Vancungram Nun a Neitu Pumpak le Innsaang

Eph. 5:18-33

Thuhmaihruai:

Ziangruangah innsang tampi ah tthenawknak a suak? Mihrek khat cu an address cu a bang aw nan, an thinlung sungah a tthen aw zomi tampi an um. Hivek sungih sin ziangtin kan innsang hi kan kham thei ding?

Vancungram nun a neitu pumpak le innsang pawl ih thuthup

Bible ih in zirh daan cu Pathian ih Thlarua Thianghlim huham cahnak ih lamhruainak thawng in innsang nuam a cang thei ti in sim (Eph. 5:22-33).

“Thlarau Thianghlim thawn khat uh” timi hi Bible ca ih in fialmi a si. “Khat” tiah a timi ih sullam cu ziang a si tile, thlarau tampi hi kan innsang ah ko in, kan nunnak ah an rung lut ciamco khi a si lo. Thlarau Thianghlim cu pakhat lawng a si. “Khat” timi ih a sullam cu “Thlarau Thianghlim in lo uk seh" tinak a si sawn. Thuthimnak ah,  mi pakhat cu thinhennak in a khat tiah kan ti tikah, a sullam cu, “thinhennak thu le hla lawnglawng a ruat ih, cuih thinhennak in a nunnak a uk, control” tinak a si. Cuvek thiamthiam in, Thlarau Thianghlim ih khat timi cu “Thlarau Thianghlim thawn pawlkom aw, a duhmi hawl, ruat, thlun, Thlarau ih duhnak ih control mi” pawl tinak a si.  

Thlaurau Baptisma le Thlarau khat nun simfiang nak

(The Baptism of the Holy Spirit & The Filling ah the Holy Spirit)

Mi pakhat in Jesuh Khrih kha ka sual ngaithiamtu le ka thlun dingmi ka Bawipa a si tiah a pom hnu ahcun, Thlarau Thianghlim cu pek a si cih (1 Cor 12:13). Cumi cu tong dang in Thlarau Tihnimnak (Holy Spirit Baptism) ti khal in an ko. Cuih thlarau cun, “Jesuh ih taa na si” tiah in theih ter. Cucu, nang le kei ih tuah theimi a si lo. Pathian in zumtu kan si le vete ih in pekmi a si.

Asinan, Thlarau Thianghlim khal a nei zo ko, Pathian ih innsang, a fanu/pa khal ka si ti a thei aw zo ko nan, Thlarau Thianghlim ih uk thei lomi, hruai thei lomi tam tuk kan um. Cumi nun cu innsang buainak a suah tertu bik cu.

Mirang tong cun, “The baptism of the Spirit means that I belong to Christ’s body. The filling of the Spirit means that my body belong to Christ” tiah an ti. Sim duhmi cu Thlarau baptisma timi cu Jesuh Khrih in ka nunnak hi ka ta tiah in tinak a si ih, Thlarau khat nun cu kanmah in Jesuh kha, “Ka nunnak cu na taa ka si” tiah kan ti ih kan apawknak khi a si.

Ziangtin Thlarau ih Ukmi kan si thei ding?

Ziangtin Thlarau in in Uk thei ding timi kan fiang theinak dingah, “Zuu in” thawn a tahthim. Zuu kan in tikah, zuu kan in tam deuhdeuh le zuu in in ciah deuhdeuh, neta lam ahcun, zuu tha in in kan ruahnak, tong daan le hoiher daan pawl a control theh. Cuvek thiamthiam in, Thlarau Thianghlim ih in uk theinak dingah, Thlarau Thianghlim ih a hmanmi cu “Bible ca, Amah thawn pawlkomawknak a simi Thlacamnak, le zumtu dang pawl thawn pawlkomawknak” pawl kha na nunnak sungah thun ringring aw. Cutikah, Thlarau in na ruah ban lo in, na sunglam ah hna a tuan dingih na nun daan, tong daan pawl khal a lo control theh ding.

Thlarau a controlmi pawl ih a rah pali in a sim:

1.     Pumpak nun ah an lungawi (Eph. 5:19). Saam hla thawn Pathian thangthat in an lungawi ding. Lungawi lo pawl in hla an sak thei lo.  Himi kan fiangnak dingah Jesuh ih nu Mary ih thu in simfiang ka duh. Mary kha amaih duhmi hnak in Pathian ih duhmi: “Nau na pai ding ih a hmin ah Jesuh tiah an ko ding” timi a ngai deuh tikah, a nunnak cu ningzahnak hnak in lungawinak thawn a khat ih Saam hla sak in caan a hmang.

2.     Pathian hnen ah lungawi thu an sim (Eph. 5:20). Pathian hnen ah Saam hlabu sung ih hla le thlacamnak thawn lungawi thu an sim. Mary ih nunnak kan zoh lala tikah, Pathian in a nunnak a control ter tikah, lungawinak thawn a khat ih tlun ah Pathian hnen ah lungawinak thu a sim ti kan hmu.

3.     Midang hnen khal ah Pathian ih thathnak thu an sim (Eph. 5:20). Mary kha amah lawng lungawi kha tawk a ti thiam nawn lo. A unau Elizabeth hnen ah feh in a lungawinak thu a va sim ih, midang ih sunglam tiang lungawinak a thlen ter.

4.     Khat le khat ih duhnak an thlun aw (Eph. 5:21ff). Midang uk duhnak si lo in, midang thu ngai/lun nun a nei sawn. Efesa 5:21 tanglam hi siar uhla, Thlarau khat nun a neitu nupa (couple) pawl ih um daan ding a sim. Cumi cu, khat le khat ih duhnak kha an thlun aw. Uk aw tum lo in, duhnak thlun aw in an um sawn ti kan hmu.

Thunetnak

Vancungram nun a neitu nunnak le innsang pawl ih nun daan thuthup cu Thlarau Thianghlim ih thuthu in a fehtu pawl le a nungtu pawl an si. Pathian ih ta ka si ti men in kan Khrihfa nun hi tawk ter hlah uh si. Pathian hnen ah, na duh bang in I hmang aw tiah kan apawk a tul. Sinan, ziangah kan ap aw thei lo tile, zuu tam deuh a in mi pawl in an nunnak cu zuu in a control bang in, Thlarau in, a cahnak huham hrangih a hmanmi “Bible ca siarnak, Thlacamnak, le zumtu pawl thawn pawlkom awknak pawl” tam deuhdeuh in kan nun ih kan neih ahcun, kan nunnak cu Thlarau in in control thei ding a si. Cumi a neitu pawl cu vancungram nun cu nitin an tep ngah. Asinan, Thlarau Thianghlim tam deuhdeuh ih a pawlkom lotu pawl cu vancungram nun tep ngah lo in ni an liam. Nang teh na nunnak Thlarau ih ukmi na si zo maw? Acahnak hrangih hmanmi pawl na ei maw?

___________________

San No Thuan

December 7, 2013

Lian Sin & Lian Thawng teih inn ih ka simmi a si.