen an thleng lo” tiah a ti. Jesuh lawng a lo rundam thei tu a si. Jesuh cu sual nei lo a si. Bible in hitin a sim “ziangahtile, khrih ah Pathian dingfelnak kan si thei nak dingah sual a theihih thei lo cu kan aiah sual ah a tuah a si”. (2Korinth 5:21). Jesuh, sual thei lo cu kan ai ah misual ah canter a si, midingfel ih canter na si nak ding ah. Jesuh lawng vanram thlen thei nak lamzin um sun cu a si.

           

            Jesu in na sual man leiba cu sual nei lo amaih thisen in a lo sam sak zo. Bible in hi tin a sim, “Fapa ah cun a thisen zarah sual pawl ngaidamnak, tlensalnak kan nei.” (Kolose 1:14). Jesuh khrih ih raithawi nak a thisen ruang ah misual nang le kei cu Pathian hmai ah mi thianghlim ah can ter kan si. Jesuh lawng hi kumkhua nunnak lam zin a si.

            

           Ziang tin kumkhua nunnak ka nei ding tin a thei fiang zo maw? Kumkhua nunnak neih na duh maw? Jesuh in hi tin a sim, “Thungai in, thungai in ka lo sim, ka ttong a thei ih, i thlahtu a zum tu cun kumkhua nunnak a nei. Thu tthennak a tong lo ding ih, thihnak ih sin nunnaksungah a lut sawn a si.” (John 5:24) tiah a ti. Curuangah na zum teng teng a ttul: Jesuh cu i run dam tu le ka Bawipa a si. Bible in hi tin a sim bet, “Asinan a mah (Jesuh) a cohlang tu hmuahhmuah cu Pathian fate ih can theinak a pe hai. Cu pawl cu amai hmin zumtupawl an si” (John 1:12). Curuang ah Jesuh cu i rundam tu a si tiah na cohlan rori a ttul. Cuih hlei ah Bible in hi tin a sim, “cutin, na kaa in Jesuh cu Bawi a si tiah na phuang ih, na thinlung in mithi lak ih sin Pathian in a kai tho tin a zum asile rundam na si ding. Ziangahtile, mi pakhat in a thinlung in a zum ih, cumi cun dingfelnak ah a hruai. A kaa in a phuang ih, cu mi cun rundamnak a hring suak” (Rom 10:9-10). Curuangah na thinlung zaten na zum ih Jesuh cu Bawi a si tiah na kaa rori ih na phuan khal a ttul a si. Thinlung ih zumlawng silo in kaa rori ih simphuan khal a ttul asi.

            

          Jesu a mah rori hi kumkhua nunnak a si. Bible in hi tin a sim, “Theihternak thu cu hihi asi, Pathian in kan hnen ah kumkhua nunnak in rak pe zo. Cui nunnak cu a fapa ah a um. Fapa a nei tu cun kumkhua nunnak a nei. Pathian fapa a neilo tu cun nunnak a  nei lo.” (1John5:11-12). Curuangah Jesuh cu i rundam tu le ka Bawipa a si tiah na cohlan, na zum le na lungkim cun kumkhua nunnak (Jesu) neitu na si. Bible in hitin asim, “Kumkhua nunnak kan nei tin an theihnak dingah le Pathian fapa hmin nan zum thei nak dingah Pathian fapa hmin a zumtu nan hnenah hi thil pawl tla ka ngan asi.” (I John 5:13) tiah a ti. Pathian ih pek mi kumkhua nunnak co duh tu tak tak na si le a tanglam ih thlacam ih zangfahten rak cam ve aw:

           

         A cak bik mi Pathian, Na fapa Jesu hmang in kumkhua nunnak in pek ruangah ka lungawi tuk. Kumkhua thihnak sung ih sin rundam tu Jesu in pek ruang khal ah ka lungawi. Thutak theifiang ding ah thlarau thianghlim in pek ruang ah ka lungawi tuk. Misual ka sinan in duhdawt tuk ih kumkhua nunnak in pek ruang ah ka lungawi. Jesu cu keimah bulpak rundamtu ah ka zum, ka co hlang ih ka lungkim a si. Jesuh thuhla a theifiang sin sin tu I si ter hram aw. I rundamtu Jesuh hmin in thlaka cam. Amen.  

Ca ngan tu le thlah tu:

Phun Za Pum (Pum Pum)

South India Baptist Bible College & Seminary

Coimbatore, India.