Thufim 6:16-19
1.Puarthau mithmai
Hi hi Pathian ih a ten emem mi a si. Pathian rori in a ten ti
cu a tawpkhawk mi tawng le lungput a si. Minung hi kan thlen cin I zir
le kan neih mi I zir in puarthau a awl zet. (1Pt.5:5) Pathian in a ten
lawng si lo in a daldal bet a si.
Unau na dinhmun ruangah le na thlennak I zir ruangah na puarthau
pang maw? Bawipai ten mi a siruangah tih a nung tuk mi a si. Puarthau
pang hlah uh si.
2.Thuphanpertu lei
Thuphan ti cu thudik ih ral a siruangah Pathian in cucu a
ten lawlaw. Thuphanper pang hi awl ngaingai a si. Ziangahtile mai
tanghma sialnak a si ih, mah le mah khaisan awknak khal a si. Cu vek
cu Pathian in a ten tuk. Zumtu in kan theih ding mi cu thuphan ih
ramlak hi a tha lo a si ti hi. Thuphan hi per lo hram uh si la thudik
rel lo can hi nei uh si.
Unau thuphanper hi zawngsang a awl ngaingai thuphan cu per lo rori
tum uh si. Pathian ih ten mi a si.
3.Misual lo a that tu kut
Mawi sualnak ziang hman a nei lo mi vathah mai hi Pathian in a
ten tuk. Mi thah hrimhrim hi Pathian in a duh lo ih cuihleiah mawh
sualnak ziang hman a nei lo tu vathah bet sinsin cu Pathian in a ten
tuk. Unau tum pangpang hlah aw. Cun na tuan ding khalah ruat hlah aw.
4.Sualralnak lawng khua a khangtu thinlung
Pathian in thinlung hi duh um emem in in neih ter ih cuih in neih ter mi cun a mai duh zawng lam khuakhang dah lo ih a duh lo zawng lawnglawng khua kan khan cu Pathian in a ten tuk. Unau na nitin nun lam tluanih na tumtah le na khawkhan theu mipawl kha ruat hnik aw la Pathian duh zawng an si theu maw?
Sualralnak lam khawkhan cu a awl in a nuam zet. Pathian duh zawng
lam khawkhan cu khawkhan men a si ko nan kan paih tuk lo. Zumtu in kan
theih tul mi cu khawkhan menmen cu a pawi lo pi ti ih daithlan men
ding a si lo Pathian in a ten a si ti hi.
5.Sual tuh dingih a zamrangtu
Thiltha tuah dingah cun muang cang zet, sual tuah dingah
hmuah zam rang zet lala si. Hi vek minung cu Pathian in a ten tuk.
Sual kan tuah hi tuah laiah cun a nuam zet vek cu a bang nan leh hnuih
tuan man rah kan par ih a thlen cun a nuam nawn lo. Curuangah thiltha
tuah dingah cun kan zam rang kei thil sual tuah dingah cun kan muang
cang hram ke. Pathian in sual tuah dingih zam rangpawl a ten tuk.
6.Theihpitu dik lo ih tan
Thutheihpitu dik lo ih tan cu Pathian in a ten tuk. Theihpitu ih kan tang ding a si hmanah a dik mi zawngih tan ding a si. Dik lonak pauhpauh cu Pathian in a huan in a ten tuk. Zumtupawl in kan tannak ding cu diknak par lawngah a si a tul. Na unau an si hmanah dik lo ih an nun le an um ah cun tanpi lo lawlaw aw. Theihpitu dik lo ih kan tan cun sual thape khal kan si cih.
7.Unaupawl lakih harsatnak a suahpi theutu
Harsatnak mi thlen tu cu Pathian in a ten mi an si. Mi dang hrangah malsawmnak kan si thei lo hmanah harsatnak petu cu si lo hram
tum a tul. Nangmah le keimai ruangih mi innsang, mi Kawhhran, mi nupa
karlak pawlah harsatnak a thleng pang a si ah cun Pathian in I ten a
si ti kan theih awk a tha.
Zumtu le nuh Pathian ih a ten mipawl hi zoh rero tikah kanmah
minung khal in kan ten mi an si thluh ko. Curuangah a tuahtu si lo in
Pathian lamah tang in a dodal tu si sawn uh si. Pathian in nunnak in
pe ih a duh lo zawng tuahnak le a ten zawng tuahnak ih kan hmanawk
pang a si ah cun a pawi tuk ding. Curuangah Pathian ih a ten mi teng
thei ve dingin Pathian hmaiah kun uh si.
Evan Lal Eng Lian
No comments:
Post a Comment