Ka Thinglung Vek Putu David

Baibal : Acts 13:22

Kan Baibal sung ih Pathian mi lak ih mi ropi zet pakhat cu David a si. Ziangahtile Pathian in “Ka lung tongtu / ka thinlung vek a putu” ti ih a kawhmi a si. Siangpahrang David ih nunnak zoh vivo tikah mangbangza thil tampi kan hmuh theimi a um. Pathian ttihzah zettu a si vekin, sualnak rapthlak zetzet a tuahnak khal kan hmu. Asinan, ziangruangah Pathian in hi tluk in David hi a duh ih a cawisang ti hi zir tlak ngaingai a si. A nunnak hmang in thlarau thazang kan lasal cio pei!

DAVID CUN

I. Pathian rinsannak taktak a nei

David nunnak ih thil danglam zet pakhat a si mi cu “Pathian a rinsan tuknak” hi a si. A nauhak lai ih tuu a khalh lai caan ah si seh, a ral lian Goliath a do lai caan ah siseh, ral dangdang a donak ah Pathian rinsannak thawn thu a rawn ringring ttheu. Saam 118:8-9 sung zoh tikah “Milai rinsan hnakin Bawipa rinsan a ttha sawn” ti’n in sim a si. Pathian cu nitin kan nunnak ah Amah rinsannak kan neih ding hi a duh bikmi a si. Ziangkim kan tuahnak ah Pathian rinsannak kan neih a si le David bang in kan ral pawl thlun ah nehnak “Thlan-tar” kan zaar ding a si. Bawipa lawng rinsan uh si!

II. Pathian hrikthih pawl a ngaisang tuk

A pahnihnak David nunnak ih kan zir thei mi cu Pathian mi / Pathian hrihculh mi a ngaisangnak hi a si. Amah that ding ih a dawi rero tu Saul that ding ah caan ttha voi tampi a nei nan, Pathian ih hriakculh mi parah zianghman a tuah ngam lo a si ( I Sam. 24:1-16; 26:3-20). Hi tawk fangte hi zumtu pawl hrangah a thupi tuk! Pathian hnattuantu:-Pastors, Evans, Missionaries tvp hi kan ngaisang thiam a ttha zet. Pathian hriakculh mi pawl kan duhdawt le kan zoh tthat hi Amah Pathian par ih kan tuahmi hril a si ih thlawsuah donnak hrampi khal a si.Curuangah kan umnak Kawhhran le kiangkap ih Pathian hnattuantu pawl hi a ttha thei bikin a zoh daan thiam uh si!

III. Pathian hmai ah sualsirnak thinlung a nei

Kan simzo bangin, David nunnak zoh tikah Pathian a ttihzah caan a um bangin, sualnak rapthlak taktak a tuah caan a um ve a si. Asinan, David ih nunnak thuthup cu “sualsirnak thinlung a nei ringring”( Saam 51:12,17). Sualnak rapthlak zetzet voi thum lai a tuah nan, Pathian cun a cawisang tho tho ti kan hmu. Ziangahtile a sualnak hmun ihsin sualsirnak thawn Pathian a pansal ringring. Kan ralring ttulmi / theih ttulmi cu “David in voi khat sualnak a tuah mi kha a tuahsal ti kan hmu lo”. Hi hi zumtu pawl hrangih zirtlak ngaingai a si. Leitlun kan dam sung caan tawite ah sualnak a tuah theimi taksa ih nung kan si vekin, sualnak kan van tuah pang hman ah David thinlung vek nei in sualsirnak taktawk thawn Bawipa pansal uh si. Pathian ih duh bikmi cu “a keikuai mi thinlung” a si.

IV. Pathian thangtthat nun a nei

David ih nun thuthup pakhat a simi cu thangtthat nun a neihmi hi a si. Harsatnak ihsin luatnak a hmuh caan ah, ral lak ihsin nehnak a co caan ah Bawipa a thnagtthat ringring a si. Siangpahrang a si hnu khal ah a hlan ih a tuu khalhnak hmun ih Bawipa ih a umpinak, lamhruainak le kilvennak ruangah Bawipa a thangtthat. A hung upat tik ih ral a donak hmun ih nehnak a co tikah Bawipa thotho a si. Ziangahtile ralnehtu taktak cu Israel ralkap pawl si loin, amah Pathian sawn a si ti hi a faing tuk a si. Cuvekin kan nih zumtu pawl khal kan dinhmun tawkte ih Bawipa ih lam in hruainak parah amah thangtthat nun nei ve uh si.

Tui ni ah David ih Pathian hi kan Pathian ve a si. A danglam dahlo, a thlengaw dahlo. David bangin Pathian thinlung a tongtu le Pathian ih cawisang mi zumtu kan si theinak dingah nitin kan nunnak ah “Pathian a rinsantu, Pathian hriakculh mi pawl a ngaisangtu, Pathian hmai ah sualsirnak thinlung a neitu le Pathian thnagtthat nun a neitu si ding in zuam coi uh si!

“Pathian in nitin nazi 24 sung caan sunglawi a lo pe ringring ih a hrangah caan ziangzat na hmang ve ding?”

Khrih hrangih,

Joel Cung

__._,_.___