1 Sam 7:3-14
Tongfam simfiangnak:
Ebenezer timi tongfang hi Hebrew tongfang pahnih a kommi a
si ih, r‰zEoDh_NRbRa Eben Haezer ti a si ih, a
sullam cu Bomnak Lungto (stone of the help) tinak a si. Himi lung phun a phuntu
hi Puithiam Samuel a si. Ziangtik ah an phun? Bawipaih bomnak in an ral,
Filistinmi pawl an neh sun ih a phunmi a si. Ziangah a phun? “Bawipa kan
lamtluanah in bawm” timi theih hngilh lonak dingah Mizpah le Jeshanah timi khua
karlak ah a phun (1 Sam. 7:12).
A thuanthu um daan:
Filistine pawl in Israel pawl do ding in Mizpah timi khua
kiangah an feh. Israel pawl cu an thin a phang tuk ziangahtile Filistine pawl
cu an cak tuk ih an hlan an doawk khal ah aan sung dah zo. Curuangah, an tih
zet. Cutikah, an puithiam Samuel hnen ah an feh ih Bawipaih hnen ah Filistin
pawl ih kut sungih kan thih theh lonak ding thla in cam sak aw tiah an dil.
Ral neh thei dingah
tuah a tulmi pawl:
Puithiam Samuel in hitin thu a cah. Nan ral pawl neh dingah
cun, himi pawl tuah hmaisa uh tiah thu a cah. A cahmi kan zoh tikah, Filistin
ral, leenglam ral hnak in sunglam ral a simmi Pathian dangdang ih va biak, va
rian khi tih a nung deuh tiah a sim. Curuangah, Filistin nan ral pawl neh
dingah a tanglam pawl hi tuah ta uh tiah a fialmi 1 Sam. 7:3 sungah kan hmu
thei:
1. “Nan thinlung zate thawn Pathian hnen ah
kirsal uh.” Kan thinlung ih kan duhmi le ruahmi hi kan nun daan in uktu a
si. Curuangah, nitin in hmailam ih kan nor thei sinnak dingah kan tuah
hmaisabik a tulmi cu kan thinlung le ruahnak hrimhrim sungah Pathian lungawi
ternak thu le hla lawnglawng ruat in a duhmi tuah ding lawng a ruattu kan si
hmaisabik a tul. Na thinlung zate thawn Pathian hnen na kir sal le sal lo
ziangtin na check aw thei ding?
2. Pahnihnak
ah, “nan lak ih a ummi ramdang pathian
pawl, milem pawl kha hlon theh uh.” Thinlung zate thawn Pathian hnenah
kirsal timi cu kan milem pawl kan hlon theh a tul. Kan milem cu ziang pawl an
si? Milem timi cu Pathian hnak ih thupi ih kan retmi tisa duhnak le duhhamnak
pawl an si. Pathian duhmi hnak in ziangmisi aduh deuh? Cumi cu na milem a si.
Cumi kha hlon aw. Minung tampi in kan milem pawl kan hlon duh tuk theu nan kan
hlon thei lo. Cumi cu ziangtin kan hlon ding?
3. Pathumnak
ah, “Nan thinlung Bawipaih hnenah hersal
uhla, Amah lawng rian uh.” Himi zawn ah thu pahnih Samuel in a fial.
Pakhatnak ahcun, nan thinlung put kha Bawipaih hnen ah her uh, a pahnihnak cu a
mah lawng rian uh. Kan milem pawl a simi tisa duhnak le Pathian duh lomi ziaza pawl hlon thei ding ahcun, kan tuahhmaisa a tulmi cu kan lungput le ruahnak pawl kha Pathian
hnen ah kan hersal hmaisa a tul. Ziangtin kan her ding? Thlacamnak, Bible
siarnak, le zumtu dang pawl thawn pawlkom aw in Biakinn ih khawmnak in kan thinlung
cu Pathian hnen ah kan herkir sal thei a si. Cumi cu ziangah kan tuah? Pathian
ih duhmi lawng hawl in a lungawinak lawng ruat ih kan um theinak dingah a si.
Israel pawl Pathian
hnen an pan daan
1. Israel
pawl in Pathian tluk ih thupi ih an retmi milem
ziangkim kha an hlon theh ih, Pathian lawng thupibik le a duhmi lawng tuah
ding in an thinlung zate le an nunnak zate in an hlan aw (c. 4). An milem pawl
lawng an hlon men lo. Ziangah an tuah?
2. Rawl ul in Bawipaih hnen ah an sual an
phuang (c. 6). Thlacamnak le milem hlonnak pawl hi a cem aw cih ringring.
Milem a simi zuu maw, kuak maw, tisa duhnak dang maw na hlon tikah, cumi na
ruah theunak thinlung kha Pathian thu ciah ter aw. Thlacamnak, Bible siarnak
tam deuhdeuh na neih le, Pathian thawn tam deuhdeuh nan pawlkom aw tinak a si
ih, a duhmi tam deuhdeuh in na thei ding. A thu tam deuhdeuh na ruah ahcun,
cumi a thu in na nunnak a lo thianhlim ter sin ding.
Pathian ih mangbangza
a thilti theinak a lang:
1. Pathian
in khuari thawm thangzet le tektlak aw thawn philistine pawl cu a thuat ih, an
lung a aa ter theh. An tangrual tlaang thei nawn lo c. 10). Pathian in Israel
pawl ih ruahban lomi khuari aw in an ral pawl a thekdarh ter. Israel pawl ih
Pathian cu kan Pathian a si ve. Kan Pathian cun kan ral pawl nehnak huham cu
amah in a nei. Kan ral pawl hnak in a tum sawn ih a cak sawn. A duh ahcun,
tuihsun khal ah amah in kan ral pawl a dawi hlo theh thei.
2. Israel
pawl in an do ih, an neh (c. 11). Pathian ih a hnatuanmi kha Israel pawl khal
in an bawm ih an do ve ti kan hmu. Pathian in nehnak in pe zo. Cumi nehnak cu
la dingah hmai ih a nortu ding cu kanmah kan si. “Nan palmi leiram cu ka lo pe
ding” tiah thu in kamtu a si (Daan 11:24).
3. Israel
pawl in an rak sun dahmi leiram pawl kha an la theh sal (cc. 13-14). Pathian
hnen ah an thinlung an her sal ih, a duhmi lawng hawl in an tuah tikah, Israel
pawl in an rak sunral zomi pawl hmuahhmuah an la sal theh a si. A hlan ah ziang
na rak sungral dah? Sunlawinak, upatnak, damnak, le hnangamnak pawl na rak
sungral pang maw? Phang hlah! Pathian hnen ih na kir ahcun Pathian in cu pawl
khal a lo pe sal theh ding a si.
Lungawi thusimnak
lungphun a phun:
Samuel in lungto pakhat a lak ih, lung a phun. A hmin ah,
“Ebenezer” tiah a sak. A sullam cu “Pathian in kan lam tluanah in bawm” tinak a
si. Pathian ih ttanpinak le umpinak hngilh lonak ah a tuahmi a si (c. 12).
Pathian ih sunlawinak huham cahnak
kan nunnak ah kan hmuhton theinak dingah:
1. Kan
thinlung zate thawn Pathian lawng
duhdawt sal uh si.
2. Pathian
lawng duhdawt timi cu Pathian ih duh
lomi pawl hlon theh khi a si.
3. Cumi
tuah suak thei dingah cun, kan thinlung le ruahnak hrimhrim ah Pathian ih duhmi
lawng hawl kan hawl a tul. Ziangtin kan hawl ding: Bible siarnak, thlacamnak, zumtu
pawl thawn pawlkom awknak in kan hawl ding. Cuti in Pathian duhnak kan hmuhmimi
kha kan nun in kan Pathian lungawi ter dingah kan tuah bet ding. Cutikah,
Pathian ih sunlawinak huham cahnak cu kan mit rori in kan hmu dingih, lungawi
thusimnak lungphun hi kan phun ve thei ding a si.
San No Thuan
May 20, 2013
Salai Ram Tin Thang, (U Phun Kar Thang ih fapa) ih Degree a
laknak ah lompinak khawmnak ih ka simmi a si.
No comments:
Post a Comment