Dungtolh Tu Pawl A Hnong Lo Tu Bawi Jesuh

by San No Thuan

John 21:4-21

Fili 3:13-14

3Ka u le ka nau pawl, cumicu ka co ngah zo, tiin ka ruat hrimhrim lo. Ka tuahmi cu pakhat lawng a si: ka dunglamih a luan ciami thil kha hngilhsan tahratin ka hmailamih a ummi kha ban dingah ka dawh aw rero a si. 14Curuangah hmuitinmi lamah zuam man ngah dingin dingtein ka tlan. Cuih zuam man cu Pathian in Khrih Jesuh sung ihsin kumkhua nung dingah in run kawhnak kha a si.

Dungtolh nun timi cu?

Dungtolh nun timi cu Pathian hnak in thil dang kha va duh in thupi sawn ih ret khi a si.

Peter kha Bawi Jesuh in a kawh tikah, “Nga kaitu in minung kaitu (Pathian duhdawtnak sim zirhtu) ah ka lo hmang ding” (Luke 5:10) tiah a ti. Asinan, Bawi Jesuh a thih tikah, Peter cu ka hnatuan bang ka tuan sal ding tiah dung ah a tolh sal. Pathian ih duhdawtnak sim le zirh in midang pawl ih nunnak cawm dawl nawn lo in, ngakaitu men ah a cang sal. Bawi Jesuh ih duhdawtnak le a fialmi kha a pakhatnak ah re nawn lo in (Christ-centered), kan mai duhmi sawn kha (Self-centered) thupi sawn ih kan ret tikah dung tolh hram kan thok tinak a si.

Hruaitu dung a tolh le hruaimi pawl in an thlun mei.

Peter cu dungthluntu pawl karlak ah upa hruaitu a si. Anih in Jesuh a thih hnu ah kei cu sur ka vorh sal mei ding tiah a ti tik ah, midang pawl cun kan nih khal kan lo thlun ding tiah an ti mei (John 21:3,4).

Nangmah le mah zianghman ka thupi lo tiah na ruat aw men ding. Asinan, na um daan/xttongmi lo thluntu pawl tampi an um ti hngilh hlah. Vei khat ah, Ramthlo ah pastor ka tuan lai ah, mino te ka si fawn ih ka ttongmi hi midang in cu tluk in ziang an ruat lemlo ding tiah ka rak ruat. Asinan, veikhat cu Chin National Front pawl le kawl ralkap pawl karlak ah buainak a thlen tikah, kawl ralkap pawl in Ramthlo ah an ra ih a phunphun in harnak an pek. Curuangah, kei khal in hi ti ih kawlral kap pawl an um ringring ahcun, vaih tla a tha men ding ee tiah ka rak ttong. Cumi ka ttong ruangah maw cu ka thei lo. A rei hlan ah, kan Khrihfabu upa thatha inn hra zik lai Kawl ah an vai ta riai!

Khrih ka duhdawt ruangah ka tuahmi a si maw? timi hi kan kut kenmi si she.

Dungtolh nun ah thluasuah a um lo.

Kum 2008 sung ah, Bawipa ih in fialmi pawl tuah lo in, Pathian thawn pawlkom aw lo in, kan mai duhnak thawn lawng kan nung pang maw? Dun kan tolh pang maw? Dung tolh nun ah thluasuah a um lo ti cu sim tul lo in kan thei theh. Peter le a rualpi pawl cu zaanvaar te in nga an dawi nan, ziang nga hman an kai lo (John 21:5). Thluasuah cu Pathian ih ta a si ih amai hnen in a rami an si (Daanpeksannak 8:18).

Kan Pathian cu dungtolhmi pawl hnen ah a feh ih thluasuah a pe thotho.

Dung lam hoi in nga kai ding ih an feh sal tikah, Jesuh in dungtolhtu a dungthluntu pawl a hnong lo. An mah in cu an thei lo nan, an hnen ah a va feh ih, nan sur kha nan vorh lam ah hei sep hnik uh tiah a ti tikah, a ti vek in an tuah ih nga ti cawk lo in an ngah (John 21:6). An vorh cia nak a si ko nan, Pathian ih thu an thlun tikah, an duhmi cu a famkim ter ve a si. Curuangah, Bawi Jesuh in “Pathian ih uknak le tuah ding ih a fialmi kha hawl hmaisa sawn uhla, a dang cu a lo pe ding” a si tiah a ti (Mtt. 6:33). Dung kan tolh lai caan khal ah kan Pathian cu kan kiangnai ah a ra thotho ih thluasuah cotu kan si theinak ding ah in bia ih in ko thotho ti a fiang.

Kan Pathian cu dungtolhmi pawl hrangah rawl a timtuah sak.

Tipi kap ih an thlen tikah, Bawi Jesuh in rilrawng le a bang zetmi a dungthlun pawl hrangah meisa a rak muah sak ih, nga le sang tla an rawl ah a rak timtuah sak (Jon 21:9) ah kan hmu. Jesuh cu a mah phatsan in dung kan tolh lai caan khal ah kan hrangah rawl in timtuah saktu a si. Kan pum puar ding le kan nun nom ding a duhtu a si. Kan mah thawn biak aw ding ah kan kiang nai ah a ra ih in pawlkomtu a si.

Dungtolhmi pawl hnen ih Pathian ih thusuhmi:

A thusuhmi cu: “Hi minung/thilri pawl hnak in kei I duhdawt sawn maw?” timi a si. Peter ih a rualpi/sungkhat unau hnak in, keimah na Bawipa I duhdawt sawn maw tiah a suhmi a si. Cumi lawng si lo in, Peter ih a ngah le a sur le lawng pawl hnak in I duhdawt sawn maw ti khal in a suhnak a si. Zumtu pawl, in duhdawt biktu Bawipa in, hi leitlun minung le thilri pawl hnak in a mah kan duhdawt sawn ding hi Pathian ih in duhmi a si. A mah hnak in midang kan duhdawt sawn ahcun, pathian dang bia kan si ih, kan hlo tlau sing ding ti a theih ruangah a si.

Pathian in Amah kan duhdawtnak a tahfung:

Peter in ka lo duhdawt ti na thei tuk ko si tiah a ti tin ten, si ngai a ti men lo. “Ka tuu pawl cawm aw” tiah thu a pek ringring. Peter in Amah a duhdawt le dawt lo a tahfung cu a tuu pawl cawm ding hi a si. Bawipa in, a lo tahnak fung cu “A tuu pawl na cawm maw cawm lo” tihi a si. A tuu pawl cu zo pawl an si?

1. Bawipaih tuu a pakhatnak ahcun, nangmah hi a si. Nangmah le nangmah ziangral in I do, khui ah ka feh, Bawipai sunlawinak ah ka nunnak hi ka hmang aw maw ti pawl na zohfel awk lo ahcun, Bawipaih tuu kiltu tha na si lo tinak a si.

2. Bawipaih tuu a pahnihnak ahcun, midang pawl hmuahhmuah an si. Na nunnak hi midang ih nun cawm awknak dingah na timtuah lo, na hman lo ahcun, Bawipa na duhdawt lo tinak a si.

Thunetnak

1. Dungtolh nun timi cu Pathian hnak in thil dang duhdawt khi a si.
2. Hruaitu dung a tolh tikah, hrumi pawl cu sim tul lo in dung a rak tolh hlo zo.
3. Dungtolh nun ah Pathian ih thluasuah a um lo. Thluasuah cu Pathian ih ta a si.
4. Asinan, dungtolhmi pawl kha Pathian in a naih ih, hruai kir sal a tum ringring.
5. Dungtolhmi pawl hnen ih Pathia ih a thusuhmi cu “Leitlun thilri le minung pawl hnak in I duhdawt maw?” tihi a si.
6. Amah kan duhdawtnak tahfung cu, Bawipa ih tu a simi: kan nunnak, le midang pawl nun cawmnak ding hrangah kan nunnak le tikcu caan kan hmang maw?

Himi sermon hi: Falam Baptist Church, Maryland ah January 2, 2011, kum thar ni ih ka sermonmi a si.