Pathian ih Siter In Duhmi Nun Daan

1 Thessolon 5:16-18

Michael Jackson ih thihnak thu ka ruah sal tikah riah tla a sia ih zaang a fak zet. Milian le mi hmin thang zet a si. Asinan, zaan a it thei lo tuk ih, ih a duh tuk ruangah nurse a hlanmi nu kha ih theinak si a phunphun a dil. Netabik cu, cu pawl khal in an ihthah ter thei lo ruangah, lunghlo sii (meh sii) I pe aw tiah a dil. Cunu cun, lunghlo sii ka lo pek hnu ah tho nawn hlah awla ziang na tuah ding a ti ih a pe duh lo. Michael Jackson cun a vaansan tuk ah Dr. Murray a hlang ih lunghlo sii than ding a dil. Cuih Doctor pa cun, a pek ih Michael Jackson cu a it that. Tawkfang cun, a thaw a sam ciamco ih a rei hlaan ah tho nawn lo in a thi lan ta.

U le nau pawl, zaan ihhmu thaw teih ihthah thei hi lei tlun sumpai in a lei thei lo sokhaw. Pathian zaangfahnak ruangih kan donmi thluasuah liolio a si. Na ihthah thei tikah lungawi thu na sim dah maw?

1 Thessolon 5:16-18 sungah Pathian in siter in duhmi nun daan pathum lo ruah ka duh:

1.     Lungawi ringring uh (1 Thess 5:16) Zumtu pawl kan lungawi ringring ding hi Pathian in in duhsakmi a si. Sumpai nan neih tik lawngah, nan damcah tik lawngah in ti lo. Lungawi ringring uh tiah in ti. Curuangah, lei tlun thilri le sersiammi minung le thilri zoh in nan lungawi uh tiah in timi cu a si hrimhrim lo ding ti a fiang. Ziangtin kan lungawi ringring thei ding? Amah Pathian thawn kan pawlkom awk ringring lawngah, Pathian hnen ih a rami lungawi hnangamnak thawn kan khat ding ih kan lungawi ringring thei ding. Ziangtin Pathian thawn kan pawlkom aw ding? Pathian ih duhmi hawlnak tuahnak thawn kan pawlkom aw ringring ding. Ziangtin kan hawl ding? Thlacamnak, Bible siarnak, le zumtu dang pawl thawn pawlkomawknak in kan hawl ding. Zumtu dang thawn pawlkomawk ti tikah, khawm tlaangnak khal in si thei, anmah minung rori thawn khal a si thei, an cabu nganmi siarnak khal in pawlkomawknak kan neih ding a thupi zet. Cuti in Pathian in anmah hmang in a duhmi in theih ter sin ding a si.

2.     Thlacam ringring uh (1 Thess. 5:17). Thlacam cu Pathian thawn pawlkomawk khi a si. Pathian thawn pawlkomawk tikah mitsing ringring cun kan um thei lo ding. Thlacam ringring uh in ti tikah, a sim duhmi cu:

a.     Ziangkim kan tuah tikah, Pathian kha ka lo rinsan; lam I hruai aw; ka nunnak ka lo hlan tiah kan ti ringring dingmi hi a si. Thlarau lam pa pakhat in, “Kei cu ka hnatuan a tam deuhdeuh le ka thlacam a tam deuhdeuh” tiah a ti. Asim duhmi cu hna pakhat a tuan zik tinte, Pathian hnen ah, “Bawipa himi hna ka tuan thlang ding, nangmah in a tha na ti bang in I hruai aw” tiah a ti ringring.

b.     Pathian in a lo umpi ringring timi khal cing ringring aw.

c.     Pathian na duh daandaan in lam I hruai aw; na duhmi lawng ka tuah ding tiah ti ringring aw.

d.     Pathian ka hrangah a thabik nangmah in na thei ih, I ret sak ti ka thei tiah lungawi thu sim in, na duhmi khal dil ko aw. Zumnak thawn Bawipaih puanzim a thamtu thisen kum 12 dok nu parah Bawipaih huham damnak a suak. Elijah in zumnak thawn ruahsur lo ding ih thla a cam tikah, kum thum sung ruah a sur lo. Zumnak thawn thla a cam sal tikah, kum 3 sung ruah a sur sal kha cing ringring uh. Nan dilmi nan ngah lo tik khal ah bei dong duh hlah. Pathian in na hrangah a tha bik a thei.

3.     Lungawi thu sim ringring aw (1 Thess 5:18). Thil tha lo kan tonmi ruangah lungawi thu sim uh in timi a si lo. Zumtu cun, hi famkim lomi leiram ih kan um sungah harsatnak hi leilung le leimi pawl in in pe ding. Asinan, Pathian in kan hrangah ziangkim hi a thabik in khua in khansak thotho ih, himi harsatnak sung khal in ka hrangah a tha bik in a remsal thotho ding timi thei in lungawi thu sim ding sawn kan si (Rom 8:28).

_____________________
San No Thuan
Thanksgiving Sermon at FBCMaryland
November 28, 2013