Laimi le Miphun Duhdawtnak

Rinsanmi Saya Run le zatein,

Na sermonmi cu thazaang ka ngah nasa. Mit khal a vaan ter zet. Na canganmi parah, kei khal ka ruahnak tawite in rel ve ka duh.

Laimi thlaraumi ti aw pawl le Bible ih thlaraumi pawl

Tulai san ah mi hrek khat thlaraumi a ti aw pawl ih an ti theumi cu:

1. Mipiangthar le thlaraumi pawl cun, mai miphun le mai nunphung mawi (sinfen, lam, ttong, nuntu khuasak daan tha) ti pawl fingkhawi awknak ah a tel lo ding an ti.

2. Fang-er (Chin New Year Festival) ah khal tel an duh lo.

3. Chin Phunpi Ni (Chin National Day), laimi pawl miphun khat ih pawlkom awk thei ni le mipi ih duhmi hruaitu ih hruainak in kan feh pei timi ni pawl zumtu pawl ih tel ding a si lo tiah an au ciamco. Hi tawk hi telmi pawl cu, Satanmi, piangthar lo mi, thlaraumi lo ah an ruat. Pathian hnatuantu pawl sinsin tla cu a tel ih tel lo ding tiah an ruat.

Bible sung ih thlaraumi pawl ih nunnak kan zoh tikah, a fiang tukmi cu an thlaraumi deuhdeuh tik ah, ttong dang in, Pathian thu an ngai deuhdeuh tik tah, an miphunpi taksa, thinlung, le thlarau kilkip ih tthansonak ah an nunnak an pe aw sinsin timi kan hmu thei. Tulai Laimi pawl ih kan pianthar daan thawn cu a va dang aw ve aw!

Laimi le kan Pathian thu theih daan

A tlun ih tar zomi, miphun le ram damnak, tthansonak ah mipiangthar pawl tel lo ding tivek ih kan ruahnak cu khui in a ra? A ratnak bik cu Pathian kan hmuh daan hi a fatet tuk ruangah a si. Kan Pathian cu vanram lawng kai ter in duh ih, a dang lei taksa luatnak pawl cu poisa lo tu Pathian ah kan ruah theu ruangah, lei tlun ih kan tuah dingmi tampi kan thelh. Curuangah, kan biakmi kan Pathian hi zovek Pathian a si timi hi - taksa rundamnak/luatnak duh tuktu Pathian khal a sinak mit in Bible kan siar le, a sinak famkim sin in kan hmu thei ding.

Bible sung ah miphun hrang ih pum a pe aw tu pawl hi zo ih fialmi an si? Zo ih thu an ngai? Feh aw tiah thu a petu bik cu zo a si? An feh tikah, zo in thluasuah/hlawhtlinnak a pe? Amah Pathian hrimhrim a si. Israelmi pawl Egypt ram uknak in suak ding (thlarua lam luatnak lawng a si lo) ah Moses a thlahtu hi zo a si? Amah Pathian a si. A dangdang Pathian ih cangvaih daan pawl zoh sal sehla, kan Pathian cu kan thlarau Vanram kai ter ih, kan tisa cu farah emem, na ringring, fimthiamnak nei lo, mai phunhnam ih nunphung khal thlau thehmi phun hlo minung, mai ca khal siar thiam nawn lo, le midang ih nam nuai reromi miphun si ter duhtu Pathian a si lo ti hi kan mipi in kan theih fiang a cu tuk zo.

Zumtu le Pathian hnatuantu zatein sawm ka lo duh mi cu:

1. Kan Pathian ih a hnatuan/mission hi taksa, fimnak le thlarau luatnak/tthansonak hrangah a si timi hi hngilh hlah uh si.

2. Bible sung ih thlaraumi pawl ih feh daan zoh in, kan miphunpi taksa, fimnak le thlarau lam ih kan tthanso theinak dingah zuam sin uh si.

3. Cuti ih mission a phunphun a tuantu pawl kha, piangthar lo, mithi le lei tisami ah hmu hlah uh si. Mai kawhhran lawng kha a nungmi, Pathian ih theihmi, Pathian thu dik pom ngahtu ah ruat aw hlah uh si. Pathian ih in kawh daan cio in a hnatuan/missoin tuan uh si.

4. Pathian ih in pekmi kan nun phung pawl sersiam tha sin in, tthanso ter sin dingah Chin kum thar puai, le Chin Phunpi Ni khal tel uh si.

5. Chinmi pawl Bawi Khrih ah unau kan sinak thei in, kan nunphung le kan ttong a phunphun a bang aw lomi kha, zuam awknak ah hmang lo in, nunphung phunkim neih hi Pathian ih thluasuah sawn a si zia hmuh sak awk thiam sawn uh si. Pathian ih sersiami pawl zoh sehla, kan bang awknak hnak in, kan lamdannak a tam sawn. Cucu, Pathian ih duhmi le thluasuah hrimhrim a si. Curuangah, zuam awknak (competition) ah nunphung dang awmi pawl hi hmang lo in, Pathian ih in pekmi ciar kha hmaihngal zet in cawisang thiam uh si.

Ka lungawi,

Sanno