Pathian naih uh la, anih khalin a lo naih ve ding.
Curuangah Pathian hnenah tlulut uh. Diabol/Setan cu do uh, cule a lo tlansan ding.
Efesa 6:10-17 ah Setan donak ralthuam ṭha zetzet a phunphun Pathian in a mai falepawl in pekpawl mi in sim.
Setan hi Pathian sersiammi lakah a fim cungcuang(Ezk.28:11-17). tui ni tiang minungpawl hnak in huham a tum sawn(Heb.2:7) Minung sinak men cun Setan hi nehrual ci a si lo. A si nan IJohn 5:4 ah Jesu zumtu taktakpawl cu leitlun nehtu kan si a ti lala. Setan hin kan nih cu sim hlah, Bawi Jesu hman a thlem/tukfawrh ngam (Luke 4:1-13).
Jesu cu sualnak nei lo riai a si ruangah lenglam ihsin Setan in a thlem ih minungpawl cu piangtharpawl telin sual cithlah kan si ruangah sunglam le lenglam ihsin Setan in in thlem/tukfawrh ṭheu. Thu duhum zet kan neih mi cu Kan ralpa Setan nehnak ṭha tak kan neih mi hi a si.
Cupawl tla cu:
1). Pathian hnehih tlulut(Surender) hi a si.(James 4:7)
Kan cang hril mi ah Pathian in fiang zetin in sim. Thil dang ciamco a si lo. Thil har khal a si lo. Kanmah te ṭan reronak in a ngah lo.Jesu in Keimah tel lo in ziang hman nan tuah thei lo a ti.(John 15:5). Kanmah ten Setan le a hopawl kan do le kan sung ringring ding. Kan cah le a nih khal a cak sin ve. Jesu/Pathain kan ṭul. Pathian pumhlum ih rinsan, kan ziangkim Pathain hnenih ap a simnak a si. Unau kan nunak Pathian hnenah tlulut/hlan aw/ap aw tawp sehla cucu a si Setan nehnak ṭha bik cu.
2). Pathian naih hi Setan nehnak hmanrua ṭha tak a si.(James 4:8a)
A Pahnihnak cu Pathian naih/ cucu Pathian thawn um tlan/nun tlan/feh tlan/Pathianthawn thuruah tlan/ṭuan tlan hi Setan nehnak a si. Pian thar hnu ah cun kanmah lamih tuah/ṭuannak/thiltinak a ṭul. Pathian kan pan hmaisa lole anih khal in in pan ve lo ding. Kan pan hmaisak ta a ṭul tinak a si cu. Pathian thawn kan um tlang, kan feh tlang a si le cu Setan in a tuar lo, in ṭih tuk a tlan vurvo mei.
Kanmah lam rinsan aw tuk hlah uh si. Milai rinsan hnakin Pathian rinsan a ṭha sawn( Sam 118:8-9). Kanmah lam lawng ṭang nawn hlah uh si. Kan hmuh thei mipawl le milaipawl rinsannak in a ngah lo.Pathian thu thianghlim in Setan nehnak ṭha bik in sim sal mi hi a takih hmangtu cun hlawhtlinnak/nehnak a co ding. Vawi khat te lawng na hmang a sile vawi khat te lawng nehnak na co ding ih na hmang ringring a sile cu nehnak na co ringring ti hi Pathian thusuak a si ti hi thei ringring in.
Pastor James Van B Cung
BC, MI,USA
No comments:
Post a Comment