Martha ih a tipalh mi

Cule Zisu in a sangih a hnenah, "Martha, Martha, thil tampi thuhla ah dawrhar le thinbuai in na um asi hi.A tulmi cu thil pakhat lawng asi.Acui thiltha cu Mary in a hril zo.Cumi cu a hnen ihsin lawnsak a si lo ding,"ti ah a ti.{Lk.10"41-42}.

Voikhat cu kan Bawipa Zisukhrih le a dungthlun pawl khaul an tlawn lai ah,Bethany khua ih Martha tei inn ah a va thleng{Lk.10:38-39,John.11:1}. Martha cun Zisu le a dungthlun pawl ei ding ti le rawl a timlamh sak ih Mary cu Zisu'i kehram ah a thu ngai ding in a to{Lk.10:39-40}.Martha in bang zet in Zisu le a dungthlun pawl hrangah a tuan nan Bawipa a lungawi lo, a di a riam lo. Bawipa'i hnatuan rero si ih Zisu'i di riam cuanglo hi a um thei a si cu.Ziangruangah ha asi ke,,,,

1. Martha in Zisu taktak hnak in a rawngbawl a buaipi sawn ruangah{Lk.10:40}.

               Pathian hnatuan hi a sunglawi tuk mi le a ropi tukmi hnatuan a si ko nan, Amah Bawipa hnak ih a hnatuan kan buaipi ahcun suallo vek in langhman sehla Bawipa a lungawi theilo asi. Mi hrekkhat cu Bawipa'i hnatuan ah kan buai tuk ih amah taktak pawl manlo, amah thawi can hmang manlo khop ih a hnatuan kan buaipi ah hin Zisu a lungawi lo lawlaw asi. Pathian ruangih rawngbawlnak programe neih tam thei tla hi a sualnak cu a um lo men ding, asinan amah taktak pawlkom manlo khop ih rawngbawlnak programe kan neih cun Bawipa alungawi theilo asi.Asile zumtu Bawipa taktak maw a rawngbawl ha kan buaipi deuh...?Zisu in thil zianghman amah ai ih kan duh, amah ai ih kan buaipi a sianglo asi.Thlacam le Bible siar thei nawnlo khop ih rawngbawlnak ruangih kan bangmi hi Setan in kan thahnem ngainak hmangih in bum nak cikhat asi.Rawngbawl rero vek si kan nunthup a ro asi ahcun tisa nak maktara a si zo asi. Thildang cu rel ding a um lo, amai rawngbawlnak lala hman amah Pathian taktak kehram ih to ih a thusim mi ngai hnak ih kan buaipi pohpoh cun tisa nak asi zo asi.

2. Martha ih tipalh lehmi cu Zisu'i hrangih a rawngbawl nak hi mdang hmuhsualnak ah a hmang{{Lk.10:40}.

                      Bawipa'i hna cu mi an tuan maw tuanlo ah kan buai ding asilo, mi an tuanlo khal le Bawipa'i in fial vek ih tuan men ding kan si Israel pawl hruaitu Joshau bang in{Josh.24:14-15}. Kawhhran sungkhal ah mi hrekkhat cu Bawipa'i hna kan tuanmi in midang er nak, hmuhsualnak le midang sawisel nak ah kan hmang pang theu. Hihi tisa rawngbawlnak asi. Mi Pathian thlaru kaih hruainak ih rawng a bawl ahcun a rawngbawk nak ruangah midang dem le hmuhsual nak ah a hmang dahlo ding. Pathian zangfahnak hnatuan thei ih a um hi Pathian a thangthat in a lungawinak ah a cang sawn asi.Kan rawngbawlnak in midang a tirit maw? or a tizang khai?Midang hrangah kan rawngbawlnak hi hahdam tertu a silo ih mi phurrit tertu asi cun tisa nak ah an lut zo tinak asi. Pathian thlarau hrauinak hnuai ih mi in rawng a bawl cun a rawngbawlnak hnuai ah mi an cawl hahdam asi,,mi an ritter dahlo.

         

3. Zisu'i hrangih a rawngbawlnak cun mi parih thinhengnak a thleng{Lk.10:40}.

            Pathian duhzawng ih rawngbawlnak cun taksa lam ah ziangvek in bangkhal hai sehla, thintawinak a thlen dahlo.Lungawinak taktak sungah mi ahruai sawn{Saam.100:2}.Uanu kawhhran sungah siseh, hmundang ah siseh na rawngbawlnak in midang parih thinheng nak le innsang khal ah thintawinak in thlen pang asi ahcun Thlarau kaihhraui nak hnuai ah rawngbawl lo in tisa in rawng kan bawl ruangah asi.Mi in Pathian Thlarau kaih hruai nak hnuai ih rawng a bawl ahcun amai nun ahahdam, ih a kiangkap khal an hahdam asi. "Zohman thinheng ding khop in Pathian hnatuan thei kan umlo". Ka tuantam tuk si ka thinheng khal le ka mawhlo ti thei kan um lo.Amai zangfah nak lala ruangaih tuan thei fang kan si ee{1Kor.15:8-10}.

4. Mahlawng tuan vek ih theih awknak{Lk.10:40}.

Martha in keimah lawng i tuan ter a ti. Pathian hna kan tuan tikah mah lawng tuan tha, midang tuanmi cu ziangsilo, mai tuandan lawng hi Pathian lungkim ding vek ih ruahawk aol te.Bible cun "zokhal maibul thil lawng ngaihsaklo in midang thil tla ngaihsak uh"{Phi.2:4} in ti asi.Langsar zet ih Pathian hna kan tuan rero hmang kan tilai ah langsar lemlo ih kan tluklo mi an rak tam lutuk ti tla ruah thiam atul. Martha in keimah lawng i tuan ter hi...ati bangih mahlawng Pathian ih duhtling ih Pathian hnatuan ih neihawk aol te. hihi tisa nak pittawp asi. Mi hrekkhat milai hmuhdan in crusade le camping an tuah dahlo, kawhhran sungah hnatuan sang deuh tla an kai lemlo nan anmah le Pathian karlak ih nun ropi lutuk hi an um asi.

Martha ih tipalhmi hmang in Thlarau lam nun dik kan zir theinak dingah Pathian thlaw in suah hramseh.

                         

Evan. David ceu