A Thisen ih Leizomi Khrih ih Ta Na Si

1 Cor 6:19-20

Thuhmaihruai:

            Tuisun hi kan Bawipa Jesuh thinglamtah ih an thah laifang a si. Cuih an thahnak san cu nang le kei in duhdawt tuk ruangah kan sual aiawhtu ah a thi. Ni khal in a zoh ngam nawn lo ih, thim khuazing a tlung. Himi lai caan ah Barabbas an timi misual pa cu a rak ve. Rak suak aw tiah Palik pa in a vun ti tikah, a suak ngam lo. Na ai ah mi pakhat a thi zo, rak suak aw a ti. A mang a bang tuk ih, keimah vek mi sual pai aiah an thahmi cu zo a si pei a ti ih, a va zoh tikah, Nazrethmi Jesuh a si ti a hmu. Amah ruangah maw ka rak luat tiah a ti ih lungawi le mangbang in a um.

Caan tampi ah sualnak le that lonak kan tuah pang tikah, kanmah le mah kha mi sualnu/pa tiah kan ti aw ih, mi santlai lo le fihnung za ah kan hmu theu. Cuti cun, mah le mah thinnau le beidong in caan kan hmang theu. Cucu Thuthangtha kan theih lo ruangah a si. Culole, thuthangtha kan thei nan kan zum duh lo ruangah a si tla si thei.. Ziang thuthangtha maw?

1. Nangmaih ta na si nawn lo, Pathian ih ta na si zo.

a.     Kannih cu Khrih thisen ih leizomi kan si.

a)     Thuphun 1:5b. “Kannih in duhdawt ih a thihnak thisen thawngin kan sualnak ihsin in luat ter zo.”

b)    1 John 1:7. “Fapa ih thisen in kan sualnak hmuahhmuah a tlengfai zo.”

c)     Thuthangtha cu “Nangmah cu nangmaih ta na si lo. Khrih thisen ih leizomi Khrih ih ta na si” timi hi a si. Bawi Jesuh Khrih ih ta kha nang in mi sual nu/pa tiah ti theinak covo (right) na nei lo. Na santlai lo tuk, fihnung za na si ti ih va ti theinak na nei lo. Obama ih uico hman nang in na hmel a sia tuk, na baal tuk, ka lo fih, na santlai lo tuk tiah ti theinak na nei lo. Jesuh in a nunnak liam in a hawl ih a leimi kha nang in cuvek in ti hlah. Jesuh in a duhdawt tukmi a si.

b.     Curuangah, kan nunnak cu kanmaih ta a si nawn lo.

a)     1 Kor. 7:23a. “Man pekin Pathian ih leimi nan si”

b)    1 Kor. 6:19b-20a “Nannih cu nanmaih ta nan si nawn lo; Pathian ta na si. Man pek ih leimi nan si.”

c)     Rom 14:8 “Kan nun le Bawipaih hrangah . . . kan thih khal le Bawipaih hrangah kan thi . . . [ziangahtile] Bawipaih ta kan si.”

c.     Pathian ih sual ngaithiam zomi kan si.

a)     Efesa 1:7. “Khrih a thihnak thawng in kan sualnak cu ngaidam kan si zo ih a luatmi kan si zo. Pathian ih a zaangfahnak cu kan hnenah tam zet in in pek”

b)    Kolose 1:14 “A Fapa thawngin sual ngaidamnak kan ngah ih miluat kan si zo.”

c)     Rom 3:23-24. “Kan zatein misual kan si theh ih Pathian sunlawinak kan co baan lo. Sikhalsehla, atu ahcun, in luattertu Khrih Jesuh ih tlennak zaar ah Pathian in a zaangfahnak laksawng cu in pek ih Amah thawn rualremnak in tuah sak zo.”

d)    Heb. 9:12,14. Khrih cu tuisun khal ah Pathian hnen ah puithiam in tuansak lai ih, kan sual ngaithiamnak in dil sak.

d.     Cuih thuthangtha a thei ih zumtu pawl hnen ah Pathian ih thukam:

a)     John 3:36, 1 John 5:13.  Kum khua nunnak a nei.

b)    Efesa 1:13. Thlarau Thianghlim khal pek a si.

c)     Rom 5:2. Pathian sunlawinak tawmtu in si ter.

d)    Rom 5:5. Pathian ih duhdawtnak cu kan parah a burh in a burh a si.

2. Ziang tuahnak hrangah Pathian in a fapa thisen in in tlen?

a.     Thlarau Thianghlim umnak/biaknak inn a si.

a)     Pa Pathian in kan taksa in sersiam, fapa Jesuh Khrih in kan taksa a thisen in in tlen. Cuitlun ah, Thlarau Thianghlim in Pathian biaknak hmun thiangah a tuah.

b)    1 Kor. 6:19. “Nan ruangpum cu Thlarau Thianghlim ih biakinn a si ti nan thei lo maw?”

c)     Efesa 1:19-20. Pathian ih cahnak huham cu kan sung a um. Lei le van sersiamtu Pathian in Thlarau, ziangkim theitu le ziangkim neitu cu na sungah a um zo! Hallelujah! Mi menmen na si nawn lo. Na sungah leih hrih lomi lungvar mankhung neitu na si.

d)    Thlarau Thianghlim umnak biakinn sungah ziang pawl na than? Na baal ter maw? Nitin Pathian thu siarnak le ruahnak, thlacamnak le Pathian Thlarau ih fialnak ngai in a duhmi tuahnak ah a biakinn a simi na ruangpum hi na hmang maw?

b.     Pathian sunlawinak hrangah hmang uh.

a)     A sunlawinak lang tertu dingah a si.

a.     1 Kor. 6:20b. “Man pekih leimi nan si ruangah nan taksa cu Pathian sunlawinak ah hmang uh.”

b)    Ziangtin a sunlawinak kan langh ter thei ding?

1.     Pathian amah na duhdawt tikah Pathian a sunglawi (Matt. 22:37f). Curuangah, Pathian kha bia aw, thangthat aw, lungawi thu sim aw. Amah thawn um tlaang/ fehtlaang a nuam tuk aw kan ti tikah Pathian a sunglawi (1 Kor 10:31, Rom 12:1,2).

2.     Pathian ih in duhdawt vek in midang kan duhdawt tikah, Pathian a sunglawi (Rom 15:7). Midang kan bawm tikah.

3.     Khrih thawn kan bangawk tikah Pathian a sunglawi (Rom 8:29).

4.     Pathian ih duhdawtnak thu midang kan sim tikah midang pawl Pathian hnen ah an ra tam deuhdeuh ih Pathian a sunglawi (2 Kor. 4:15).

Thunetnak:

Zumtu tampi caan tampi ah beidong le riahsia in kan um theu. Kanmah te tla kan nautat aw ciamco ih thanau le zianghman ruahsannak nei nawn lo bang in kan um theu. Cumi cu thuthangtha kan thei lo maw, kan theihmi kha kan zum duh lo maw, curuangah a si. Cui thuthangtha cu:

1.     Nangmaih ta na si lo. Khrih thisen ih leizomi na si. Na man cu Jesuh Khrih ih thisen le nunnak man na si ziangahtile a nunnak liam in a lo lei zomi na si. Khrih ta na si zo ruangah, Pathian ih sual ngaithiam theh zomi na si. Nangmah le mah kha misual pa/nu tiah ti aw ciamco nawn hlah. Khrih ih ta kha nang in cuvek ih ti theinak thu (right) na nei lo.

2.     Ziang duhsan in Pathian in Khrih nunnak cem ko rori a lo tlen si pei? American pawl billion ziangzat cawk cem in le an ralkap pawl ih nunnak cem tiang ziangah ral an do? Daihnak an duh ruangah. Ziangah Khrih in a thisen in in lei duh si pei? Pathian sunlawinak langh tertu dingah a si. Ziangtin Pathian cu kan nunnak hmang in a sunglawi thei ding? Khrih thawn a bang awmi nunnak kan neih ih, nitin Amah thawn feh tlaang hi nuam kan ti tikah Pathian a sunglawi.

San No Thuan

March 29/2013

Good Friday sermon at the Falam Baptist Church, Maryland