Cak Sinsin Uh!

- Rev. Run Cung Mang

Khrih Jesuh cu kan Bawipa a si ti ih nan pom ngah zo ruangah Amah thawn pehzom aw in nung uh. Amah sungah nan hram cu thukzet in bun uhla, nan nunnak cu Amah sungah inn bangin sak uh; zirh zo mi nan si vekin nan zumnak ahcun cak sinsin uh; cule lungawinak in khat uh. - (Kolose 2:6-7)

Thuhmaihruai:

Zumtu kan thlarau nun tthanglian pitling sinsin dingin tharthawh ringring a ttul. Daithlang le zaangzel ih um ding kan si hrimhrim lo. Jesuh Khrih - lamzin thar le lamzin nung (Hebru 10:20) sungah nun tharnak le nun thlengh awknak taktak nei dingah ka lo sawmngiar duh a si. Paul in Kolose 2:6-7 sungah zumtu thlarau nun cak sinsin dingih a forhnak ihsin thlarau thazaang la tlang uhsi!

1. Khrih thawn pehzom sinsin uh (Kolose 2:6)

Paul in: “Amah thawn pehzom in nung uh,” (c. 6) a ti. Khristian cu Khrih thawn pehzom aw ringring ding kan si. A sungah kan um ih kan sungah a um ringring a ttul. Jesuh in, “Keimah thawn pehzom uhla kei khal nanmah ka lo pehzom ve ding. Sabit hnge cu amahte lawngin rah a rah thei dah lo; sabit hripi thawn a pehzom awk lawngah a rah thei a si. Cubangtuk in keimah thawn nan pehzom awk lo ahcun nan rah thei hrimhrim lo ding” a ti (John 15:4). Khrih thawn pehzom aw sinsin dingin thlacamnak le Bible siarnak ah taimak suah uhsi!

2. Khrih sungah nun hram thuk bun sinsin uh (Kolose 2:7)

Paul in, “Amah sungah nan hram cu thukzet in bun uh” a ti. Kan thlarau nun Khrih sungah thuk sinsin ih kan bun lawngah a tthanlian ding. Paul in thlarau nun cu engineer ih innsak thawn a tahtthim. Inn saangpi sak tikah innhram (foundation) thukzet a ttul. A foundation a thuk lo asile innpi a fek lo ding. Jesuh in vutnel parih innsaktu le lungto parih innsaktu tahtthimnak a sim (Matt. 7:24-27). Pathian Thu a thei ih a thluntu cu lungpi parih innhram ttohtu bangin ruahsur le thlisia hrang lak khalah a sawn lo a ti. Thlacamnak le Bible siarnak thawn Khrih sungah hramthuk sinsin in bun uhsi!

3. Khrih parah thlarau nun inn bangin sak sinsin uh (Kolose 2:7)

Paul in, “Amah sungah nan nunnak cu inn bangin sak uh” a ti. Khristian nun cu tthareh nun a si lo, amah kel ringring a si lo. Kum khat hnu kum khat thlarau nun sang deuhdeuh in sak sinsin ding kan si. Khrih thawn pehzom sinsin in Khrih sungah hramthuk bun sinsin ih thlarau nun saangsin ih sak sinsin ding kan si. Zumtu sinak ihsin dungthluntu ah, cuihsin Khrih hrang ih thlahmi dinhmun ti’n Khristian nun ah a dotdot in tthanglian pitling vingvo ding kan si.

4. Khrih nan zumnak ah cak sinsin uh (Kolose 2:7)

Paul in, “Nan zumnak ah cak sinsin uh” a ti. Zumtu thlarau nun cu cak deuhdeuh le fek deuhdeuh ding a si. Thlarau nun ah tthangso thei loin amah kelte si ringring ding a si lo. Khrih thawn pehzomnak, Khrih sungih hramthuk bunnak le Amah parih thlarau nun saknak in zumnak thazaang cak sinsin ding kan si. Bible le Nitin Thlarau Rawl siar, Bible zirzoinak nei tam sinsin, thlacam taima sinsin Khrih hrangah pumpek sinsintu si dingah in sawmngiar.

5. Lungawinak in khat sinsin uh (Kolose 2:7)

Paul in, “lungawinak in khat uh” a ti. Zumtu nun cu ziangtik khalah lungawi ringring ding kan si. Zumtu tisa mi si loin zumtu thlarau mi taktak cun a nitin nun ih a hmuhtonmi parah Pathian hnen lungawi thusim thei ding hi a si. “Cat loin nan lungawi uh. Thlacam ringring uh. Ziangvek dinhmun khalah lungawithu sim uh, Cumi cu Khrih Jesuh ah Pathian ih a lo duhsakmi a si” (1Thes.5:16-18). Jesuh a pakhatnak ah ret, midang a pahnih ah ret ih mah le mah netabik ah ret awtu pawl nun cu ziangtik khalah lungawinak in a khat ding.

Thuneitnak:

Duhdawtmi zumtu, kum zabu 21 ih kum hrabu hlun (2001-2010) cu kan taanta zo ih kum hrabu thar (2011-2020) sungah kan lut zo. Calendar, Diary le Notebook thar kan thlengh bangin kan vision le kan life style tla a thar in kan thlengh thluh a ttul! Jesuh Khrih cu i Runtu le ka Bawipa tiih kan zumnak fekter sinsin ding, Amah thawn kan pehzom awknak thukter sinsin ding. A sungah hramthuk bun sinsin ding le kan zumnak cak sinsin dingin thlacamnak le Bible siar, khawm le tettikhan, pumpek cangvaihnak in zuam sinsin ding kan si. Cule khawvelmi bangin phunzai hmangtu si loin, ziangtiklai caan khalah Pathian thangtthatnak le lungawinak thawn khat sinsin ding kan si.

Khrih le miphun hrangah rinsantlak zumtu ttha si dingin zuam sinsin uhsi!