Hmin (Noun) cu awsuah daan si lo in, "tong hram" in ngan aw

Duhdawtmi Saya H. Sui le zaten,

Na canganmi pawl hi ka rak siar ringring ih ka hlawk pi zet. Na taima zet ih ka lo lawm zet. Zuam sin in ngan rero aw la, mi tampi in kan hmang vingvo ding. Mi in ziang an lo ti khal le, dung ah sip hrimhrim hlah. A thami na hmuh le, zir tum aw la hmai ah tha deuhdeuh in cangan sinsin mei aw.

Na nganmi a tanglam ah, hi ti deuh in sisehla a tha lo pei maw tiah ka ruahnak ka lo hlawm ve.

Na nganmi:

3. Kan awsuah a thlengawk le kan awsuah vekin ngan ding.

khuapi siloin khawpi, siapi siloin sepi, biazai siloin bezai,...

Himi a pathumnak na nganmi hi, kei ih ruah daan cun, awsuah vek in si lo in, kawl pawl ih, "Yi dawh a hman, phat dawh a taan" timi hi thlun sehla, a tha sawn lo ding maw tiah thu ka bur duh.

Ziangahtile:

1. Falam peng sungah, tongfang pakhat hi aw a phunphun in kan suah.

Thuthimnak ah, Rawl nan ee/ei zo maw? .... tivek ah, mihrek in "ee" ti ih awsuah kan um, "ei" ti ih awsuah kan um. Ziangvek ih kan suah khal le, kan cangan daan ah, "root word" "tong hram" kan zoh ahcun, "ei" a si ruangah, ei ti ih ngan ding a si sawn. Curuangah, tonghram zoh in cangan ding tiah kan ti lo cun, kan cangan a bang aw thei lo ding ih, calai ah buainak a suak sin thei ti ruahnak ka nei.

2. Hmin (Noun) kan ngan tikah, a awsuah thlun in kan ngan theh ahcun, a sullam a fiang lo ding.

Mirang khal ah, ram dang ummi pawl cun kan fiang sin ding, midum pawl le Southern ih ummi mirang pawl ih, an mirang tong awsuah daan tla cu a dang zet. Tutiang ka thei thei tuk hrih lo. Princeton ih tlawng ka kai lai ah, kan Professor nu in, midum cangantu in, midum pawl ih sal an cannak thu a nganmi ca siar ding homework in pek. Hmai 10 hrawng kha midum pawl ih tong vek cekci, an "awsuah" in a ngan ih, "Dictionary" sung khal ah hawl a theih lo. A tongfang kom daan a dang zet. Ziang a ngan duhsannak ti khal a fiang thei hrimhrim lo. Curuangah, mirang ka pi nu, ka siar ter ih, i timi cu, "kei khal ka thei theh thei lo nan, a duhsannak cu himi a si" tiah i sim lawngah, a thuhla ka fiang thei lai.

Mirang tong khal ah, awsuah daan phun dangdang an nei. Asinan, ca an ngan tikah le, dictionary sung khal ah, tongfang hmaan in an ngan ih, an siar tikah, hitin kan siar tiah, dictionary sungah a siar daan an ngan. Midum khal in, awsuah phun dang zet in mirang tong khi an tong nan, an ngan tik ahcun, "tongfang hmaan" in an ngan thiamthiam.

Cuvek thiamthiam in, laica kan ngan tik ah, Hmin (Noun) ih tongfang kan ngan tikah, tong hram (root word) sawn in kan ngan pei ih, a awsuah daan kha dictionary sungah kan ngan pei. Cu lawngah, kan calai ngan daan kan bang aw theh thei ding.

Khuapi (city) timi cu "khua" le "pi" timi tongfang pahnih a kom awmi a si ruangah, ca kan ngan tikah, khuapi tiah kan ngan ding ih, dictionary sungah, a siar daan, phonetic kha /khawpi/ tiah kan ngan sawn pei.

Biazai (poem) timi cu "bia" le "zai" a kom awmi a si ih, ca kan ngan tikah, "biazai" tiah kan ngan ding ih, dictionary sung ih a siar daan, phonetic kan ngan tikah, /bezai/ tiah kan ngan sawn ding. Cucu calai ih feh daan a si hmang ka ti.

Bezai tiah kan ngan cun, "be" cu khui in a ra tiah in sut sehla, a sullam dangpi ah a suak ding.

Siapi tiah kan ngan lawngah, a sullam simtul lo in, an fiang ding. Sepi tiah kan ngan cun, "se" le "pi" an kom tikah, a sullam a fiang nawn lo ding.

Curuangah:

Thluasuah tiah kan ngan ding sawn a si. Ziangah tile, harsatnak Thlua le tlaang suak ko feh thei hram law tinak a si. Thlawsuah tiah kan ngan tikah, a sullam kan fiang nawn lo. A siar daan cu or awsuah daan cu dictionary sungah thlawsuah ti in ngan theih a si ko.

Meiro tiah kan ngan pei. Ziangah, "meisa ih a ro," meisa dung lam ih tangmi ro tinak a si. Salai Sun Ceu hla sung khal ah, "romei" tiah hlaphuahtu in a phuahmi nan hmu ding. Kan unau Mizo pawl khal in, "romei" tiah an ko ve. Mero tiah kan awsuah vek in, kan ngan ahcun, a sullam a tlau ding.

Meithal tiah kan ngan pei. Ziangah, kan pupa san lai ah, tteklung in meisa a alh hnu ah a suak theimi thal a si ruangah, meithal tiah an rak ko ti hi zum a um bik. Mithal a si lo. Mithal cu kan aw suah daan phun khat men a si.

Asinan, root word ih ngan khal le, sullam zianghman a nei lomi pawl an um thotho. Cupawl cu ziangti tha. Tong hram ih ngan tikah, sullam a neimi cu, tong hram vek in ngan sisehla, a sullam a thuk ih tlunah, kan cangan a bang aw thei ding.

Curuangah, ca ngan tikah, kan aw suah a bang aw lo tampi pawl kha, bang aw te ih ca kan ngan theinak dingah, kan "tong hram" (root word) thlun in kan ngan pei ih, cun, kan siar tikah, a siar daan phonetic cu dictionary sungah kan lang ter ding. Cu ti ih kan feh le kan bang rep thei bik ding tiah ruahsannak ka nei.