Media Workshop Tuahsuak
By Jeremiah
19 June 2012
KUALA LUMPUR (Malaysia) : International news agency hmin thang zet AFP ih tuan rero lai Julia ih ra zirh mi Media Workshop cu MAC tlawng ah colhni sun (17 June) ah tuah a si. A ra kaitu minung 18 cun kan hlawkpi nasa. Julia cun theihkauhnak tampi cem in leitlun media thu a phunphun a zirh.
A zirh mi tampi lak ah kan zate hrang ih cin hngal ding thil tha pawl cu a hnuai lam ih tarlang mi hi an si.
1) Midia a phunphun (TV, Radio, Newspaper, News agency, Magazine) hrang ca ngan sak dan ding a bangawk lo zet ruangah mai tui mi theih fiang ih a tul mi zir ding.
2) Professional journalist pakhat si thei ding cun hmin nei ve tawk news agency (or) newspaper ah mai ngan mi article va hmuh leh va zuar, cu mi hmang in hnatuan hawl.
3) Freelance writer dinhmun in thu hla tha zet ngan ih news agency hnen ih va zuar.
4) Thulu ngan tikah tawifel thei bik ih ngan ding. Mi in siar hai seh ti thinlung vek men in a sung thu si lo mi Thulu ih hmang loh ding.
5) News ngan tikah a thupi bik a si mi paragraph (or) tlar hmaisa bik ah (Who? What? Where? When? Why?) ti mi hmangin kim fel thei bik in ngan ding.
6) Tlar hmaisa lam ih ngan lang zo mi thu (facts pawl) ngan nawn sal loh ding.
7) News kan ngan tik ah a si vek vial ih ngan ding, mai ruahnak leh zum dan telh hrimhrim loh ding.
8) News pakhat na ngan mi thu ah na ruahnak le hmuh dan ngan na duh a si le Opinion section ah ngan ding (mai news ngan mi kar lak ah ngan loh ding tinak).
9) Thu buai/buainak thuthang ngan tik ah, leh lam veve ih sim dan thei dingih zuam leh an sim veve dan vek in tan bul nei lo ih ngan lang ding.
10) News ngan tikah thu dik cekci/a tongtu ih tong suak mi cekci vek ih ngan ding, tan lam nei ih ngan loh ding, mi in ngan hram hlah an ti mi upat tihzah thiam ding, thu dik ziktluak si lo mi ngan loh ding (khing awk theih cih a si).
11) Mi ngan cia media/online/news agency ih ca copy & paste tuah lo ding. Thu laknak ih hmang kan duh a si le kan thuhram laknak ngan lang ding, mai tongkam ten ngan kir sal ding (never copy & paste!).
12) Tong dang ta news/ca kan let tik ah a cang thei tawkin an ngan vek ih thlun (a thu feh dan ah) leh a san nai thei bik ih let ding.
A par ih tarlang mi pawl hi thu tampi kan zir mi lak ih thu malte vial a si lai!!! Julia ih in zem mi teaching note a duhduh cun ccyimalaysia@gmail.com ah email in cah a theih. 2:30pm – 5 :15 pm tiang thu zirnak leh thu suhnak thawn hi Media Workshop cu kan hlawkpi tlang zet a si.
Salai Jeremiah
KL, Malaysia
No comments:
Post a Comment