MAH LE MAH THAH AWK HI

            "Zokhal mi a thattu cu amah khal mi kut ah a thi ve ding,ziangahtile milai cu Pathian bangih tuahmi a si"'{Gen.9:6}.

 

            "....tualthat zokhal amah ah kumkhaw nunnak a um lo ti nan thei"{1John.3:15}.

 

                              Tulai ah mihrekhat mah le mah that aw an um hnuaihni theu, Bible sungah ziangtin in sim in, inzirh ti kan zoh hnik kei uh.

 

      1. Bible ah mah le mah that aw kan hmu maw?

 

       2.  Bible sungih mah le mah that aw pawl hi zovek an si?

 

       3. Bible in midang va thah le mah le mah thah awk hi ziangtin a sim?

 

       4. Mah le mah thah awknak hi ziangah a thleng theu?

 

       5. Mah le mah that aw pawl hi vanram an kai kem? {Mi piangthar taktak amah le amah a that aw kem?} tivek pawl hi a tawi zawng in kan zohhnik kei uh.

            Kan Bible a kim zetnak pakhat cu thiltha lam lawng silo in thilthalo tuahtu pawl ih tuahmi khal a ngan kim thluh hi a si.Kan Bible ah mah le mah that aw kan hmuhmi an um hnuaihni a si.A zate cun kan simcawk lo ding nan a hrekkhat kan sim pei.

                   1.Saul siangpahrang{1Sam.31:4-7,1Sansiar.10:1-7}

 

                   2. Ahitophel{2Sam.17:23}.Amah hi David that dingih thurawn petu Absolom ih lamtang pa kha asi. David that dingih a thurawn pekmi an pom lo ruangih beidong ih that aw asi.2Sam.17:1-23}.

 

                   3.Judah Iskariot {Matt.27:3-10,Act.1:18-19} an si.

 

           Hipawl hi Bible sungih mah le mah that aw pawl an si.An thuanthu zohtik ah Saul siangpahrang Pathian thlarau ih a suahsan ih khawsia ih an luhhnawh hnu le Pathian a hoisan ih Pathian khal in a hoisan ruangih a rah a si{1Sam.16:14-15,28:6-7}. Ahitophel a Pathian hriakthih David thihnak ding tawlrel tu le thurawn petu a si, Pathian hriahthih thihnak ding thurawn a peknak ih raktha lo a don mi a si{2 Sam.17:23}. 

            Cun Judah Iskariot le kan theiuh zo vek in paisa duh ih a Bawipa hman zuar poi tilo pa a si, Zisu khal voikhat hman ka Bawipa ti dahlo "saya pa"ti fang men ih ko ringringtu{dungthlun dang pawl cun Zisu hi Bawipa tiah voitampi an ko},Zisukhrih le a dungthlun pawl ih tawmawk mi paisa khal fir hluahhlo mai asi{John.12:6}. hipawl nun kan zoh a si le an zate in an nun ah Pathian a lal lo, Pathian thawi an karlak peihtlaih awknak thalo lawnglawng an si.Curuangah kan Bible in milai nunnak lak hi a siang hrimhrim lo{Gen.9:6}. Midang nunnak va lak{mi va thah} le mah le mah thah awk hi a bang aw ciah asi ti hi Pathian ih hmuhdan a si. Ziangah tile nunnak timi hi kan mai ta a silo ih Pathian pekmi a si ruangah kan mai duhduh in midang nunnak siseh, kan mai nunnak khal siseh lak theinak kan neilo asi.Bible cun "Mi that zohman in kumkhaw nunnak an pai lo"ati asi.

            Mi tampi cu an nun ah beidong lutuknak, thihar tuknak{depression}an tong theu, athu phunphun ruangah an nun an ning theu, asinan mai nun tiang vun lak awknak ding taktak nak lak ah mi piangthar taktak cu Pathian in a humhim hai a si. Mi piangthar taktak in mi a that ding na zum maw? Tum hrimhrim cun a that dahlo ding. Ziangmaw ti ih khon ngah pang ti pang tvp.{Thimnak ah motor ih taih pang tivek} silo ahcun a mai thutluknak rori in zumtu mi piangthar in mi a that dahlo ding. Cuti asile zumtui taktak in ziangtin mi nunnak a lo lo tu cun amai nunnak teh a lak awk ding? thil cang thei a silo. Curuangah mah le mah that aw timi hi{ Thimnak ah, accident tivek ruangaih thluaksiatsuah awk ruangih at pang tivek} lo ahcun zumtu hrangah a cangthei hrimhrim lo mi a si. Mi pakhat amai tum hrimhrim ih mi thattu khi a piangthar ti ngaihnak aum lo, cuvek ciah in mah le mah that aw kumkhaw nunnak pai an um lo{1John.3:15}.

            Curuangah milai nunnak hi a man a khung tuk leilungpi hnak ih man khung sawn mi a si{Matt.16:26,Saam.49:7-9},Pathian ih pekmi nunnak a si ih kan ta asilo a petu Pathian ih ta asi{Ezk.18:4-5}, curuangah a petu Pathian lawng in lak theinak le pek theinak thuneihnak a nei asi. Mi nunak khal siseh, kan mai nunnak khal siseh lak theinak right kan neilo hrimhrim asi. Bawipa thawi um tlang le feh tlang dan zir uhsi, Amah thawi nun tlang cun leitlun khal hi hmunnuam bik a rak si thotho. 

          Na nun le kan nun hi kan duhduh ih siatsuah dingah silo in amah sunglawihnak dingah Bawipaí in pekmi a si{1Kor.10:31}Curuangah Bawipa'í in sersiam san vek ih kan nun cun mah le mah thah awk duhnak lamlam kan nun ah a um lo ding. Hla phautu in "Amah thawi kan feh ahcun nunsung ka tonmi hmauh hi lungawinak ding lawng an si ee"ati kha. ""Nang na umnak kip cu ka hrang vanram asi'' ati fawn.Bawipa in tumtahnak tum pi nei in nunak in pe leitlun ah in semter, cumi kaingah tuí hrangah cun nunman neihnak bik asi.Amen

                                   

Pathian in siartu zate nun ah thusim hramseh.

                                            

Evan. David Ceu