By San No Thuan
Unau pawl,
Rev. Dr. Stephen Hre Kio, Siangbawi ti ih kan kawhnak par ih ka ruah daan mal lai ngan ve ka duh.
FBA le LBA in 1998 kum ah kan Falam mi pawl hi Halkha le Tedim pawl bang in kan hnen ah mirang siangbawi pawl umpitu kan nei lo. Mirang siangbawi pawl bang in (culole, mirang siangbawi pawl hnak hman in) Falammi pawl kan hrangah hna in tuansaktu Rev. Dr. Stephen Hre Kio hi kan upatnak ah Siangbawi tiah kan pom pei tiah Baptist pawl in an relcat ih an nemhnget. Zohnik uh a tuahmi pawl hi: Falam Bible ca in lehsak, Falam Cangan daan in ngan sak, Laimi zohman ih neih hrih lomi Bible Simfiangnak book by book in in tuah sak rero lai. Himi pawl an zoh tikah upat sunlawihnak ah "Siangbawi" tiah an ko.
Baptist a si lomi pawl in Dr. Hre Kio ih Bible lehmi le a dangdang a tuahmi pawl hi kan hrang khal ah thil tha a si ve tiah a titu an um ih upatnak ah, "Siangbawi" an ti ahcun lungawi za a si. Asinan, an kawh ve lo khal le, a poi lo lawlaw. Zohman in ko tengteng uh tiah fialmi a si lo. Upat a duhtu pawl ih an kawhnak a si. Buai ding a um lo.
Lairam ih a ra dahtu Carson Siangbawi, Cope Siangbawi, Johnson Siangbawi pawl khi Siangbawi tiah kan ti tikah zokhal in kan el aw ciamco dah lo. Baptist maw, pawl dangdang pawl in maw zohman in kan el aw lo. El aw khal sehla ziang thathnemnak a um? Upatnak in an rak ko ih, upatnak in kan ko ve. Kan thinlung sung ih upatnak kan neih ve ruangah kan ko ve mei. Zohman in kan miphunpi meeting thuthluknak tuah hnu ih kan kawhmi an si lo.
Roman Catholic pawl khal in "Siangbawi" tiah an father pawl an ko ih, upatnak ah "Siangbawipa" tiah kan ti ve mei. Zohman kan buai dah kel lo. "Father cumi …" an ti khal le, "Father pa" tiah kan tipi ve mei. Zo a buai dah? Zohman in meeting in sawm hnu ih kawhmi an si lo ruangah kannih "Siangbawipa, Father pa" ti ih kawh ve a tul lo tiah tlaang cabawm ah kan suahpi dah lo. Midang in upatnak thawn an kawhmi cu kan upatnak lang ternak ah kan ko ve mei. Baptist pawl in "Siangbawipa" tiah Dr. Hre Kio an kawhmi hi rak do ciamco a tulnak ka hmu lo. Upatnak in kan kawh duh le rak ko ve mei sehla. Na kawh lo khal le, zohman in an lo hnek lo.
Laimi pawl, a hlei in Falammi pawl in kan thinlung put daan rem a tul hmang maw tiah ka timi pakhat cu, "Kan maih hrangih thil tha a tuahtu lawng hi upat pek kan tum." Kan pumpak hrangah maw, kan innsang hrangah maw, kawhhran hrangah maw, kan maih hnam le hrin hrangah maw thil tha tuahtu an si lo ahcun upat pek duhnak lungput kan nei lo theu. Midang hrangah thil tha a tuahtu pakhat khat kan hmuh, kan theih a si ahcun, sunlawih pi, upat pi kan thiam ding a thupi zet. Cucu lungput dik a si sawn.
No comments:
Post a Comment