A Pali nak Pa (The Fourth Man)

      Pupat thawih tah cih mi puan parih a tleu depdo mi lungvar bangtuk Jerusalem khawpi  cu Judea tlang parah din a rak si. Cuih Jerusalem Pathian khawpi cu Leilungpi ih Saklam le Thlanglam in sin siseh, Nisuah nak lam le Nitlak nak lam in siseh a lai fang bikah a rak um. Jerusalem khawpi sungah cun Jehova Pathianih Biak inn pi sunglawi zet mi a um ih a biaktheng (Thawimi halral hlan nak) par ah cun Pathian fate pawlih sual ngaih dam nak thawinak cu hlan kai a si theu. Jerusalem khawpi –ih lamzin pawl ah cun Prophet pawl in Pathian ih dik le fel nak thu pawl an au pi-ih Biaknak puai pawl an thawi-ih cu ticun Pathianih dan le dun pawl ram sungah an tlang au pi zok re ro.

       Pathian cun Jerusalem khawpi sungah a fate Israel mi pawl a um pi.

Jerusallem ih sin a hlat zet nak hmun pakhatah khawpi pakhat a rak um, cuih khawpi cu kutthem thiam sangbik thiam pawlih  sakmi khawpi a rak si. Lungto ih dawl mi phar sahpi cu pi zathum a sangih a kauh lam cu Rangleng pariat ar tlangih tlan zuam awk thei nak tha khop in a kau. Cu tlukih sangmi le kau mi lungdawl phar thawih peng sarih kimvelih kulh mi Babylon khaw pi cu a mawi zetih a kiangah a khai aw mi vanpar hmuan tla a um. Cuih van par hmuan cu Babylon Siangphawhrang Nebuchadnezzar in a nupi hrangih a sak sak mi a si-ih Leilung tlun mangbangza thil lakah a tel ve. Tiva mawi zet Euphrates tiva pi cu Babylon khawpi hel kualin a luangih khawpi cu a mawi ter sin sin.

      A nung Pathian si lo mi, van lam hoi in pi zaruk sang milem Bel biakinn pi cu Khawpi laifangah a um. Milem Bel biak in biaktheng parah cun a hngawngih dek that mi ramsa thawi nak pawl an hlan ve ih an hlan theh hnju ah Babylon khaw pi sa zuar nak dawrah an va zuar theu. Himi ruangah so khaw Daniel le a rualpi thalai pawlin Siangphawhrangih sa pawlthawn kan ti baal awlo ding an ti san nak kha. “Milem pathian hmai-ih hlankai ciami thawinak sa kan  ei duh lo” tin ral tha zetin an el.

    Nebuchadnezzar cu Leilung tlunih puar le hngal bik Siangphawhrang a rak si. A ralkap pawlin Leilungpi an rak do neh theh ih Jerusalem khawpi an rak lak tikah Daniel le a dang Hebrew tlangval pathum khal an kai ih Babylon ah  an hruai cih. Nebuchadnezzar cu Leilung tlun milai zo khalih el theih le dotheih rual lo siangphawhrang a raksi.

     Pathianih mi leh sa Israel fate pawl Pathian hoisan ih a thiang hlim mi Pathianih dan leh dun an bawhsiat tahratih lampeng an zawh ruangah Pathianih forh fial nakin Nebuchadnezzar cun a ralkap ziangmawzat thlaler ramro kaltlangin Jerusalem khawpi cu an va simih an neh.

      Tuboh leh sobul tumpi pi thawn Babylon ralkap pawl cun Pathian khawpi Jerusalem kulh bang lungto phar sahpi pawlcu a suk kuai thehih Pathian biak innpi khal an siat thehih thil man khung pwal an lak theh ih hleiah mino thalai pawl khal salah an kai-ih an hruai theh. Cumi Hebrew mino pawl lakah Shadrach,Meshach le Abednego khal an tel cih.

Jerusalem tanta in Babylon lam an feh ruah ro lai tlang zim pakhatpar in Jerusalem sut bal theh mi an khawpi an hei cuan let tikah an reh a sia tukih , “O Jerusalem, O Jerusalem kan lo hngilh cetci ah cun kan lei hi tlun lamah bet aw seh cule tong thiamlo in um uh si” tin an cam siat aw.

Zarh hnih thum lai a rei hnu ah Babylon khawpi sung an thlengih milem bia mi Siangphawhrang salah an tang. Euphrates tiva pi kamah an hruai-ih Babylon mi pawlin an ra zoh ih hi ti n an ti, “ Nan ting tang kha in tum sak uh la,  nan Zion hla cu in sak sak hmen uh” an ti tikah, ziang tin so kan thlen dahlo nak ram dangah kan Patian thangthat nak hla cu kan sak thei ding tin an sawn.

An kiangkapih thil mawi pawl tla in an thin a nuam ter in an hna a ngam ter thei lo. Babylon mi pawl cu awnmawi perh khuang ting tang a phun phun an tumih lei ah bok phah in an za an bengih hi ti hin an au ;

             “Kan siangphawhrang Nebuchadnezzar  a va sunglawi ve!

               Leilung tlunah Pathian dang a um lo Nebuchadnezzar lawng kan pathian” an ti.

Sadrach, Meshach, le Abednego te cu Babylon mi pi hi milai pakhat a si ve mi Nebudchadnezzar siangphawhrang hi an pathian tiah an biak a si hi maw a va poi ve an ti ih mangbang le awlok song in an um. An zum nakah hnget zetin an dingih an kunin an bok ve duh lo. “ Keimah siarlo Pathian dang biak hlahuh,” ti mi thu kham kha an cing ring ring. Jehovah Pathian pakhat lawng a um, Babylon ah siseh,Jerusalem ah siseh, vanah sis eh,lei ah khal siseh, Pathian pakhat lawng a um, tin hnget khoh zet in an um.

BIAKNAK CU HNIKSAK A SI DING [Religion will be tried]  

Himi tlangval pathum cu hrial thei lo mi thil thawn  an tongaw:  biaknak dik a si lo le zumnak dik hniksak nak an hnenah a thleng. Jerusalem ah an um khal le Babylon ah an um khal le hniksak nak cu an tuar a si ko. Satan [khawsia vanghru] cun an dung in a thlun tum thlang.

Methodist Bishop pakhat cu Pathian thu thangtha  sim dingin USA ram sung hmuah hmuah a tlawng ving vo. A to mi tlangleng cu khaw fate pakhatah rei lo te a cawl. Kuli phur dingih hngak tu mi dum pa a kiangah a hmu. Kuli pa tiah Bishop pa (Pastor) in a ko.

Kuli pa cun ziang na tul Pastor tiah a sawn.

Bishop in nan khaw sungih biak nak lam thawn peh parin milai pawlih cangvaih dan ziang a bang. Biaknak[zumnak] ngaih dan hlun feh pi mi pakhat tal an um maw?

Kuli pa in tampi an um panteh tin a sim.

Cule” Bishop in an dungin Satan in a thlun maw” tiah a sut.

“A si an dungin Satan pan a thlun” tiah kuli pan a let.

Satan cu mih dungin a thlun vingvo a si.Keimah khalhi Satan in ka dungin i thlun ti ka thei.

Khui tawkah na um a si khal le, khual na tlawng a si khal le na biak nak le na zumnak hniksak na si ring ring ding. A tu Pathian thu kan sim nak hmun khalah mi thawng tampi cu hniksak in an um re ro a si.

Zan khat cu thu ka sim nak Pulpit hmai ah rundam ka si hrih lo a timi pawl ra dingin ka ko tikah fala no te mawi zet pakhat hmaiah a ra suak ve. Rundam ka si ti fiangten a theih awk tikah lungawi zetin a to nakah a kir sal ih a tlangval pa hnenah lung awi zetin hi tin a sim: “ Tuih zanah mangbangza in Jesus in ka tlun ah hna a tuan so khaw, ka hnenah thlacam nak puan thlam sungah ra ve aw, nang khal Bawi Jesu hi i rundam tu tin na pom ve dingah kalo duh sak.” Tiah a sawm tikah a tlangval pa in hmaiton in a hnih san nek nek.

Fala nu te ziang tuah ding le sim ding a thei lo. Tlangval pa in bangle in a hnihsan ih hnihsuah sai nakah a hmang tikah fala nu cun a tlangval pa cu hmaiton in na pin a zoh ih daiten hi tin a sim.” A tha! Ka hnenah van ramah na ra duh lo a si le kei khal na hnenah hell ramah ka lo thlunve lo ding.”

Hih fala nu te in felfai ten hmuhnak dik tak a nei. Khuitawkah ka feh ding ti felfai ten a thei. Midang khal a thlen nakah thlen ter a duh ve. Mi dang zo khal a hnenah an ra ve duh lo khal le a mah lawng a feh tho tho ding ti hi a fiang aw tuk.

Kan dung a liam cia mi thla hnih laiah nu pi nu pakhat hnenih sin zangfah dil nak ca ka ngah.  A pasal cu a biaknak ah a fel fai lo, a tum thul a kai thul, a lut thul a suak thul bangtukin a mah le amah fiangaw lo in a um. A mah cu kan khawm awkah vei khat a ra telve ih zumnak fel fai zet nei vekin a thla hnih thum lai cu a um lawk nan a hnung tawl sal la la.

Nu pi nu cun an pa cu kan groupah rat el ve in kan hnenah khual tlawng ve seh tin in dil nak ca a si. A ca sungah hi tin a ngan: “ Kan pa hi na hnenah a lo thlun ve ih na kung kiangah a um ring ring le a zum nak a felfai ding.” tin a ngan.

Hih ca thawn peh par in khua ka ruatih ka ruat suak mi cu hi tin a si. Biaknak a silo le kan zum nak hi kan kiang kap thil um dan men men a si lo, kan thin lung sungih kan ruah dan le kan lung put hi a rak si sawn. Mi pakhat a sual a siraw ih  Pathian thil ti thei nak huham a thlarau thawn a pehzom awk hnu ah sunglam daih nak le hna ngam nak a neih mi hi a si. Na thinlungsungah Bawi Jesu Khirih ih thlarau ci na tuh ngah a si le thlarau tha zang siseh, din pimi thu hnget khoh  le a thang sin vingvo mi zumnak a lo pe ding.

Mi pakhatin dinhmun felfai(Priciple) nei-ih Pathian rian duh nak lungput le hiar hal nak a neih a si ah cun a biak nak(azumnak) in thil ti thei nak huham a pe ding. Nangmah pumpak biaknakle zumnak in cakzet le ral tha zet ih nun khawsak theinak a lo pek a si ah cun ziang vek kiangkap tihnungza le din hmun der thawm khal ah neh nak na co ding. A dik a fiang felfai nati a si le  Amen ti aw.

Cuih ruangah Nu nau nuih pasal cu a tuih a um nak Biak inn a kai thei ring ringih a Pathian zumnak a kai fekih a ti cak aw thei a si ah cun keimaih group ah ra ih kan khual tlawn nakah a tel ve kher a tul lo. Kanmah te ciar kan zum nak thanglian ding le cak dingah cawlhcang (exercise) a tul.  Kei le kan group cu Pathian hrangah raldo dingin hmalam kan nor. Kal khat hmai kan nor ve leh satan in kehlam vorhlam, hmalam dunglam in in do ring ring. Hi vek ral do nak sosang zet hmunah nu nau nuih pasal a ra vele a him pei maw? Dai zet le him zet nak hmun an inn sung hmanih a him lo a ti a si le,hi vekih raldo nak sosang zet hmunah nu nau nuih pasal a ra ve le a him thei pei maw?

A him thei lo ding! A hrangih thil tul bik cu a thinlung tak takih Pathian a zumih a thlarau cu kumkhua a hngetmi Lungpi parih a cawlh ter hmasa kha a si. Pathian lamzin diktak a thlun duh ngai ngai-ih ni tin te Pathian a rinsan nak (a zum nak) a cawlhcang ring ring a si ah cun  thil thalo le kiangkap tih nungza pawl in thil ti thei nak zianghman an nei lo ding. A zumnak nungin a kaihruai pei-ih nelrawn ramro ram car lakih khual a tlawn khalah tikhur a tuah sak ding. Cu ti cun  dodal tu ralkap tampi kaltlang ih phar dawl sangpi lan hlo thei tu pa bangin na zangkhai zet ding.

Shadrach, Meshach le Abednego rual tut hum cu a zuar thlai tu pa in Siangphawhrang Nebuchadnezzar hnenah “ O Siangphawhrang bawipa na uk nak ramsungah tlangval pathum na milem hmaiah kun duh lo an um a si!” tin a sim.

Siangphawhrang Nebuchadnezzar cu a thin a heng tuk ih:

 “Cuih pawl cu ka hnenah run hruai uh” a ti

A rei hlanah Shadrach, Messhach le Abednego cu siangphawhrang hmaiah an thleng.

“ Rimawi  tum mi aw nan theih tikah ka milem hmaiah kun in in biak duh lo ti hi  thu hman a si maw?” tin a sut tikah ,” a si kan kun in kan biak lo.”tin ral tha zet in an sawn.

“ Thil um dan hi nan thei fiang lo a si maw.?” a ti la la.

“ Thei fiang ko ve,” tin a sawn.

Cu le Nebuchadnezzar cun tlangval pathum cu, “ Veikhat can ka lo pek sal, rimawi awn nan theih ve ten nan bok pei-ih ka milem cu thaten in nan biak pei,” a ti tikah ziang poi lo in an um kel in an ding fe fe kha siangphawhrang pan a hmu.

Cu le siangphawhrang cun, “ nan thei fiang maw thei fiang lo  maw keimah cu pathian ka si, ziangah ti le leilung tlun ram hmuah hmuah ka neh lawng si lo in an pathian khal ka lak sak theh ih Babylon khawli pi ah an pathian hmuah hmuah cu thingkhon  pen in ka pen  theh ruangah keimah hi pathian ka si.” A ti aw.

Shadrach, Meshach le Abednego ten kan tlunah ziang a thleng ding ti an thei.

Nebuchadnezzar in hi tin a ti la la,”  Jerusalem ka sim ih ka neh tikah nan Pathian ka hmu lo. Nan Pathian cu tham theih lo mi le pianhmang nei lo Pathian a bang, cu ruangah Pathian nan nei lo. A tunah ka milem zukpi hmaiah kun in in biak lo a si le nung cungin  alh hluah hlo mi meipi sungah ka lo paih ding,ka kut sungin a lo run suak thei tu ding Pathian a um pei maw?”

PATHIAN CUN ZIANGKIM A TI THEI (God is able)

Malte hman thuk thun lo in, mitthep kar hlanah “Kan biak mi kan Pathian cun in runsuak thei!”an ti.

Kan Pathiancu thil a ti thei!

“Kan Pathian cu neh tu a si!”  Kan Pathian parah kan lung awi.

“Kan Pathian cu neh tu a si!” tin van mi pawl lungawi in au hngai seh.

“Kan Pathian cu neh tu asi!” cak lo le derthawm pawl A liang parah hngat aw hngai seh.

“Kan Pathian cu neh tu a si!” Siangphawhrang lu khuh khum ter uh.

“Kan Pathian cu neh tu a si!”Milem be pawl an thin hengin thil thahnem lo ruat hngai seh.

“Kan Pathian cu neh tu a si!”siat ral nak cun nam nuai tum ko seh.

“Kan Pathian cu neh tu asi!” Satan pa cu a thinhengin au rero ko seh.

“Kan Pathian cu neh tu a si!” lei tlun siangphawhrang pawl tih le khur in um hngai seh.

“Kan Pathian cu neh tu a si!”siangphawhrang Nebuchadnezzar cun a duh le mei pi kha a sat kel hnakin let sarih in sa ter ko seh.

Shadrach, Meshach le Abednego te cun an Pathian cu ziangkim ti thei Pathian a si ti an thei.

An ralthat nak lang ter men dingah an sim mi a si lo, an theih nak le an ton cia mi thil par ah dingin an sim mi a si. An Pathian cu ziangkim ti thei Pathian a si ti cu an thinlung muril ah hminsin a si zo.

Ziangkim ti thei Pathian kan nei ti cu Profet pawl khalin an rak phuang zo. Psalm hla phuah tu khal in a rak sak rero zo. Rihlisen vun nel parah Israel fate pawl khalin an lam ih an au pi rero zo. A thlarau thianghlim le a kut cak a pharih thil ati thei zia kha an cing ring ringih fel fai ten an thei. Hmuh thei lomi le tham thei lo mi an Pathian cu Pathian ngai ngai nau tat tule mibum hmang an hmai iha ding mi milem pi hnakin biak tlak Pathian ngai ngai  asi zia hgnet khoh zetin an zum.”Kan biak mi kan Pathian cu ziangkim ti thei asi,” tin an au. “ Kan Pathian cun in runsuak thei a si,”an ti. “ O siangphawhrang pa aw na kut sungin in run suak thei a si.”

 Pathian cu ziangkim a ti thei a si ti an thei.Patian in a run suak ding ti an thei.

Siangphawhrang kut sung ih sin an Pathian in a run suak ding tian thei.

Pathian an zum dan a hngetkhoh zia cu kha tin a si.

Nebuchadnezzar in tlangval pathum pawl cu Babylon hruang kulh sungah khum thei hman seh la an biak Pathian cu an mah bawm dingin a lut thei tho tho,hruang kulh lengah a tangter thei lo.

Nebuchadnezzar siangphawhrang cun Hebrew tlangval pathum hi Jerusalem  then aw terin hlat ter hmanseh la an Pathian thawn a then thei cuang lo. Jerusalem ih sin a hruai hlo  nan an Pathian cun a thlun tho tho. An Pathian thawn then theih rual an si lo.

Pathian cu Shadrach, Meshach le Abednego a um pi ring ring. In umpi ring ring ti khal an thei fiang ruangah mi lem hmai ah an kun duh lo, in run suak pam ding ti fel ten an thei. Mi zo khal Pathian tha teih na theih fiangih na zumah cun Pathian in a lo thei fiang tuk ti hi ziang tik khalah hngilh hlah aw. Na Pathian a si hrim hrim tin pom fek awla biak aw.

 Hih Hebrew (Israel) tlangval pathum in kan biak mi kan Pathian ziangkim ti thei cun in run suak ding ti lawng an ti lo hleiah , in run suak lo a si hmanah na mi   lem hmaiah kan kun tahratin kan biak dah hrim hrim lo ding an ti bet lai.

Pathian hmin simse tu siangphawhrang hmaiah  a tu bangtukih raltha zetih zumnak dinpi ngam tu hi an um dah hrih lo a tu hi a vei khat nak a si. Nebuchadnezzar siangphawhrang cu a thinheng lawng si lo in a tih le khur in a um. A mah dodal tu a um thlang ti a fiangih hi te pathum kathahih ka suasam theh lo ah cun ka uk nak rei a daih thei lo ding  tin a ruat. Hrum leh rak phah in a ralkap cak bik pawl a ko ih meipi  kha sa ter uh la Shadrach, Meshach le Abdnego kha cuih meipi sungah paih dingin thu a pek, a uk sung ram mi pawlin in tih sin sin- in in dodal ngam hlah hngai seh a ti duh nak a si.

Nebuchadnezzar in a ralkap sungih mi cak bik pawl cu Shadrach, Meshach le Abednego kha tawn hrem dingin thu a pek.( Pathianih mi leh sa pawl a tihzah deuh a si ding an hni puan a phoih ter lo). Ralkap pawl cun tlangval pathum cu an hni puan thawn a tem cih ih mei pi sungah an paih. Mei pi le a sa tuk fawnih  an man mawh phah thawn an naih tuk ruangah ralkap pawl lehlam cu a sa tuar thei lo in an thi.

MIH THU THLUN TU PAIH NUN NAK  HUALVAN (Fate of a Compromiser)

Hih ralkap pawl hi zo so an si? Siangphawhrang thawih naih aw bik le a mi rinsan bik pawl an si. A kedan an hnawt sak theu ih, a hmaiah an kunih a thupek hmuah hmuah le a fial mi hmuah hmuah thlun tu an si. Cu tih an um ruangah ziang si an ngah? Siangphawhrang thu cu an thlunih mei pi an naih tuk ruangah  a sa tuar thei lo in an thi a si lo maw. Ol teih siat ral thei mi le kang ral thei mi an si. Tuar thei nak an nei lo.

Thu napin ruat lo ih mih thu thlun hmuam hmo tu pawl cu neta bikah an tuar theu.

Shadrach, Meshach le Abednego ten hi tin an sim, “ Kan kun lo pei, meipi sungih kang kan tuar sawn pei” an ti. An biaknak le an zum nak thih pi cilh an duh sawn, a dik lo mi biak nak thlun hnakin. A diklo mi lem biak nak hmaiah an kun duh lo ih an kang thei velo! ti an hmu suak.

Ral kap pawl cu Pathian a si lo mi an siangphawhrang hmaiah an kunih an biak ruangah an kang. Ka  Pathian hnatuan nakah mifel mirin tlak zet pakhat ka rak tong dah. Ka Bible zirhnak le ka Pathian hna tuan  nakah a rak phur ciamco ih hi tin in rak ti.” Unau Roberts , a hlanah Pathian hi hi tlukin ka parah a tha ti ka rak thei dah lo, mangbangza ngai ngai a rak si.”  A mah hi ka thlacam sak nakin a rak dam suak ih a maihPathian hna tuan nakah  thlarau thang phawk nak a um ruangah a rak ti mi a si. A thuthang tha phuan nakah neh nak  le hiar nak thar thawn a khat. Minung pawl ih thinlung a cawk tho ih a maih thinlung sung khalah thazang cahnak thar a ngah.

Ni khat cu hih ka rual Pastor paih churh member  u pa deuhpakhat in fianhrial deuh ah a rak ko ih  a tu bangtukih thu na sim ring ring a si ah cun na Koh hranin an lo dawi ding tin a rak sim. Ka rual pa Pastor pan a koh hran u pa paih thu sim cu a lungih a phur kelin phur nawn lo in a phur nak kha a rak sup aw.  Neh hnu lamah keimaih phur zet le that ho zetih thu ka sim theu mi kha i sawi sel ih ka cangvaih dan le ka thusim dan pawl in dodal thu  ka thei. Koh hran u pa paih thu  thlun ih um a that thu a nemhnget thu a sim duh ruangah in sawisel  mi a rak si. A  rualpi a rinsan mi hrek khat pawl tla  a thlak theh leh lamih ruahnak tha an pek khal le  a tha hnem nawn lo. Neh hnu thla hnih lai a rei tikah a thlarau cu a ro in a ro ih Pathian run dam nak thu thang tha cu a ka in a suak thei nawn lo a do dal zawngin a feh leh lam thlang.

Hih  ka rual pa hrangah ka khuk ka bilih Pathianhnenah a thil tisual mi ih sin luat dingah thla ka cam sak rero ziangah ti le a maih ruah nak zumnak dik kha dinpi lo in mih thu a rak thlun mi hi poi ka ti tuk. Si khal seh la ka thlacam nakin a tlin nawn lo. A si lo mi le a diklo mi hmaiah a kun zo kangral ve ding a si thlang.

Thla tampi a rei hnu ni khat ni ah mi pakhatin a mit thli thawn  i ra tongih, “ U nau pa Roberts, Pastor ... kha mi paih thu na thei zo maw,” tin in sut.

“ Ka thei lo so khaw, ziang a cang so,” tin ka sut.”

“A maih Koh hranin zangfah nak malte hman um lo in an dawi.”

“ Mangbang nak mal te hman ka nei lo, a maih ngaih dan teh ziang vek so a si?”

“Palang kekkuai theh vek a si ko, athil tisual a thei aw ih a siraw ruah ro a si ko. Mih thusawh kha rak lung lo ta seh la a than an a ti aw rero.”

Si ee ka rual, a dik a si si. Mih thu kha ol ten rak lung men ding a si lo. Pathian thu dik zum lo ih milaithu na thlun sawn ih an hmaiah na kun a si ah cun na sun nak le siat ral nak na parah a thleng dingih mei sa ih kang mi vekin na ciamral ding. Mi lai hmaiah kun lo ih na zum nak fek teih na feh pi  a si ah cun na Pathian in a lo kil khawi ring ring dingih na kang ral dah lo ding.

Ka rual pa Pastor paih a nun nakih a hmuh suak mi le a ton mi cu Pathian ih thil ti thei nak cah nak kha a thinlung  takih pom in thu a rak sim tikah mih thinlung, thlarau le taksa tiangin a rak ti dam thei zo nan ti kha a hmu suak. A hnatuan nakah milai thu ngai lo in Pathian thu lawng rinsan ding ti hi a hmu suak. Pathian thu thawn lawng rak nung ta seh la ka Kawhhran thawn keimah thawn ka run suak aw thei ding nan . Ka rual Pastor cun,” a tun hi tin ka cangzo ih a hlanih ka rak zum dan le ka tuan dan vek in ka thok sal ding ding,” ti thu thluk nak a tuah.

MILAI THU KAN RAK THLUN RUANGIH THIL A CANG MI PAWL  (Things we have compromised)

Kawhhran sungah mi tampi cu milai thu lung le thlun in an um theu. A hlanih kan thinlungput dik pawl kha Kawhhran sungah a rak nung in mih thinllung a rak neh zo nan ne ta lamah milai thunei thei pawlih hruai sual nak an thlun sawn theu. Pathian hnatuan  tu(Pastors) tampi thlarau thiang hlimih hriakthih nak thawn thu  thang tha an rak phuang theu nan tuih sun tuih niah milai thil ti thei group pawl  ih thu sawn thlun in lam peng an zawh  ruangah an kangin an ciamral theu.

Tun laiah mih thlarau kang rim le an hnipuan kang rim pawl a nam re ro. Tun lai ih Kawhhran dinglai pawl Pathian thlarau thu thawih feh lo ih milai thu hnuai-ih an feh sual nak thu pathum in ka mawh thluk duh. Cuih pawl cu:

Bible thianhlim nak (Bible Holiness). Thinlung lam thianhlim nak, Taksa thian fai nak, Hih khawvel thawih cokpolh awk lo nak le Nun thianhlim nak hi Bible thian hlim nak pawl an si. Hih “thianhlimnak” tongkam hi  kan fih zawng le kan huat zawngah an cang. Thianhlim nak rim cu a hnim in kan hnim duh lo. Pathian thu thang tha kan sim nakah siseh ni tin kan thu ruah nakah siseh kan zah pi leh lamih kan telh duh lo. A sinan Pathian in thianhlim nak cu a duh. “Pathian cu a thianghlim”ti mi hi Bible ih a au pi bik mi a si. Bible sungih “HEBREW” ca uk ngan tu pa in hi tin forh fial nak ca a ngan. “ ......thianhlim nak um lo in zo hman Pathian an tong thei lo” tin a sim.

Thianhlim ter awk nak ih sin thinlung lam thianhlim nak siseh nun thianhlim nak siseh mi pawl ih hminsin nakah a cangih Kohhran hnatuan tu pawl le Pathian hrangih pumpe aw tu hrek khat pawl hrangah cun hmuh niam nak ah an hmang . A sinan Pathian cun, “ thianhlim ter awk nak cu Pathian duh zawng a si” a ti.

Kawhhran hrek khat pawl cun thianhlim nak hi rak hua in rak dodal hman hngai seh la tuih sun tuih ni ah cun thianhlim nak lam an pan sal, ziangah ti le  thlarau thianghlim thil ti thei nak huham nei thei dingah cun hmaisa bikah ti thianhlim awk ta ih hih khawvel  ha hio nak pawl feh san hmasa ta a tul ti an hmuh suak ruangah a si.

Hih Kawhhran sungih thil a cang theu mi leilung tlun buai nak le hnai hnok nak pawl neh thei dingah cun a hmaisa bikah Bible thianhlim nak thu minung pawl an thianhlim hlan lo zirh awk le simawk ta a tul.Zokhal Pathian thawn peh zom aw thei dingah cun hmaisa bikah hih khawvel duh nak pawl a dungtun ta lo ah cun a peh zom thei lo ding. Thinlung thianhlim nak le sual huat nak hi Pathian duh bikmi a si. Thian hlim nak cu thlarau thianghlim le taksa, vanram le hell, ding fel nak le sual nak pawlih ramri a si. Hih leilung tlun hahio nak cu duh ham nak le maih tanghma hai nak lawng lawng a si. Leilung tlun duh nak hi cu mih zawn ruat lo ih maih duh zawng lawngih khawsak hi a si.Lei lung tlun duh nak hi cu tarhfah nak le duh ham nakin a ciah aw mi nun nak a si. Cu bangtuk nun nak nei mi pawl cu milai pawl in, “ a khawvel mi tuk “ an ti theu. A mizia thatlo dan, a duh ham dan dan le mih zawn a ruah lo pawl, zukhmawm lam a supawk theilo zia pawl an zoh ih a sungmuril thil umdan pawl a puang suak theh. A nun thianhlim lo zia pawl kan sim fiang pei ih Pathian hnenah hlan aw ih a nun a thian hlimter a tul thu duhsak nak thawih kan sim a tul. Cu ticun khawvel thil lawnih a buaipi mi cu Pathianin a thinlung sungin a  laksak ding. Thianhlim nakin a sunglam dam lo nak pawl a dam ter ding. Leilung tlun thil buainakih sin luat hi thil sunglawi zet a si. Thianhlim nak cu duh ham lo nak a si. A sinan mi zokhal siseh Bawi Zisu thisenih  a hlanawk lo le a thianhlim awk ter loah cun a mah ten a thianghlim aw ter thei lo ding.

Kan thu pom mi ah siseh,  kan thuthang tha phuan nakah siseh, kan Koh hran ih thupi kan ti mi ah siseh, ni tin te kan nun nakah siseh Bible thianhlim nak hi kan telh cih ih kan ruat cih ring ring a tul.

Thlarau thianghlim Baptisma can nak(TheBaptism of the Holy Ghost)  Tlunlam pindan an um laifangih dungthlun tu pawl  Pentecost zingih meisa le thlarau thianghlim ih a run tlak lai  thawn pehpar in thu ka lo sim duh. Thlarau thianghlim a thu pit zia hi Pathian siar lo zo hman in an jthei thiam lo. Pathianin dung thlun tu pawl kha tlunlam ih sih thilti thei nak huham a ra thlen hlanlo hngak dingin thu a pek. Pathianin hi tin a ti, “Tuih ni ih sin ni tampi a rei hlanah nan mah cu thlarau thiang hlim baptisma nan co ding”tin a sim.

Thlarau thianghlim baptistma co hlan nak cu hai rual loih thil fiang zet mi a si, cuih hrangah a si dung thlun tu pawl thla rau thianghlim an co hlan lo hngak dingin thu a pek nak san cu. Dung thlun tu pawl thu pek an si vek le tiamkam an si vekin  a rei hlan ni hra sungah  thlarau thianghlim baptistma cu an co ngai ngai –ih cu theh ve ten mangbangza thil pawl an hnenah a rung thleng.

Thlarau thianghlim pek an si vekin  tong danglam in an tong. Cuih tawk pindan khanih um hmuah hmuah in van ih si-ih a rung mi Thlarau thianghlim a takin an co ih mei alh a hliau ih hliau ral that nak huham an ngah ih mipi lakah Thinglamtah parih an khenbeh mi  Bawi Zisu a thawh sal nak thu an sim ciam co. Ral that nak huham um lo cun Rundam tu khen bet tu misual pawl hmaiah nor ih thu sim cu thil har sa zet  a si. A sin an Thlarau thianghlim in cah nak le ral that nak huham a pek.

Thlarau thianghlim baptistma can nakih sin dungthlun tu pawl hnenah mangbangza thil a thleng. An lakih mi pathum hnenah a hleice in a thleng: thlarau rundam nak, mi dam lo dam ter thei nak , hrem nak le harsat tuar thei nak pawl an co. Thlarau thianghlim um pi nak ruangah mipi lakah nuam zet le phur zet in Pathian thuthang tha an sim ving vo.

Ziang ruangah kanih pawl thlarau hlo tampi kan kai thei lo, ziang ruangah mi na kan dam jter thei lo, ziang ruangah hrem nak tla kan tuar lo. Thlarau thianghlim baptistma can nak cu kan zumih kan thinlungin kan dinpi ko  nan.

Pathian in kan co hlan dan par ah in thlawsuah lo a si. Kan hnipuan parah meisa rim a nam lai. Kan thinlung put le kansi dan kan thlengih  thu ngai ten Pathian hmaiah thinsau zetin kan hngakih Thlarau thianghlim Pentecost ni ih an co mi kan co ve asi ah cun thla rau hlo tampi kan kai thei ve dingih mina pawl khal kan dam ter thei ve ding. Cu tic un kan Bawi pa ZIsu hrangah ningzak le mualpho kan tuar a si le sun lawi nak cu a ra thleng ve ding! Amen

Ti dam nak (Healing) Kan Bawipa Zisu Khrih ihzawn ruah nak ruangih tidam nak le duh sak nak ruangih kan nat nak le thusia le buai nak tlunhnawhnak pawl ih sin in run suak ti cu kan pom zo. Himi thu hla thawn peh par in a tu sanih thuthang tha sim thiam zet le thlarau hlo tam zet kai thei a si nan mi dam lo pawl tlunah zawn ruah nak a tlasam ih kan BAwi paih tuanvo pek mi phur paih lo tu  pa hnenah hi tin ka sim,” mi dam lo pawl dam ter uh la khaw sia khuavang ih kaih mi pawl dawi suakuh” ti mi tuanvo kha na lak lo pei maw? tiah ka sut.

 A nih in, “ kha mi pawlcu nang maih ti dingah ka tan ta” in ti.

“ Ka lung awi, ka hrangih tuah dingih na tan ta mi cu ka tuah pei cu” ka ti.

In rundam tu Bawi Zisu Khrih cu sual nak, damlo nak le khawsia vang hru thawih a khat mi Leilung tlun ah a rung tum ih hitin a sim, “Thlarau thianghlim in in thuamih, farah zonzai pawl hnenah thu thang tha phuang ding in siseh, thin kuai lung kuai pawl hna ngam nak le daih nak pe  dingin siseh, satan khawsia salih tang mi run suakdingin siseh, mitcaw pawl khua hmu ter ding le hliam hma tuar mi  pawl damter dingin hriak in thuh a si.”

Bawi Zisu tho tho in,” Fifir pa cu fir ding le that dingin a ra; a sinan kei cu nun nak tlamtling a luang a liam in pe dingah ka ra.” tin in sim.

Peter in Bawi Zisu ih hna tuan nak thu hi tin a sim fiang bet,” Nazaret mi Zisu cu  Pathian in Thlarau thianghlim thawn hriak a thuh ih hna tha tuan in khual a tlawng vingvo, satan khuavang sia ih zonzaih le hrem mi pawl tla a  dam ter thei Pathian um pi nak thawng in.

Zisu in a dungthlun pawl thu thang tha lawng sim uh tin a thlah dah lo, mina dam ter uh la khawsia vang hru  kaih mi pawl khal dam ter phah uh tin a cah ring ring. Dungthlun tu pawl an hnatuan nakin Zisu hnenah an ra tlung kir salih,” Bawwipa khawsia khuavang pawl Nangmaih hmin in kan dawi suak thei,”tin lungawi thatho zetin Zisu hnenah an sim.

A sinan tuih sun tuih ni ah Pathian hnatuan tampi le Kawhhran tampi cu an thinlung sangka an kharih mi pi pawlih tuar nak le harsat nak pawl an ngaihsak theu lo. Tidam nak hna an tuan lo, midam lo pawl le khawsia kaih mi pawl tlunah ziangkim ti thei Pathianih huham langter ding khal an tum lo.”Thlarau thianghlim umpi nak le  zum nakin nan dam”ti tongkam tla hi an hmang mal tuk.

Profet Jeremiah in hih Kawhhran pawl le Pathian hnatuan tu pawl kha:”Ka minung hliam mi  nan damter mi an mal tuk” tin nun a sim.

Bawi Zisu hmin pu fawn ih dam nak le khawsia dawi nak hnatuan tuan thei fawn lo mi Kawhhran hi cu mawh puh ding tlak an si.Tuih sun tuih ni ah kan lakah Bawi Zisu hi taksa in rak tlang lengve in mina le khaw sia vanghru kaih mi pawl dam ter seh la, mithawng tampi pawlin an mi na lam pi tluanah Zisu hnenah an rak keng ding ih zo hman a lakin a kir ter lo ding ti cu zo khalin kan zum keu keu a si lo maw.

Duh dawt mi u leh nau pawl, tuih sun tuih ni ah ziang si kan cangih, ziang si kan lakah thil dik lo a um? Ziang si in hnung tolh ter tu? Dam ter nak zum nak khui ah kan heih? Thu thang tha sim pawlih,” mangbang za thil ti theinak can a liam zo,” tih thil hman lo in sim mi,” kan lung ding maw si. Kan thinlung mu ril sungah Bawi Zisu Khrih cu manisun, tuih sun le a kum khua a hmun ring ring, a thlengaw dah lo ti!” kan thei keu keufawn. Ziang ruang bikah hi tin kan cang.

Kan mah le kan mah kan kai tho aw pei. Bawi Zisu Khrih a rung tum cing ding. Mi tampi hell sung ih sin lak suak zang kan tum pei, kan lakih mi naa kan dam ter pei uh. A tun hi phun ciar can,thin heng le tawh awk can a sin nawn lo, ngaih dan le ruah nak bang lo mi elaw ih to aw ciam co ding khal  kan sin nawn lo, kan Bawi paih tuan ding tih thu in pek mi pawl tuan ih atuih kan san minung pawl run suak dinglawng kan hnatuan a si.

KAN TON DING MI MEI PI( Life’s Fiery Furnaces)

Shadrach, Meshach le Abednego rual tut hum cun mei pi in in kang ding a si hmanah milem hmaiah kan kun lo ding.” An ti. Siangphawhrang cu a thin a heng tuk ih an hnipuan thawn tawn cih mi Hebrew tlangval Pathum cu a alh kel hnakih let sarih ih sa mi mei pi sungah a paih. Meipi sangka cu napin an vun kharih a khar tu pawl dungah an sip. Hebrew tlangval pathum kangral ding cu an hngak.

Kan ton dingmi mei pi tuih sun tuih ni khalah kan hmai ah a tak in a um. A tunih a khawm mi mi 8000 lak sungah mi za tampi a kel hnakih let sarih sa mi meipi sungah paih nan si thei men. Na dik nak le nafel nak, naruah nak ruangah mei pi sungih paih ding din hmun ih na din khal le milem hmaiah kun hlah.

Kan lakih mi hrek khat pawl nan duh dawt zet mi nan rualpi pawlin an lo zuar thlai men ding. Ka duhdawt mi ka rual pipawlin kei khal in zuar thlai tikah meipi ziang tlukin a sa ti ka thei. Rualpi hrek khat pawl cu thu pi hla pa sim ding mumal nei lo in in dung tun hlo theu. Rualpi tha ih tlan san tlukih mei pi sa dang hi ka hrangah a um lo.

Can hrek khatah cun sumpai  tlak siat nak le Leilung tlun thill ri tlaksam nak, hlohral nakpawl hi mei pi sangka ongtu an si.

Kan dung caan kum kul laiah mipi hnenih Radio ih thu than nak lamih in hotu pa ( National Radio Director) Lee Braxton in hih mei pi sa hi a rak tuar dah. Cu mi lai ah Motor lam mechanic a rak tuanih zarh khatah $30.00 a rak hlawh. Ni khat cu pakhat paih motor tha zetin a rak tuah sak thei ruangah motor nei tu pa in zarh khatah $70.00 hlawh thei nak  motor ret nak kilkhawi tu hna tuan a pek.Lee Braxton lung awi zetin a co hlang. A sin an cu pa cun zarhpi sun khal cawl lo in na tuan ding a ti. Lee Braxton ih biak nak thawn a remcang lo zet mi thil a rak si. Hlan lai pi ih sin Bawipaih ni thianghlim  cu cawl  ding tin tha teih rakzirh mi a si fawn. A inn kaw sung sang hrangih a tul zet mi zarh tin a hlei ih $40.00 ngah ding mi cu a rak lak nawn lo. Kan dung thla khat rei laiah hih thu in rak sim sal tikah Motor nei tu pa hnenah ziang tin na sim tin ka sut. Lee Braxton cun, “ ka colh ni pahbal ding cu rem kati lo ih hnatuan in pek mi hi ka tuan thei lo ding ruangah in ngai thiam aw tin ka sim.”

“ Cuih hnu ah ziang si na tuah? tiah ka sut

“Ka hna tuan nak hlun zarh khat $30.00 tuan nak hmunah ka tuan sal,” tin in let. Cuih hnu zarh hnih thum rei hnu ah Lee Braxton cun ,” zarh khat $70.00 hnakih tam hnatuan nak  ngah lawng si lo in ruah ban lo pin zarhpi ni tuan tul lo ih cawh ni a ulh thei thu,” in sim.

Ka rual Braxton cu hi tin ka sut la la: “ Atunih na tuan mi tlunah hna tam deuh tuan ding si ta seh la ziang tin na tuah ding? “ Pathian hi a pakhat nakah ret in ziang kim ka tuah tho tho ding a ti.”Ziangah ti le “Pathian cun ka ruah nak hnakin a let thawng khat tha in in thlawsuah a si .”

A caan caan ah kan nunah mei pi cu tih nungza in, natnak le zonzaih retheih nakin in tlun ding. A cem zo mi caan ih sin tuih sun tiang kan cakdam in kan khawsak a tluang nan vei le khatah tihnungza zonzaih retheih nak in kan nun nak a run ti cau thei ziang tik lai khalah. Kei cu kanun ah ka tep tuk zo. Ka cuap a pa hnih in TB nat nak mei pi sa ka rak tuar zo.

Job cu a luthlung ih sin a ke zim tiang hma siain a rak tlun tikah, a nupi in a dung tun, a rualpi pawl in a rak sual ruang tin an puh ih an hmuh suamih vutcam tlunah a mah lawng khaw pawngah an tan. A sinan dungah a  sip lo ih a kun duh lo. A nupi in,” na Pathian cam siat aw la thi aw,” a ti hmanah nang nu nau miaa vekin tong hlah aw” tin a hring leh lam. A rualpi pawlin “Pathian in a lo dungtun zo,” an ti tikah Job in ,” in tlen tu cu a nung ti fiangten ka thei.” Tin a let. Job cu rin san tlak a si ruangah thaten a dam sal.

 Babylon ramah Shadrach,  Meshach le Abednego  rual tut hum cu mei pi sungah an paih.Can malte a rei hnu ah mei pi cu a tawhram ih sin a hliauih hliau in a kangih van cung lamah a kai. Hebrew tlangval pathum cu  cuih mei pi hliau sungah an um.

 Mal te rei ah Nebuchadnezzar cu mei pi sangka kiangah a ra dingih a sung cu a vun bih. Cu tikah a mang a bang zet.  Siangphawhrang fanu fapa le a ram uk tu bawi pawl hnenah hi tin a au ciam co,”Hih tawkah rak ra zang uh!”

“ Mi pathum hri in kan temih meisa sungah kan paih si lo maw?

“A si O Siangphawhrang pa,  mi pathum kan paih a si.” An ti.

“ Zoh hnik uh! Zoh hnik uh! Mi pa li hri ih tem lo mi meipi tal sungah an feh! A pa li nak paih pianzia ruang rai cu Pathian Fapa a bang!” Hallelujah!(Pathian hmin thang that in um ko seh)

A Palinak Pa cu Shadrach, Meshach le Abednego te rual tu thum an tul laifangah bawm dingin  rang zet ina rung tum.A tal zet mi mei pi ih mi kang that thei nak hu ham cu a neh sakih an tem nak hri pawl khal a sah cat sak theh ih Sianphawhrang paih a zoh laifangah Hebrew tlangval pathum thawn kut kai aw in mei pi lai fangah an feh.

Babylon mi pawl inhmuh suamnak thawn Zion hla an sak ter tikah Shadrach, Meshach le Abednego rual tut hum cun an tingtang willow thingkung parah an bangih sak duh lo in an el lai ah vancung lam theih ban khop in a hun hngong. Perhkhuang tingtang rimawi a phun phun an tum ih Nebuchadnezzar milem hmaiah Babylon mi pawl an kun lai ah Hebrew tlangval pathum cu tihphan nak um lo in thuam phun mi bang in an ding tiau tiau. Cu tik lai khalah vancung mi pawl ral ring in an tiaraw thep thep.

Siangphawhrang hmaiah an dingih kan kun lo ding kan kangral sawn ding an ti tikah Pathian Fapa in ”Nan kun lo a si le Kei khalin nan kangral lo nak ding khua ka khang ve ding!”a ti.

Ralkap pawl in tlangval pathum mei pi sungah an paih tikah A Pa li nak Pa cu van boruak kan in a rung zuangih  mit thep kar ah tlangval pathum hnenah  a alh re ro mi mei pi sungah a rung thleng. Meipi sangka an khar zawngah  an tem nak hri pawl a sah cat sakih  a kang thei lo mi van lam thuam hnaw thianghlim thawn a tuam theh. Siangphawhrang pa in mei pi sung a vun zoh tikah an pa li in mei pi sungah mei sa in kang lo in himdam ten an feh tlang re ro mi a vun hmu. A pa li nak Pa ih pian hmang cu Pathian Fapa a bang.

A Pali nak Pa hi zo a si pei?

Semtir nak sungah a mah cu nunau ci thlah a si an ti.

Suahlan nak sungah a mah cu suah lan nak thawi nak tufa no an ti.

Puithiam hnatuan nak sungah a mah cu ( Puithiam)Tlangsuak Bawi an ti.

Mipum siar nak sungah a mah cu sun ih Mero Thuam le zanih Meisa Thuam an ti.

Dan pek sal nak sungah a mah cu Moses bang tuk Profet an ti.

Joshua sungah a mah cu Rundam tu RalBawi a si an ti.

Thu then tu sungah a mah cu Thu then tu leDan le Dun tuah tu a si an ti.

Ruth sungah  Tlentu kan sungkhat u nau a si an ti.

Samuel  a pakhat nak le a pahnih nak sungah a mah cu kan rinsan mi Profet a si an ti.

Siangphawhrang leSansiar nak sungah a mah cu kum khua in uk tu Siangphawhrang an ti.

Ezra sungah a mah cu a siatbal zo mi Minung pawlih phardawl Saksaltu a si an ti.

Esther sungah a mah cu kanmaih Mordecai a si an ti.

Job sungah a mah cu Kumkhua Anung mi in Tlen tu a si an ti. “ Ziangah ti le Job in In Tlentu a nung ring ringti ka thei.” Tin a sim.

A Pali nak Pa hi zo a si pei?

Psalm sungah a mah cu In Kilveng tu a si an ti.

Thufim le Thusim tu sungah a mah cu kan Fimnak a si an ti.

Solomon hla sungah a mah cu Induh tu  kan Mo Pa a si an ti.

Isaiah sungah a mah cu Daihnak Siangphawhrang a si an ti.Jeremiah sungah a mah cu Diknak Thinghnge a si an ti.

Tah hla sungah a mah cu Profet Tap (Weeping Prophet) a si an ti.

Ezekial sungah a mah cu mangbangza Hmel Pali nei mi Pa a si an ti.

Daniel sungah a mah cu Tihnungza Meipi sungih A Pali nak Pa  an ti.

A Pali nak Pa hi zo a si pei?

Hosea sungah a mah cu Rintlak mi Pasal tha a si an ti. “ Hnung tawlh pawl kum khua umpi ring ring tu”

Joel sungah  a mah cu Thlarau Thianghlim le Meisa ih Baptistma pet u a si an ti.

Amos sungah a mah cu kan Thilrit Phurhsak tu a si an ti.

Obadiah sungah a mah cu Luat ter tu Micak Pa a si an ti.

Jonah sungah a mah cu Ramdang ih thlah mi Missionary sunglawi a si an ti.

Micah sungah a mah cu Ke Mawi nei mi Thu Keng tu a si an ti.

Nahum sungah a mah cu Pathian ih hril mi Phuba la Tu a si an ti.

Habakkuk sungah a mah cu Pathian ih Tirh Thlah a si an ti.

Zephaniah sungah a mah cu in Rundam tu a si an ti.

Haggai sungah a mah cu Pathian hnenih si ih kan hloh ter zo mi Roco ter Sal tu( Ro sar salt u) a si an ti.

Zechariah sungah a mah cu nun nak Cerhti a si an ti.

Malachi sungah a mah cu Dam nak Thla thawih a tho ih a zuang mi Ding nak Ni nu(Sun of Righteousness, rising with Healing in His Wings) a si an ti.

A Pali nak Pa hi zo a si pei?

Mathew sungah a mah cu Messiah a si an ti.

Mark sungah a mah cu Mangbang za Hnatuan tu a si an ti.

Luke sungah a mah cu Mihring Fapa ( Son of Man) a si an ti.

John sungah a mah cu Pathian Fapa a si an ti.

Tirh thlah sungah a mah cu Thlarau Thiaghlim a si an ti.

Rom sungah a mah cu Thiam co ter  tu a si an ti.

Korin sungah a mah cu in Thianhlim ter tu a si an ti.

Galati sungah a mah cu Dan ih siat cam nakih sin Tlensal tu a si an ti.

Ephesa sungah a mah cu Ruahban lo Ziangkim nei tu Khrih ( Christ of Unsearchable Riches) a si an ti.

Filipi sungah a mah cu Ziangtinkim kan tul hai mi in Petu Pathian a si an ti.

Kolose sungah a mah cu Taksa ih a rung cang mi Pathian Famkimnak a si an ti

Thesalon I le II sungah a mah cu A Ra Cingdingmi kan Siangphawhrang a si an ti.

Timote I le II sungah  a mah cu Pathian le Minung kar lakih Palai ( Remruat tu)a si an ti.

Titas sungah a mah cu Zumtlak Pastor a si an ti.

Filemon sungah a mah cu kan u nau hnakin in naih bik tu Rualpi tha a si an ti.

A Pali nak Pa hi zo a si pei?

Hebru sungah a mah cu Kumkhua  daih Thukam nak  Thisen a si an ti.

Jeim sungah a mah cu Sibawi sunglawi ( Great Phisician) a si an ti.

Piter I le II sungah a mah cu In Kilkhawi tu Lubik a si an ti. ( A rei hlanah a sunglawi ring ring mi Siangphawhrang Lukhum thawn a rungtum ding mi Pa)

John I, II le III sungah a mah cu Duh Dawt nak a si an ti.

Jude sungah a mah cu Mithianghlim thawng tam pi thawn a rung tum ding mi  Bawi a si an ti.

Thuphuan sungah a mah cu Bawi hmuah hmuah ih Bawi le Siangphawhrang hmuah hmuah ih Siangphawhrang a si an ti.

A PALI NAK PA HI ZO A SI?

Amah cu Abelih Thawi Nak Tilva, Noah ih Khangro, Abraham ih Tufa no, Isak ih Tikhur, Jacob ih Kailawn, Issachar ih Phur rit sawng tu, Jacob ih (Siangphawhrang fung) Lal Kianghrol, Balaam ih Shiloh, Moses ih Kianghrol, Joshua ih a ding ring ring mi Ni nu le Thlapa, Elijah ih thangthat nak le lungawi nak Mei Inn, Elisha ih Kianghrol, Gideon ih Tuhmul, Samuel ih Sahriakdur,  David ih Lunghrivorh (Kuahli) Sling shot, Isaiah ih Hma buah nak Theihnah, Hezekiahih Tikcu le Nikhua  zoh nak ( Sundial) , Daniel ih Hmuh fiang nak, Amos ih Phur rit sawng tu,le Malakhi ih Ding nak Fel nak Ni, tin hmin phun phun in cawimawi ih kawh a si.

A Pali nak Pa hi zo a si pei?

A mah cu Peter ih Thlaam, Stephen ih Mangbang za Hminsin nak, Paul ih pavua le Tanghup kor, John ih Lungvar Khawpi tin khal cawimawi nak thawih kawh a si.

A Pali nak Pa hi zo a si pei?

A mah cu nu leh pa nei lo hngaktah pawlih Pa , Nuhmei pawlih Pasal, Zaan thim lak khual tlawng pawl  lam hmuh tu Tleu le Zingpit Doirel Arsi, Mi zohman um lo nak tlang lakih vak vai rero tu pawlih Tlaanglak Lily Par, Sharon Rose par le Lung kaw sung Khuaizu tin khal an ko.

A mah cu Pathian sunpar nakTleu nak, Pathian Minungih a rung lang nak Simfiang tu Thlaam, Siangphawhrang  Sunglawi Hminthang, Lungvar Mankhung, Ram farah zonzai pawlih Lungpi, a liam thluahthlo mi Khuat hai, Thinhnemtu Kianghrol, A Liangparih in phur tu kan nun nak uktu a si ti khalin a phun phun ih kawh le cawi mawi a si.

A Pali nak Pa hi zo a si pei?

A mah cu Nazaret khua mi Zisu, kumkhua a nungmi Pathian Fapa,  Keimah in Rundamtu,ka rualpi tha, ka Bawipa le ka Siangphawhrang! Tin thangthat nak thawn an ko.

MEISA IN A THAM THEI LO

A Pali nak Pa cu Nebuchadnezzar ih Shadrach, Meshach le Abednego te rual tu thum meipi sungih a paih lai ah zianghman tuanvo a nei ve lo, a si nan meipi sungih sin a laksuah lam kha tuanvo a lak, meipi kha mit sak tum sawn lo in a mi kang theinak huham kha a lak sak,an tawn nak hri pawl tla a phoih sak ih kangral lo ten a humhim sawn.

Tuih zanah u nau nan zaten ka lo jtheih fiang ter duh mi cu Hebrew tlangval pathum te kha  meipi sungih a n paih hlan hnakin meipi sungih an um lai tak kha an zaleen sawn. Meipi  sungih an paih hlan ah  cun tawnhrem an si ih a sinan  meipi sung an paih ve leh an tawn nak hri a poih theh. Tawnhrem phah in meipi sungih paih an sin an tawntem si nawn lo in letsarih ih sa mi meipi sungah zaleen zet in A Pali nak Pa thawn an feh re ro.

SIANGPHAWHRANG A PIANG THAR

“Shadrach, Meshach le Abednego nan pathum in hih tawkah ra suak sal uh” tin Nebuchadnezzar cu a au ciam co thlang.

Pathian thang that phah ih lung awi so par ten an ra suak.Siangphawhrang bawipa in  an hnipuan le an taksa a kang maw kang lo a mah ro ri in a thamih a zoh fel. An sam a hnim an hnipuan tha ten a tham an hmui hmel pawl khal a tham theh.

Mangbang le aw loksong zet in hi tin a phuang, “ An hnipuan pawl meisa rim a nam lo ih hleiah an sam zimte hman  a kang lo ih meisa rim khal a nam lo!”

An Pathian an duh dawt ruangah an kun lo ih an zum fek nak ruangah an Pathian in meipi sungin a luat ter.

A tunah cun a Pali nak Pa cu a um nawn lo,ziangah ti le midang pakhat ka kun lo ding a tive mi pa run suak ding in a feh zo.

Nebuchadnezzar in a ca ngan tu pawl  a ko ih hi tin ca ngan dingin thu a pek:

“Shadrach , Mashach le Abednego te ih Pathian cu  thlaw suah si ko seh , ziangah ti le a mah zumtu pawl cu siangphawhrang thu ngai lo in an maih Pathian hlei lo a dang pathian zum lo in an ruang le an taksa kang ding hman a siang sawn mi pawl run suak tu a si. Cuih hrangah hi bang tukin thu thluk nak ka tuah: Mi hmuah hmuah, ka uk mi ram hmuah hmuah  le tong hmuah hmuah in shadrch, Mshach le Abednego teih Patian a sim sia tu le a sawi sel  tu cu zo khal cip nek nek ih sah saam an si theh dingih an inn pawl cu lo sungih ramsa ek pen khawm mi ah ka cang ter theh ding; ziangah ti le hi bangtuk tihnungza meipi sungih luat dingin run suak thei tu ding Pathian dang an um lo.”

Hi mi  ka thu cah khar nak dingah Nebuchadnezzar ih thu phuan mi “ Hi vek mangbangza thil ti thei tu Pathian dang an um lo” a ti mi  a Pali nak Paih thu hnakih thu sunglawi a um ding tiah ka ruat lo.

Sermon by Pr. Oral RoBerts

Translated by T Z Ceu