Memorial Service of Rev. Khuang Lian Kap

by San No Thuan

Texts: 1 Cor 11:23-26, Matt. 26:26, Saam 23:1-6, John 14:1-3

Thuhmai hruai

1.     Hngilh lonak (Memorial service) tuah ding ih in fial hmaisa biktu hi Jesuh a si ih, Jesuh in ziangmi hngilhh lo dingah in fial?

2.     Baby Pa in ziang hi cinken ter in duh?

3.     Harsatnak kan ton tikah Pathian hi khui tawk ah a um? (Saam 23:1-6)

1. Jesuh le memorial service

Jesuh ih in theih ringringnak dingah a ti tikah, a ziang bik hi cinman ter in duh si pei? Bawipa zaanriah a pek lai caan cu thinglamtah ih a thih hlan te ah a si. An thawi an vuak le thinglamtah par ih an thlai dingmi pawl a mitthlam ah a lang zet ding. Culai caan ah himi tonghi a tongmi a si: “In theih ringringnak dingah” hi sang le cabitti hi run hmang ringring uh a ti.

Mihrek in Jesuh ih sinak pawl: profet, puithiam, le siangpahrang a sinak pawl cinman ter in duh si ding tiah an ti. Mihrek in Pathian fapa a sinak pawl cinman ter in duh si ding tiah an ti. Cumi pawl khal cu a tel ko ding. Asinan, a hleice ih cinman ter a duhmi sawnmi cu a dam sung sunzaan in a sim, a zirh, a nun daan in a langh ter reromi Pathian ih uknak, “The reign of God” hi a si. Cuih Pathian uknak cu Jesuh in lei tlun ih a rat zo ruangah Amah in a thok ih, asinan famkim zet ih kan tonteh ding caan cu Vaan ah a si leh ding. Luke 17:20-21 sungah, Jesuh in Pathian uknak cu nan hnen ah (nan sungah) a um zo tiah a sim.

20Farasi mi ṭhenkhat in, “Ziang tikah so Pathian Uknak a ra thlen ding?” tiah Jesuh cu an sut. Jesuh in, “Pathian Uknak cu mithmuh in a ra lo. 21Zohman in ‘Zohhnik uh! Hinah a um hi! Khinah a um khi!’ tiah an ti lo ding. Ziangah tile Pathian Uknak cu nan sungah a um a si,” * tiah a ti.

A nunnak zate in a sim, a zirh, a langh ter ih hi leitlun ah a din zomi Pathian uknak le a fehdaan (system) lamzin (The ways of the Kingdom of God) pawl hi hngilh hrimhrim hlah uh tiah in tinak a si.  

Jesuh in thu a zirh tintein a simmi cu Pathian uknak ih umzia lole lamzin (system) cu:

1.     Antamci vek, thilnu (colh) vek, - a tuhtu pawl in an tuh tikah, a fate zet nan, tumpipi ah a cang, thil a thleng theh thei ti pawl a sim.

2.     Thuhmi hlawnthil vek – a hmutu pawl cu thil dang hmuahhmuah an taanta thei.

3.     Fapa tlaan hlo pa a sim tikah, Pathian ih uknak ahcun Pathian in kan sualnak hnak ih tummi duhdawtnak thawn in duhdawt, kan sinak bang tuk in in cohlang ringring ih, kan sualnak khal in ngaithiam thei ti pawl a sim.

4.     Mina le mithi a thawh ter tikah a sim duhbikmi cu Pathian ih uknak ah natnak le thihnak a um nawn lo ti pawl a lang ter.

5.     Thlacam in zirh tikah khal a timi cu, “Vancung ih na duhnak a kim bang in leitlun khal ah kim ve seh" tiah ti uh in ti. Van lawngah Pathian uknak, duhnak kha kim ding si lo in, kan innsang, kan Kawhhran, le leilung par khal ah Pathian ih duhmi kim ding hi Jesuh ih in zirhmi a si. Pathian ih duhmi si lo mi feh daan le ziaza pawl kha kan hlon pei ih, Pathian ih duhmi ziaza, lungput le nun daan kha cohlang in kan nun pi ding a thupi zet.

Biaknak lam hruaitu pawl le Judah biaknak upa pawl le Rom ralkap pawl cun, kan thah lo ahcun Pathian uknak a timi in in neh ding ih, kan tokheng le Rom uknak a cem ding tiah an ruat. Curuangah, kan thah ahcun, a simmi pawl, a nun daan pawl le a minung pum hrimhrim khal hi a hlo mei ding ih Pathian uknak khal a cemrel men ding ih Rom cozah lawng a hmun ringring ding tiah an ruat. Rom cozah uk daan le feh daan lawng hmun ringring ter an tum. Cuih a hmun ter tum daan cu, ral naam le fei le cahnak in a si.

Duhdawtnak le Pathian Uknak

Rom cozah cun Pathian uknak cu hriamhrei cahnak le thazaang in dinsuah an tum. Asinan, Jesuh cun, duhdawtnak in dinsuah a tum. A thih zik tikah, an that ding ti a thei. Culai khal ah, Jesuh in, sang le sabiti cu a lak ih, “nan sual ngaithiamnak hrangah a phel kuaimi ka taksa le ka thisen a si” tiah in sim (Matt 26:28). A sim duhmi cu ka nunnak liam tiang ka lo duhdawt ih nan hnen ah ka lo umpi. Keimah ih ka lo duhdawt bang in Pakhat le khat duhdawt aw uh ti khal in cah bet.

Jesuh in a mah hngilh lonak hrangah Bawipa Zaanriah in hman ter tikah, riahsia ding le ttap ding sawn si lo in, vanram nuam dinsuah ding ih a tumtahmi kha cingmang in dinsuah vetu ding kan si. Cumi dinsuah daan cu kan thazaang in a si lo. Kan thinlungah vanram nuam ih umtu khuasak daan, Jesuh nun ih a lang zomi pawl kha pom tahrat ih nunpi ding khi a si. Cui lamzin cu duhdawtnak le zawnruahnak lamzin a si.

Bawi Jesuh hi lei le van tuahtu a si ko nan, in duhdawt tuk ruangah, fate aw ter zet le tangdor cuh tein thinglamtah par ah thi hlah sehla, puar thau zet le hngal zet in ral tla do ciamco sehla, tuih sunah minung hizat in kan duhdawt ding ka zum lo. Kan sunlawih ding ka zum lo. Duhdawtnak cun mi a neh ih, mi ih lung a hno ter. Zoso in zawmtai zettu a thih tikah riahsia ciamco dah? In duhdawttu a thih tikah a si kan thin a rak nat ih ka riah a siat. Curuangah, Jesuh ih Pathian uknak khal minung tampi lut dingih nan sawm tikah, keimah ih ka lo duhdawt bang in va duhdawt uh. Cun, an thinlung a thleng ding ti in simnak a si.

2. Baby Pa ih thuanthu le A Hmuitinmi

Hivek ih Baby Pa, Rev. Khuang Lian Kap le Pi Fung Lian Thluai hngilh lonak (memorial service) kan tuah tikah, ziangmi hi kan hngilh lo dingmi pawl an si? Pi Fung Lian Thluai cu ka thei tuk lo nan, Baby pa cu kan kom aw thei zet. Hla thiam le hla duh zet a si. Hnih suahsai thiam zet khal a si. Fimthiamnak lam khal ah M.Th tiang a rak zir. Pastor khal kum reipi a tuan. Cun, TTC ah lecturer tla a rak tuan. Mirang ca le tong khal a thiam zet. Cumi pawl hi kan cinken ding tha zet a si. Asinan, cumi pawl ih leng ah Rev. Khuang Lian Kap in cinken ter in duhmi a um hrih ding ka zum.

Baby pa in kum hi zat sung a rak tuan reromi hi ziang a si? Hla ih a rak phuah reromi pawl hi ziangthu an si? A rak simphuan reromi pawl hi ziangthu an si? Ka nunsan tiah a rak timi hi ziang a si?

Veikhat ah Baby Pa thawn an mileeng khan ah thu kan rel ih, I timi cu, “Pathian uknak sungah kan mipi pawl lut terta lo in, ziangtin cuih uknak sungah cun an thangso thei ding. Curuangah Khristian nun ih hrampi bik cu rundammi ka si ti theihnak hi a si” tiah I ti. A dik ka ti nasa.

Mi hmuahhmuah in Bawi Jesuh in I duhdawt, ka sualnak I ngaithiam, ka sinak vek in I cohlang ti theih ding hi a duh bikmi a si. Cumi a theitu pawl cu Anmah a duhdawttu Jesuh ih duhdawt daan bang in midang an va duhdawt sin a si. Christian life, Christian nun timi cu Pathian ih tong duhmi tong suak, Pathian ih miduhdawt daan in mi va duhdawt khi a si. Cucu, Baby pa ih a nun san le tumtah bikmi a si.

3. Rev. Khuang Lian Kap ih Theology le Psalm 23

A dam lo tuk ih thlacamtu pawl hnen ah feh ding in an forh tikah a timi cu, “Damnak cu Pathian a si ih, cui Pathian cu ka hnen ah a um ringring. Damnak timi cu thlacam thiamtu pawl parah a thum aw lo. Dam ter I duh ahcun, Pathian in I dam ter ko ding” tiah a ti. Saam cangantu David bang in a zumnak cu a fek ngaingai.

Saam 23:1-6

1.     Bawipa cu I hruaitu (c. 1-4).

a.     Bawipa in I khal ringring ti a fiang tuk. Tlimno lak ah I hruai ringringtu ti a thei (Caang 1-2).

b.     Thazaang thar thawn I khah ter ih, I tiamcia vek in lamzin dingah I hruai (c.3).

c.      Thihnak horkuam sung khal ah I umpi.

2.     Bawipa cu rawl I petu (c. 5)

a.     Rawl I pe.

b.     Hriak I culh. Welcome.

3.     Curuangah ruahsannak nung a nei.

a.     Ka nun sung hmuahhmuah thatnak le duhdawtnak cun I thlun ringring ding.

b.     Bawipa ih inn ah kumkhua in ka um ding.

c.      Zumtu cu kan thih hnu khal ah kan thlennak ding a um.

Thunetnak

1.     Jesuh ih memorial service hman daan in zirhmi cu, a nun sung a sim le a zirh reromi Pathian ih uknak thu kha hngilh lo ding in duh sak. Cui Pathian uknak cu duhdawtnak ih din ding a si zia khal a nunnak in a langh ter ih, Jesuh ih duhdawtnak le sual ngaithiamnak thei in, cui duhddawtnak le sual ngaithiamnak thawn khat le khat duhdawt aw ding khi Memorial Service ih in zirhmi a si. Cutin, Pathian uknak a simi duhdawtnak ram cu a kau sin ding.

2.     Baby ih hmuitinmi vemi cu mi hmuahhmuah Pathian ih duhdawtnak an theih ding le cuih duhdawtnak thawn duhdaw aw ding hi a si ve thiamthiam.

3.     Harsatnak kan ton tikah Pathian cu lam in hruaitu, kan tulmi in petu a si ringring. Curuangah, ral tha zet in hmailam ah Bawipaih tuanvo lakmi ka si ti thei in hnangam tein hmai ah feh uh si timi khal Rev. Khuang Lian Kap in in sim duh.

4.     Tuih sunah kei teh Bawipaih ttangkaa ah ka cawl leh ding si khaw, cutikah “ziangtin midang in in ciingmang pei aw?” ti ka ruat aw zet.