Tui sun cu thanaunak nei phah in kan hmuan dum lam pan in ka
feh. Dum ti malte ka toih phah. Kan makphek kung hrek khat cu pung sungah kan
ciing ih a hrek cu leilung parah kan ciing. Leilung par ta pawl cu an kung a
niam nan, an rah a tha zet ih an hning zet. Culai ah, pung sung ta pawl cu a
kung tla a saang zet, rah tla an rah tha zet nan, an vuai hniaphni.
Ziangruangah si pei tiah ka ruah tikah, ka ruah suakmi cu an hram thukpi ah a
pil thei lo ih, tidai le rawl dang pawl an ei thei lo ruangah a si ti ka hmu
fiang. Cu vetein, naam ka lak ih, pung taw cu ka aat ong theh. Cule, leilung
thatnak ah ka toh ih, tidai ka paih ciamco.
Culai ah Pathian Thlarau in I pawlkom nasa. I simmi cu, “Ka
fa, nangmah hman in na thilfa ciinmi pawl hi an uai ding na sian lo ahcun, nang
sinsin cu uai car ih na um ding ka lo siang lo lawlaw. A tu ih na uai caarnak
cu a dang ruangah a si lo, na hram bunnak a dik lo. Leiram tha ah hram na bun
lo pi! Ziangti in uai lo in na um thei ding. Nang cu na lungawinak le nomnak na
hawl daan cu a laangte sunglawng a daihmi leitlun nomnak le tisa duhnak ah
nomnak na hawl ih, na hram na bun cuteh! Leiram tha a simmi ka thu sungah, ka
duhmi tuahnak ah lungawinak hawl aw, na lungawinak cu thinghnah hring bang in a
hring ringring ding” tiah I sim.
Aw, Bawipa, na fapa uai ding i siang lo ti ka thei ruangah
ka lungawi tuk. I duhdawt tuk ti ka theih ruang khal ah ka lungawi tuk fawn. Na
thu sungih nomnak, lungawinak hawltu ka si theinak ding le na duhmi ruat in
cumi tuahnak lawngah ka nunnak hi ka feh theinak ding I bawm ringring hram aw.
Amen.
San No Thuan
No comments:
Post a Comment