2013 Indianapolis ih Lai Kum Thar Puai Tuah Daan Zohkirsalnak

U le nau zaten,

Lai kum thar puai kan tuah tikih kan tulsammi pawl ka rak ngan ve duh. Kan puai a tlamtling theinak dingih bawmtu a si ve pangah.

Puai kan tuah tikah State ih kan sisin a tlamtlin lole puai kan ro sialsial thluh curuangah:

1. Inntek latu pawl ih thurel tlaang daan ding: 

Puaituahnak khua ih a umi Chin Community le Kawhhran tuanvo neitu pawlin puai hlan thlakhat duh talah program detail pawl rel khawm nak neih thei le a tha. Kawhhran hi puai tuah ringringtu a si tikah puai kal hmang Kawhhran hnatuantu pawl in an thei zet. Thurawn awk hi kan Falam mi in kan duh lo theu, cucu kan thanso thei lonak pakhat cu a si. Kan mai thuthu a si an nih thawn ziang a seng timi hin kan thansonak ding in dawn.

2. State parih zohkhentu program Manager a hranten ret ding

1. Music kilkhawitu a thiamzetmi pakhat ret ding. State parah tonak tuahsak ding. Awnmawi tumtu pawlin an mai guitar maw an thlengduh tikah cui tuanvo neitu lawngin timtuahsak ding.
2. Performance neitu ding pawl a lengah tiarcia (ready) ten an umcia maw tiah zoh khentu Pakhat ret ding. Thuthantu pawl rin lo ding. Thuthantu pawl kha cumi tuanvo neitu sawn in kimcang zetin sim theih sawn ding.
3. Zuamnak ih teltu ding pawl caan hmanten an thlen lole kawhsal nawn lo ding.
4. Program pakhat hnu pakhat a thlengawk tikih thilri pawl thawn sukso tu ding milai ret ding.

3. Lehnaklam:

1. Lehnak hmuahhmuah a tlamtling dingih zoh khentu Program Manager a hranten ret ding.
2. Lehnak phunkhat ciar ah manager pakhat ciar ret ding. Cu pawl leh Program manager thu rawn aw ringring ding.

4. Mipi Pawl Thlun ding. 

1. Program hohatu lawng mawh thluk a theihlonak a ummi cu mipi in kan thlun lomi a um ve. Curuangah kan caan duhvek ih a feh thei lonak a si ve. Kan Lai Puai nuam lotertu ih telvemi cu:
2. Tikcu hman ten thlun ding mipi kan thlun lo. Tuitum ah Friday 6:30PM ah thok ding ti a siih nazi 8:00PM lawngah mipi an thleng lai. Nazi 1:30 kan tlai. Saturday zaanah 7:00PM thok dingah Pa 8:00PM lawngah mipi an thleng lai. Nazi pakhat kan tlai. Sunday sun Khawm nazi 10:00AM ah thok ding a sinan mipi 11:00AM lawngah an thleng lai. Cuvek cu Lai puai lawngah ka hmu dah.

5. Central ih caan kan hmanmi pawl Sunday zaan lawnglawngah tuah lo ding. Thuthimnakah Khual lian thusimnak le person of the year laksawng pek tivek, theihcia mi pawl Saturday zaan ah tuah ding. 

A dang pawlcu midangin an rak ngan ruangah ka ngan nawn lo ding.

Seherhnak thawn,

Pastor Ci Lian Kap