Zovek hi Politician (Naingngan zi tamaa )?

Tohkham sangzet ih topa hi maw Politician ( Naingnganzi tamaa ) kan ti bik?

Politician thufim ah hi tin a sim.

Politician ( Naingnganzi tamaa ) ti mi cu, Misenpi van tlang ih ei in, sin fen, inn le lo tulsam mi a tuahsak( a phu hruksak )  thei tu hi a si tin kan hmu.

Hlanlai ah cun Leilung bel in rawl kan rak suang theu. Cui belnu cu tappar ih rawl kan suanah, a hnuai ih meisa ka tih cun a so rero. A sinan cui belnu tappar in kan cawi-ih meisa tih lonak tappawn ih kan toh ( ret ) khal le belnu cu a so dai cuang loin a mah ten a so rero thotho.

Cu vekin Politician ( Naingnganzi tamaa ) ngaingai pawl cu sinak sangih an to-ah simaw, to lo ah simaw misenpi vantlang hrangih ei-in, sin fen, inn le lo tulsam mi tuahsak duhnak catbang lo-in an thinlungah an nei ringring.  An tuahtuannak a lang ringring theu. Belnu bangin an thinlung ah a so ringring thotho.

Mitam pi cu, sinak sangih an to lai lawngah Politician ( Naingnganzi tamaa ) vek in an cangvai theu nan, sinak sang an tohkham ihsin an tum hnu cun senpi vantlang hranngih an hnatuan duhnak hi an thinlung kapkhat hman ah a um nawn lo. Thengre vuakthlak bangin a dai reprep.

Hivek mi-pa hnakin, veng kilkawr ih nuhmei nu, pahmei pa hin,an khua/veng hrangih tlang hnatuan pelhdah lo, siatni,thatni khalih mi tawiawm thei tu, an khua/veng hrangah a thei pa tawp ih hnatuan thei theu tu, nuhmei le pahmei te hi Politician ( Naingnganzi tamaa ) ngaingai an si sawn lo maw?

Cu vek in,

 Biaknak lam khal ah tha ka pe aw duh.

Hruaitu upa si lai ah cun, khawm taima zet, ziangkim ah taima tu si ringring, peknak lam khal ah langsar zet ih pe thei tu kan um. A tha ko e.....

A sinan Hruaitu upa tlin nawn lo cun Biakinn hman palkai mumal lo, peknak lam khal ah thlahdah aw vivo, taimak suah cu rel lo, a hmelhmuh ding hman kumthluk thlacang ih hmuh ding um fang, Hruaitu upa pawlih kaihhruai dan sawisel hmang Pa/Nu kan tam lai e. Ringtu cu ziangvek din hmun te-ih kan um khal le Pathian ram thansonak dingah le a kawhhran thansonak dingah a theitawk te ( a tlin tawk ) in a cangvai ringring tu kan si a tul. Belnu bangin a so ringring tu kan si a tul. Hi vek nun neih hi ringtu in kan tulbik mi a si.

Duhsaknak ih ka ngan mi a si.

Ka lung awi

Zadun
Adelaide
SA