Rev. Hrang Tho le duhdawtmi ka khuapi pawl,
Saya Run Cung Mang ih a thinlung sung le a nunnak ih a tonmi thawn ruahnak kaupi nei in, a sunmang a lo simmi hi thungai thlak in kan khua hruaitu upa le Saya le pawl in nan ruah ding a thupi tiah ka ruat. Kan mah lawng um maw, LTBA kan kom ah a tha timi thu hi kan khua Local ih kan din kum 25 kimnak ah napi ruat tlaang dingah zaangfah ka lo dil.
Kan khua tthansonak hrang ih kei khal ih ka sunmang le ka thlacamnak cu: kan khua hi LOCAL sinak in, LTBA ah kom thlang sehla, kan tthangso sin ding timi hi a si. Kum 25 sung kan khua kan mahte local ih ke kan kar ruangah, a thatnak le tlaksamnak thupi zet ih kan ruah lo cun, kan mino pawl, midang khua le ram ih fale pawl an bang nawn lo leh ding. A tui ka simmi fiang dingah, nan fahniang pakhat a simi keimah No Kolh ih, ka nunnak ih ka tonmi pawl ka lo sim duh.
Pathian zaangfahnak in, ZTC Bible tlawng B.Th kai ka theh tikah, FBA ramsung ih Baptist kawhhran khui tawk khal ah hnatuannak kaupi Pathian in i on sak. FBA sung ih hnatuan tengteng hi a thupi lo nan, midang thawn kan pehzom awk lo ahcun, Pathian hna kan tuan theinak hmun le hma tampi, a hlei in, kan fale nonawn pawl hrangah a fiak ter a si ti cu el theih lomi thu a si. Baptist pawlkom ih ummi pakhat ka sinak ih a thathnemnak pawl lo sim ruah bet ka duh.
M.Div khal kan kawlram ih tlawng thabik MIT ah ka vung kai tik khal ah, Scholarship pek ding an ti tikah, Hakha Baptist Association in, Tedim Baptist Association in, Falam Baptist Association ih tefa sung in zo si kan hril ding an ti ih, FBA in keimah, in rak hril. Ka ttheh tik khal ah miphun za rawi bik umnak MIT tlawngah, FBA aiawh in siseh, Falam mipi aiawh khal in siseh, tlawng saya tuan ngah ding in Pathian in i zaangfah lala. Kawlram pum puluk ah Baptist hi a tum bik an si bang in, Baptist kawhhran kip ah, Pathian in hnatuannak lamzin khal i on bet a si. Pawl tin kim kom awknak MCC le Baptist pawlkom pi a simi MBC khal ah tuan theinak Pathian in lamzin i on a si.
Ram dang ah tlawng ka kai zik tikah, Falam le FBA aiawh in siseh, Kachin, Karen le Kawl pawl kar lak ah, Laimi aiawh khal in, kai ngah ding in, Pathian lam i on lala. Hi tawk tlawng ka kai tikah, ka kainak ding paisa in a daih nawn lo ih, American Baptist Churches pawl in MBC in, na kai ding an lo theihpi ahcun, dollar thawng hlei riat kan lo bawm ding in ti ih, cumi pawl khal MBC ah ca ka dil ih, in theihpi tik ah, paisa cu zat khal ka tlawngkainak ah ABC-USA in, in pek sak theh.
Cun, ram dang US ih ka ra thlen tikah, kawlram ih a rami pawl ih dinmi kawhhran pawl a hung suak ciamco ih, Baptist ih pastor a tuan ciami pawl cu anmah lam ih sambaunak an neih lo ahcun, kawhhran tin in Pastor ah hman an duh. Baptist ih a rak tuan dah lo pawl cu, theitu cuca an nei lo ih, Pastor ih a ko tu an mal ngaingai. Kei khal a tu hi tlawng ka kai phah ah, kan Falam mi upa thatha pawl (Dr. Za Hlei Thang, Saya Phun Kar Thang, Dr. Kyaw May Htwe, Pu Lal Nei Mang .. ) ti pawl umnak ah, "Ee.. na thuhla cu Falam lai le kawlram lai in kan lo thei si, Pastor in ra tuan sak aw tiah" in ko ih, ol te in pastor ka tuan. Reverend khal thatho zet in mirang pawl in pek.
Mirang Baptist Kawhhran Pawlkom pi in hi tawk ih, Pastor hna a tuan pawl hi kawlram ih Ordination a ngah ciami an si cun, a hlei in Baptist pawl ih pekmi an si cun, "Reverend pek na tul nawn lo. Kan mission ih rah nan si" an ti ih, an Reverend an pom sak ih, an hmailam a tluang zet.
Hi a tlunlam pawl cu, pawlkom tumpi pakhat sung ih um a hlawk zia pawl ka ngannak a si. Kei khal, LTBA tefa ka sinak, cun, FBA sung ih mino pakhat ka sinak pawl kha Pathian in thluasuah a pek ih, Baptist pawl hmang in, Pathian in, hi tluk in hlawknak i pek a si.
Pawlkom-awknak le pehtlaih-awknak a um lo tikah, Pawlkom hmin in training an tuah tikah, kan khua pawl kan sung thlang ding. Kan tlaangkulh pawl hrang hna kan tuan ding tiah kan ti tikah, a tu cu keimah le Pa Mang kan um ih, kan khua hrang kan telh cih ding tiah kan ti ruangah, nauhak tlawng hrang le telephone khal bomnak kan khua in kan co ngah ve. A dang khal Pathian in tuah theinak kan tlaangkulh pawl hrangah thluasuah in pek vingvo leh ding tikah, kan khua khal Laizo Tlaangkulh Baptist Area ih nan tel ve ahcun, tampi thuhla rel a ol zet ding. A tu lungpi pawl tla, LTBA ah an rung kom ti ka thei ih, ka lungawi zet.
Cun, mihrek in Local ih kan um le, kan mahte duhzat in lakkha kan pe aw ding, thil kan tawlrel thei ding, Saya khal kan duhmimi kan sawm thei ding tiah nan ti ding. A si cumi cu a dik. Asinan, Laizo Tlaangkulh Baptist Area ih nan kom khal ah, himi pawl hi nanmah te nan tuah thei thotho. Baptist ih kaihhruai awk daan ah, Local church cio in anmah le rem ti daan cio in, feh theinak thu an nei pei timi hi Baptist ih fehpi daan a si. Asim duhmi cu, FBA le, LTBA in Ebenezer Baptist Church cu a uk lo pei. Amah le rem ti daan in a feh pei ti duhnak a si. Curuangah, a tu ih, nanmah te nan tuah theimi pawl, nan kom ruangah, nan tuah thei lo dingmi pakhat hman a um lo ti hi ka lo sim duh.
Kan mifim deuh pawl zoh hnik sehla, Saya Za Thio khal khi, UPC ih an luu bik a rak si nan, a fale pawl ih thansonak ding lam zin le Pathian hna a tuan theinak kauh ter a duh tikah, Baptist ah a lut ih ziangtluk kau in Pathian in a hmang. Ram dangdang tiang hman in an sawm.
Saya Tha Nei Fai, tlawng dangdang ah tlawng a kai ko nan, Baptist kawhhran ah a um fefe ih ziangtluk a hnatuan theinak a kau.
Pu No Than Kap hman Pathian thu sim lo, naingnganzii hril awknak ah ngah a duh tikah, Baptist ih luh lo cun, ka cang thei lo ding ti a theih tikah, Falam Baptist Church, Yangon ah member a lut.
Culai ah, Saya Cate, Baptist in pawl dang ah a feh ih, a tu ah Pathian hna a tuan theinak ziang tluk in a fiak. MBC le MCC level tiang ih tthangso thei dingmi pakhat zohman ih hman lo in, hram lak ah a par men. Lei tlun ramkip ah midang ih sawm rero dingmi a lam a fiak theh. Ka pamhmai zet.
Kan mifim le Pathian ih mihman pawl kan timi pawl in an hmu fiang tuk. Pawl dang pawl hi an tum a bang nan, Baptist pawlkom leh pehtlaih awknak tluk ih a fek le a kau kawlram ah a um lo ti an hmu tuk. Ram leeng ka thlen deuh deuh tikah, kan Lai tlaang le kawlram ih pawl fate te pawl hi, zo hman ih theih lomi pawl fatete pawl an si. Thu thimnak ah, Fundamental ti maw, Gospel ti maw, Faith timaw, The Church tivek hrimhrim ram leeng ah zo thawn hman pehtlaih awknak an nei lo. Laimi kawhhran pakhat hnih thawn fang pehtlaih awknak an nei. Hi tawk US lam ih Baptist pawl lala thawn peh ding an zuam ciamco sawn tihi ka ra hmu.
Curuangah, ka ca a sau zet thlang ih, rinsanmi nu le pa, u le nau pawl hnen ah, a netnak ih zaangfah ka lo dil duhmi cu, midang thawn pehzom uhla, nan sunnak ding zianghman a um lo ding. A hlawknak lawnglawng nan hmu ding timi hi a si. Midang thawn nan pehzom awk lo ih a tu vek ih nan feh vingvo ahcun, a tu hruaitu thatha nu le pa le pawl, nan um lo cun, kan fale san ahcun, kan ttumsuk zet leh ding. A tu ih a tthangso rero laimi kan mino pawl hman hi, an tthansonak ah a fiak ter zet zo ih, a dawnkham rero zo a si ti thu zawnruahnak thawn ka lo ruah duh a si.
Hi ka nganmi thu pawl ah, kan khua duhdawtnak le zawnruahnak thawn ka ngan nan, ttong mawi lo tla a um sual pang le, i ngaithiam hram uh. Kan khua ra tlun ih kan khua tthansonak tawlrel ding hi ka thinlung ih ka hiar bikmi a si. Kan tuah thei dingmi a um pang le, nan nih ih tuanvo cu, a man thawn in sim pei ih, kei le kan khuapi ram leeng ummi pawl in, kan ti theimi hmuahhmuah cu a tuah thei kan rak zuam ding ti khal ka lo cah duh.
A tu hi, Ph.D ngah theinak ih a tulmi cazirmi hmuahhmuah cu ka thehtheh zo ih, ca in ngan termi ka ngan rero lai. Cumi ka cangan ka theh cun, Ph.D nan fahniang in ka hlam ve leh thei ding. Thlacamnak in in mang ti khal ka thei ih, ka lungawi zet. Kei khal ka lo mang ringring so khaw.
Nan fapa,
No Kolh (San No Thuan)
USA
No comments:
Post a Comment