Tong Hram Thlun In Ngan Sawn Aw!

Duhdawtmi Saya H. Sui le zatein,

Ruahnak thatha na suahpi ih lungawi um zet. Dr. San No Thuan i ti ih, ka lunghmui zet nan ka theh zik te, ka ngah deuh hrih lo. Sanno tiin i ko ko aw.

Cun, khuapi, khawpi, siapi le sepi ti pawl thleidannak na pekmi pawl hi kei cun, tong hram in ngan siko seh tiah ka ruat deuh thotho. Ziangahtile:

1. Tong hram (root word) thlun lo cun, kan laica cangan daan ah a bangrep (consistent) thei lo ding.

Laimi cun, kan tong hram (root word) pahnih kan kom tikah, awsuah harsa lo pawl cu kan awsuah a thleng aw cuang lo.

Thuthimnak ah,

1. Khuai: Khuai-thlar, khuaibu, khuaiseeng ti pawl kan siar tikah, Khuai timi khi a thleng aw dah lo ding. Ziangah tile, a awsuah khi suah a ol, awsuah dang ih suah a tul lo.

2. Ar: Arbawm, Arti, Arsa kan ti tik khal ah Ar timi khi a thleng aw cuang lo. Ziangah tile, a awsuah khi a ol, awsuah dang ih suah a tul lo.

3. Vate: Vatebu, vateti, vatesa, vate rual .... tivek pawl le a dang pawl khal zoh uhla, laimi in, hmin pahnih kan kom tikah, tong hram lawngte in kan hmang deuh ti nan hmu ding.

4. Vok: Voksa, vokpi, vokcang, voknurial ... zo hman in, vekpi, veksa kan ti lo.

5. Caw: Cawcang, cawpi, cawla

6. Me: Mepi, mecang, mela

Culai ah Sia ... cu kan sal tikah, sepi, secang, sela tiah kan aw kan suah. A ruang cu, Sia timi tongfang hi a ol zawng ih kan suah ruangah a si men.

Cuvek thotho in, Khua, Bia, thlua ti pawl hi a dang tongfang thawn kan kom tikah, khua kha khaw, bia kha be, tvp in kan ngan ahcun, a dang laica kan ngan daan thawn a bangrep thei lo ding. Hi tongfang pawl cu kan awsuah a vung har deuh ruangah a dang thawn kan kom tikah, a ol zawng in aw kan suah. Sullam dang an neih ruangah a si hrimhrim lo. An cafang kom kha, awsuah a har deuh ruangah a si men.

Thuthimnak:

1. Khua tin in ra suak cio uh. /khaw/ tiin aw kan suah.

2. khua nu, khua pa (khua ih rinsanmi nulepa tinak) kan aw suah cun, a ol zawng in khaw tin kan suah nan, a ngan cun, khua a si ko.

3. Khua tin ah than uh. Cathiam lo cun, khaw tiin a ngan men ding nan, cathiam cun, khua tin a ngan ka zum. Ziangah tile, khaw in sullam a nei lo.

4. Kan bia aw zo. Kan awsuah cun, kan be aw zo ti a si nan, be ti in kan ngan le, mihrek khat hrangah, an sullam an fiang lo thei.

Curuangah, Khuapi/te, khuabawi, khualu/taw, khuazin, khuazing, khualipi, khua nulepa, khua tlaang, khuahrum, khua senpi ..tvp.. pawl hi ... tong hram ih kan ngan pei tiah ka tinak a si. Cu lo cun, a sullam khal a fiang lo ding ih, a dang laica kan kom daan thawn khal a bang aw lo ding.

Curuangah, tong hram in kan ngan pei ih, kan awsuah daan cu dictionary sungah kan ngan ding. Culawngah:

1. Awsuah daan phun dangdang neitu kan Falam miphun pi bangrep te in ca kan ngan thei ding.

2. A sullam khal kan fiang lohli thei ding.

3. Kan laica dang kan ngan daan thawn khal a bang aw ding. Consistency um zet in ca kan ngan thei ding.

Na ruah daan??

Ka lungawi,

Sanno

http://sannothuan.blogspot.com/